କରାଚୀ/ବେଜିଂ,୧୪ା୮: ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ବୃହତ୍ ମହତ୍ୱାକାଂକ୍ଷୀ ଯୋଜନା ଚାଇନା-ପାକିସ୍ତାନ ଅର୍ଥନୈତିକ କରିଡର (ସିପିଇସି)କୁ ପାକିସ୍ତାନୀଙ୍କ ବିରୋଧ ବଢ଼ିବାରେ ଲାଗିଛି। ଋଣଭାରରେ ଛନ୍ଦି ହୋଇଯାଇଥିବା ପାକିସ୍ତାନର ଗ୍ବାଦର ବନ୍ଦରରୁ ଚାଇନାର ଉତ୍ତରପଶ୍ଚିମାଞ୍ଚଳ ସହର ଶିଞ୍ଜିଆନ୍କୁ ରାଜପଥ, ରେଳପଥ, ପାଇପ୍ଲାଇନ୍ ଓ ଅନ୍ୟ ଭିତ୍ତିଭୂମି ପ୍ରକଳ୍ପ ଜରିଆରେ ଯୋଡ଼ିବା ପାଇଁ ଉଦ୍ଦିଷ୍ଟ ଏହି ପ୍ରକଳ୍ପରେ ନିୟୋଜିତ ଚାଇନା ନାଗରିକମାନଙ୍କୁ ବେଲୁଚିସ୍ତାନରେ ଲଗାତର ଆକ୍ରମଣ କରାଯାଉଛି। ଏହିକ୍ରମରେ ରବିବାର
ବେଲୁଚିସ୍ତାନସ୍ଥିତ ବନ୍ଦର ସହର ଗ୍ବାଦରରେ ଚାଇନାର ୨୩ ଇଞ୍ଜିନିୟରଙ୍କୁ ନେଇ ଯାଉଥିବା ଏକ କାର୍କେଡ୍କୁ ବଲୁଚ୍ ଆତଙ୍କବାଦୀମାନେ ଟାର୍ଗେଟ କରିଛନ୍ତି। ଆକ୍ରମଣରେ ଜଡ଼ିତ ୩ ଆତଙ୍କବାଦୀ ନିହତ ହୋଇଛନ୍ତି। ସେମାନଙ୍କ ମଧ୍ୟରୁ ୨ ଆତଙ୍କବଦୀ ଆମତ୍ଘାତୀ ବିସ୍ଫୋରଣରେ ନିଜକୁ ଉଡ଼ାଇଦେଇଥିବା ସୂତ୍ରରୁ ପ୍ରକାଶ। ପ୍ରାକୃତିକ ସମ୍ପଦରେ ପରିପୂର୍ଣ୍ଣ ବେଲୁଚିସ୍ତାନର ସ୍ବାଧୀନତା ବା ବୃହତ୍ ସ୍ବାୟତ୍ତତା ଚାହୁଁଥିବା ବିଚ୍ଛିନ୍ନତାବାଦୀ ଉଗ୍ରପନ୍ଥୀ ସଙ୍ଗଠନ ବେଲୁଚିସ୍ତାନ ଲିବରେଶନ୍ ଆର୍ମି (ବିଏଲ୍ଏ) ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି। ବିଏଲ୍ଏର ମାଜିଦ୍ ବ୍ରିଗେଡ୍ ଚାଇନା ଇଞ୍ଜିନିୟରଙ୍କ କାର୍କେଡ୍କୁ ଟାର୍ଗେଟ କରି ୧୩ ଜଣଙ୍କୁ ହତ୍ୟା କରିଥିବା ସଙ୍ଗଠନ ପକ୍ଷରୁ ଜାରି ଏକ ବିବୃତିରେ କୁହାଯାଇଛି।
ଗ୍ବାଦରରେ ରବିବାର ପୂର୍ବାହ୍ନ ୯ଟାରେ ଚାଇନାର ଏକ କନ୍ଷ୍ଟ୍ରକ୍ଶନ କମ୍ପାନୀର ୨୩ ଇଞ୍ଜିନିୟରଙ୍କୁ ନେଇ ଯାଉଥିବା ୭ କାର୍କୁ ବଲୁଚ୍ ଆତଙ୍କବାଦୀମାନେ ଅତର୍କିତ ଆକ୍ରମଣ କରିଥିଲେ। ୨ ଘଣ୍ଟା ଧରି ଚାଲିଥିବା ବିସ୍ଫୋରଣ ଓ ଗୁଳିଗୋଳାର ଶବ୍ଦ ସହରକୁ ଥରାଇ ଦେଇଥିଲା। ଆକ୍ରମଣ ପରେ ସହରର ସବୁ ରାସ୍ତାକୁ ବନ୍ଦ କରି ଦିଆଯାଇଥିଲା। ୨ ଆତଙ୍କବାଦୀ ଆମତ୍ଘାତୀ ବିସ୍ଫୋରଣରେ ନିଜକୁ ଉଡ଼ାଇ ଦେଇଥିବାବେଳେ ପାକିସ୍ତାନୀ ସୁରକ୍ଷା ବଳର ଗୁଳିମାଡ଼ରେ ଜଣେ ଆତଙ୍କବାଦୀ ନିହତ ହୋଇଛନ୍ତି। ଗୁଳି ବିନିମୟ ବେଳେ ୨ ପାକିସ୍ତାନୀ ସୈନ୍ୟ ଆହତ ହୋଇଛନ୍ତି। ଚାଇନାର ଜଣେ ଇଞ୍ଜିନିୟର ସାମାନ୍ୟ ଆହତ ହୋଇଥିବାବେଳେ ଅନ୍ୟମାନେ ସୁରକ୍ଷିତ ଥିବା ଚାଇନାର ସରକାରୀ ଗଣମାଧ୍ୟମ ଗ୍ଲୋବାଲ ଟାଇମ୍ସରେ ରିପୋର୍ଟ ପ୍ରକାଶ ପାଇଛି।
ସିପିଇସିକୁ ବିରୋଧ କରି ଚାଇନା ନାଗରିକଙ୍କ ଉପରେ ଏହା ପ୍ରଥମ ଆକ୍ରମଣ ନୁହେଁ। ଏହା ପୂର୍ବରୁ ମଧ୍ୟ ବଲୁଚ୍ ଆତଙ୍କବାଦୀ ଅନେକ ଥର ସେମାନଙ୍କୁ ଟାର୍ଗେଟ କରିସାରିଲେଣି। ୨୦୨୧ ଏପ୍ରିଲରେ କ୍ୱେଟାସ୍ଥିତ ଚାଇନା ଦୂତାବାସ ନିକଟସ୍ଥ ଏକ ବିଳାସପୂର୍ଣ୍ଣ ହୋଟେଲରେ ଆମତ୍ଘାତୀ ବିସ୍ଫୋରଣ ଘଟାଯାଇଥିଲା। ଏଥିରେ ୪ ଜଣଙ୍କ ମୃତ୍ୟୁ ଘଟିଥିଲା। ସେହି ବର୍ଷ ଜୁଲାଇରେ ଚାଇନା ଶ୍ରମିକ ଓ ଇଞ୍ଜିନିୟରଙ୍କୁ ନେଇ ଯାଉଥିବା ଏକ ବସ୍କୁ ଟାର୍ଗେଟ କରାଯାଇଥିଲା। ଏହି ଆକ୍ରମଣରେ ୧୩ ଜଣ ନିହତ ହୋଇଥିଲେ।
