ଭୁବନେଶ୍ୱର,୨୪ା୧(ବ୍ୟୁରୋ):ପ୍ରାକୃତିକ ବିପର୍ଯ୍ୟୟ ଓ ପରିଚାଳନା କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ ପାଇଁ ଓଡ଼ିଶା ବିପର୍ଯ୍ୟୟ ପ୍ରଶମନ କର୍ତ୍ତୃପକ୍ଷ (ଓଏସ୍ଡିଏମ୍ଏ)କୁ କେନ୍ଦ୍ର ସରକାରଙ୍କ ପକ୍ଷରୁ ସୁଭାଷ ଚନ୍ଦ୍ର ବୋଷ୍ ଆପଦ ପ୍ରବନ୍ଧନ ପୁରସ୍କାର-୨୦୨୩ ପ୍ରଦାନ କରାଯିବ। ବିପର୍ଯ୍ୟୟ ବେଳେ ଉତ୍ସର୍ଗୀକୃତ ଅବଦାନ ପାଇଁ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଉକ୍ତ ପୁରସ୍କାର ପ୍ରଦାନ କରାଯିବ। ଏହି ପୁରସ୍କାର ବାବଦରେ ଓଏସ୍ଡିଏମ୍ଏକୁ ୫୧ ଲକ୍ଷ ଟଙ୍କା ସହ ମାନପତ୍ର ପ୍ରଦାନ କରାଯିବ।
ପ୍ରତ୍ୟେକ ବର୍ଷ ନେତାଜୀ ସୁଭାଷ ବୋଷ୍ଙ୍କ ଜୟନ୍ତୀ ଦିବସରେ ଉକ୍ତ ପୁରସ୍କାର ପାଇଁ ଘୋଷଣା କରାଯାଏ। ଏଥିପାଇଁ ମନୋନୀତ ସଂସ୍ଥାକୁ ୫୧ ଲକ୍ଷ ଟଙ୍କା କ୍ୟାଶ୍ ପୁରସ୍କାର ସହ ଏକ ପ୍ରମାଣପତ୍ର ଏବଂ ବ୍ୟକ୍ତିବିଶେଷଙ୍କ କ୍ଷେତ୍ରରେ ୫ ଲକ୍ଷ ଟଙ୍କା ଓ ସାର୍ଟିଫିକେଟ ପ୍ରଦାନ ବ୍ୟବସ୍ଥା ରହିଛି।
୧୯୯୯ ମହାବାତ୍ୟା ପରେ ଓଏସ୍ଡିଏମ୍ଏ ପ୍ରତିଷ୍ଠା କରାଯାଇଥିଲା। ଓଏସ୍ଡିଏମ୍ଏ ଓଡ଼ିଶା ଡିଜାଷ୍ଟର ରେସ୍ପନ୍ସ ଆକ୍ସନ ଫୋର୍ସ(ଓଡିଆରଏଫ୍) ଏର୍ଲି ଓ୍ବାର୍ନିଂ ସର୍ଭିସ ଫ୍ରେମ୍ଓ୍ବାର୍କ, ଲୋକମାନଙ୍କୁ ଆଗୁଆ ସୂଚନା ଦେବା ପାଇଁ ମୋବାଇଲ ଆପ୍ ‘ସତର୍କ’ ସହିତ ବହୁମୁଖୀ ବାତ୍ୟା ନିରୋଧକ ବ୍ୟବସ୍ଥା ଗ୍ରହଣ କରିଆସିଛି। ୨୦୧୪ରେ ବାତ୍ୟା ହୁଡୁହୁଡୁ, ୨୦୧୯ରେ ଫନି, ୨୦୨୦ରେ ଅମ୍ଫନ ଏବଂ ୨୦୨୦ରେ ଓଡ଼ିଶାରେ ବନ୍ୟା ଆଦି ପ୍ରାକୃତିକ ବିପର୍ଯ୍ୟୟ ସମୟରେ ଓଏସ୍ଡିଏମ୍ଏ ତ୍ୱରିତ ପଦକ୍ଷେପ ଗ୍ରହଣ କରିଆସିଛି। ଏହାଛଡ଼ା ଓଏସ୍ଡିଏମ୍ଏ ରାଜ୍ୟରେ ଲୋକମାନଙ୍କୁ ପ୍ରାକୃତିକ ବିପର୍ଯ୍ୟୟ ସମୟରେ ସୁରକ୍ଷିତ ସ୍ଥାନ ଯୋଗାଇଦେବାକୁ ସମୁଦ୍ର ଉପକୂଳରୁ ୧.୫ କିଲୋମିଟର ମଧ୍ୟରେ ୮୭୯ ବହୁମୁଖୀ ବାତ୍ୟା ଆଶ୍ରୟସ୍ଥଳୀ ନିର୍ମାଣ କରିଛି। ଏଥିସହ ସମୁଦ୍ରକୂଳିଆ ୩୮୧ ସୁନାମିପ୍ରବଣ ଗ୍ରାମକୁ ଚିହ୍ନଟ କରି ବିପର୍ଯ୍ୟୟ ପ୍ରସ୍ତୁତି ପାଇଁ ପଦକ୍ଷେପ ନେଇଛି। ଏସବୁ ଉଲ୍ଲେଖନୀୟ କାର୍ଯ୍ୟ ସକାଶେ ଓଏସ୍ଡିଏମ୍ଏକୁ କେନ୍ଦ୍ର ସରକାର ପୁରସ୍କୃତ କରିବାକୁ ଘୋଷଣା କରିଛନ୍ତି।
