ନୂଆଦିଲ୍ଲୀ,୧୮।୩ : ଆଦାନୀ ମାମଲାରେ ଜେପିସି ଗଠନ ଲାଗି ବିରୋଧୀ ଦଳର ଦାବି ଏବଂ ବ୍ରିଟେନରେ ରାହୁଲ ଗାନ୍ଧୀଙ୍କ ମନ୍ତବ୍ୟ ପାଇଁ ସେ କ୍ଷମା ମାଗିବା ଦାବି ନେଇ ସଂସଦ ଅଚଳ ହୋଇଯାଇଛି। ଅନ୍ୟପକ୍ଷରେ, ଏହି ପ୍ରସଙ୍ଗରେ କଂଗ୍ରେସ ନେତା ଜୟରାମ ରମେଶ କହିଛନ୍ତି ଯେ ଆଦାନୀ ମାମଲାରେ ଜେପିସି ଗଠନ ପାଇଁ ବିରୋଧୀଙ୍କ ଦାବି ସମ୍ପୂର୍ଣ୍ଣ ଯଥାର୍ଥ । ସଂସଦରେ ଅଚଳାବସ୍ଥା ଶେଷ କରିବାର ଉପାୟ ହେଉଛି ବିରୋଧୀଙ୍କ ଦାବି ମାନିନେବା। ଆଦାନୀ ପ୍ରସଙ୍ଗରେ ମିଳିତ ସଂସଦୀୟ କମିଟି ଗଠନ ପାଇଁ ୧୬ ବିରୋଧୀ ଦଳ ଏକାଠି ହେବା ଯୋଗୁ ସରକାରଙ୍କ ଅକଲଗୁଡୁମ ହୋଇ ଯାଇଛି। ଏହାକୁ ଏଡାଇବା ପାଇଁ ଶାସକ ଦଳ ବିଭିନ୍ନ କୌଶଳ ଅବଲମ୍ବନ କରୁଛି।
ବ୍ରିଟେନରେ ଦେଇଥିବା ମନ୍ତବ୍ୟ ଉପରେ ରାହୁଲ ଗାନ୍ଧୀଙ୍କ ଲୋକସଭାର ସଦସ୍ୟତାକୁ ରଦ୍ଦ କରିବାକୁ ଭାଜପା ଏମ୍ପି ନିଶିକାନ୍ତ ଦୁବେଙ୍କ ବିବୃତ୍ତିକୁ ଟାର୍ଗେଟ କରି ସେ କହିଛନ୍ତି, ଏହା ଦ୍ୱାରା ପ୍ରକୃତ ପ୍ରସଙ୍ଗରୁ ଭାଜପା ଭୟଭୀତ ହୋଇ ଅନ୍ୟ ଆଡେ ଧ୍ୟାନ ଆକର୍ଷଣ କରିବାର ପ୍ରୟାସ କରୁଛି।
କଂଗ୍ରେସର ମହିଳା ୱିଙ୍ଗ ଶନିବାର ଲୋକସଭାରେ ରାହୁଲ ଗାନ୍ଧୀଙ୍କ ବିରୋଧରେ ହୋଇଥିବା ଅପମାନଜନକ ମନ୍ତବ୍ୟକୁ ନେଇ ଭାଜପା ରାଷ୍ଟୀୟ ଅଧ୍ୟକ୍ଷ ଜେପି ନଡ୍ଡାଙ୍କ ବାସଭବନ ବାହାରେ ଧାରଣାରେ ବସିଥିଲେ। ଏହି ବିକ୍ଷୋଭ ସମୟରେ ୱିଙ୍ଗ ମୁଖ୍ୟ ଅମୃତା ଧାୱନଙ୍କ ସମେତ ଦିଲ୍ଲୀ ପ୍ରଦେଶ ମହିଳା କଂଗ୍ରେସର ଅନେକ ସଦସ୍ୟଙ୍କୁ ଗିରଫ କରାଯାଇଥିଲା। ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ଯେ ମୋତି ଲାଲ ନେହେରୁ ପ୍ଲେସରୁ ପ୍ରାୟ ୧୫ ଜଣ ମହିଳାଙ୍କୁ ଅଟକ ରଖାଯାଇଥିଲା। ପରେ ତାଙ୍କୁ ମୁକ୍ତ କରାଯାଇଥିଲା।
