ପାଟଣାଗଡ଼,୩।୮: ବଲାଙ୍ଗୀର ଜିଲା ପାଟଣାଗଡ଼ ଏନଏସିରେ ବସବାସ କରୁଥିବା ବାସହୀନ ପରିବାରଙ୍କୁ ପୂର୍ବ ସରକାରଙ୍କ ସମୟରେ ମିଳିଥିବା ଘରଡିହ ଉପରେ ବର୍ତ୍ତମାନର ଡବଲ ଇଞ୍ଜିନ ଭାଜପା ସରକାର ହେଲିପ୍ୟାଡ ନିର୍ମାଣକୁ ବିରୋଧ କରିବା ସହ ରଦ୍ଦ ପଟ୍ଟାକୁ କାର୍ଯ୍ୟକ୍ଷମ କରି ନୂତନ ଘରଡିହ ପ୍ରଦାନ ଦାବିରେ ଭୂମିହୀନ ପରିବାର ବର୍ଗ ରବିବାର ଉପଜିଲାପାଳଙ୍କ ଜରିଆରେ ମୂଖ୍ୟମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ସ୍ଥାନୀୟ ବ୍ରହ୍ମପୁରା ରଥଭଟାଠାରେ ସମସ୍ତ ପଟ୍ଟାଧାରୀ ମାନେ ଦିନ ୧୦ଟାରେ ଏକତ୍ରିତ ହୋଇଥିଲେ। ପରେ ପୂର୍ବତନ ବିଧାୟକ ତଥା ବିଜେଡି ଜିଲା ସଭାପତି ସରୋଜ କୁମାର ମେହେରଙ୍କ ନେତୃତ୍ୱରେ ସେମାନେ ଏକ ଶୋଭାଯାତ୍ରାରେ ବାହାରି ସହରର ମୂଖ୍ୟରାସ୍ତା ଦେଇ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ । ସେଠାରେ ଏକ ପ୍ରତିବାଦ ସଭା ଆୟୋଜିତ ହୋଇଥିଲା । ସଭାରେ ପୂର୍ବତନ ବିଧାୟକ ମେହେର କେନ୍ଦ୍ର ଓ ରାଜ୍ୟର ଭାଜପା ଡବଲ ଇଞ୍ଜିନ ସରକାର ରାଜ୍ୟର ଗରିବ ଲୋକ ମାନଙ୍କୁ ପ୍ରତାରିତ କରି କେବଳ ଦେଶୀ ବିଦେଶୀ ବଡ଼ ବଡ଼ କମ୍ପାନୀଙ୍କ ସେବା କରୁଛି ବୋଲି କହିବା ସହ ଆଦାନୀ ଓ ଟାଟା ଭଳି ବଡ ବଡ କମ୍ପାନୀ ମାନଙ୍କୁ ଜମି ଯୋଗାଇଛନ୍ତି ବୋଲି ସରକାରଙ୍କୁ ସମାଲୋଚନା କରିଥିଲେ। ପାଟଣାଗଡ ଏନଏସିରେ ଭୂମିହୀନ ପରିବାରଙ୍କୁ ପୂର୍ବି ସରକାର ୨୦୨୨ ମସିହାରୁ ଦଖଲ ଦେଇ ୨୦୨୪ ମସିହାରେ ୬୨ରୁ ଊଦ୍ଧର୍ବ ଭୂମିହୀନ ପରିବାରଙ୍କୁ ଘରଡିହ ପଟ୍ଟା ପ୍ରଦାନ କରିଥିଲେ। ମାତ୍ର ବର୍ତ୍ତମାନ ର ଡବଳ ଇଞ୍ଜିନ ସରକାର ଉକ୍ତ ଭୂମିହୀନ ପରିବାରଙ୍କୁ ମିଳିଥିବା ପଟ୍ଟାକୁ ରଦ୍ଦ କରି ଏନଏସିର ବେହେରାବନ୍ଧ ପାଟଣାଗଡ଼ ଥାନା ଖାତା ନଂ ୧୨୦କୁ ଫେରାଇ ନେଇଛନ୍ତି । ଏପରିକି, ଘରଡିହ ପଟ୍ଟାଧାରୀମାନେ ପୂର୍ବରୁ ମାଲଗୁଜାରୀ ମଧ୍ୟ ପୈଠ କରି ଆସୁଥିବାବେଳେ ବର୍ତ୍ତମାନ ତାଙ୍କ ପଟ୍ଟାକୁ ରଦ୍ଦ କରାଯାଇଛି ବୋଲି ସେମାନେ ଅଭିଯୋଗ କରିଛନ୍ତି । ଯେହେତୁ ପ୍ରସ୍ତାବିତ ସାଲେପାଲି ଗ୍ରାଫାଇଟ ମାଇନିଙ୍ଗ ଖଣିକୁ କେନ୍ଦ୍ର ଓ ରାଜ୍ୟ ସରକାର ମିଶି ତାମିଲନାଡୁ ରାଜ୍ୟର ଏକ ଘରୋଇ କମ୍ପାନୀକୁ ଉକ୍ତ ଖଣି ନିଲାମରେ ଦେଇଛନ୍ତି। ତେଣୁ ସେମାନଙ୍କ ଓ ମନ୍ତ୍ରୀମାନଙ୍କ ଯାତାୟାତକୁ ଦୃଷ୍ଟି ରଖି ବର୍ତ୍ତମାନର ଡବଳ ଇଞ୍ଜିନ ସରକାର ବାସହୀନ ପରିବାରଙ୍କୁ ମିଳିଥିବା ଘରଡିହ ଉପରେ ବର୍ତ୍ତମାନ ସେଠାରେ ହେଲିପ୍ୟାଡ ନିର୍ମାଣ କରିବାକୁ ଯାଉଛନ୍ତି। ଏନେଇ କୌଣସି ଅବଗତ କିମ୍ବା ଜନଶୁଣାଣି ହୋଇ ନ ଥିବା ବେଳେ ତହସିଲଦାର ମଧ୍ୟ ଅଜ୍ଞ ଥିବା ଏକ ଲଜ୍ୟାକର କଥା ବୋଲି ମେହେର ତାଙ୍କ ଅଭିଭାଷଣରେ କହିଥିଲେ । ପରେ ଉପଜିଲାପାଳଙ୍କ ଅନୁପସ୍ଥିତ ଯୋଗୁ ସହକାରୀ ଜିଲାପାଳ ମାନ ସଫିଲ କେରକେଟା ଆନ୍ଦୋଳନ ସ୍ଥଳକୁ ଆସି ଦାବିପତ୍ର ଗ୍ରହଣ କରିଥିଲେ। ୭ ଦିନ ଭିତରେ ଦାବିପୂରଣ ନ ହେଲେ ବାସହୀନ ପରିବାରଙ୍କ ସହ ବିଜୁପରିବାର ରାଜରାସ୍ତାକୁ ଓହ୍ଲାଇବେ ବୋଲି ପୂର୍ବତନ ବିଧାୟକ ମେହେର ଚେତାବନୀ ଦେଇଛନ୍ତି। ଏଥିରେ ଆଇନଜୀବୀ ଇନ୍ଦୁ ଭୂଷଣ ଠାକୁର, ଜିଲାପରିଷଦ ସଦସ୍ୟା କସ୍ତୁରୀ ସେଠ,ଏନଏସି ଅଧ୍ୟାକ୍ଷା ମାନସୀ ବିଶାଳ, ବ୍ଳକ ଉପାଧ୍ୟକ୍ଷା ଲକ୍ଷ୍ମୀ ମାଝୀ, ସମିତି ସଭ୍ୟ ସଂଘ ସଭାପତି ଗୋବିନ୍ଦ ମେହେର, ସୁଜିତ ମେହେର,ପ୍ରଦିପ ପୁରୋହିତ, ମନବୋଧ ବରିହା , ପ୍ରକାଶ ସିଂ ,ସୁକୁମାର ବାରିକଙ୍କ ସହ ଶତାଧିକ ଭୂମିହୀନ ହିତାଧିକାରୀ ମାନେ ଉପସ୍ଥିତ ଥିଲେ।
