ଓ୍ବାର୍ସା,୩ା୧୧: ଭ୍ରୂଣଗତ ତ୍ରୁଟି କାରଣରୁ ଗର୍ଭପାତ ଅସାମ୍ବିଧାନିକ ବୋଲି ପୋଲାଣ୍ଡର ଏକ ଅଦାଲତ ରାୟ ଦେବା ପରେ ଏହା ବିରୋଧରେ ସେଠାରେ ବିକ୍ଷୋଭ ଜୋର୍ଦାର ହୋଇଛି। ରାଜଧାନୀ ଓ୍ବାର୍ସାରେ ଗତ ଶୁକ୍ରବାର ଲକ୍ଷାଧିକ ମହିଳା ଏକାଠି ହୋଇ ଦୀର୍ଘ ୭ ଘଣ୍ଟା ଧରି ପୋଲାଣ୍ଡ ଶାସକ ଲ ଆଣ୍ଡ ଜଷ୍ଟିସ୍ ପାର୍ଟି ବିରୋଧରେ ବିକ୍ଷୋଭ ପ୍ରଦର୍ଶନ କରିଥିଲେ। ସରକାର ଅସୁସ୍ଥ ଓ ବିକାରଗ୍ରସ୍ତ ଶିଶୁ ଜନ୍ମ ଦେବା ଲାଗି ବାଧ୍ୟ କରାଉଛନ୍ତି ବୋଲି ବିକ୍ଷୋଭରେ ସାମିଲ ହୋଇଥିବା ଜଣେ ମହିଳା କହିଛନ୍ତି।
ଗର୍ଭସ୍ଥ ଶିଶୁ ଅଙ୍ଗରେ ତ୍ରୁଟି ସତ୍ତ୍ୱେ ଗର୍ଭପାତ ଅସାମ୍ବିଧାନିକ ବୋଲି ଗତ ୨୨ ତାରିଖରେ ପୋଲାଣ୍ଡର କନ୍ଷ୍ଟିଚ୍ୟୁଶନାଲ ଟ୍ରିବ୍ୟୁନାଲ କହିଥିଲେ। ଏହାକୁ ସାରା ଦେଶରେ ପ୍ରବଳ ବିରୋଧ କରାଯାଉଛି। ମହିଳାମାନେ ଉକ୍ତ ଆଇନ ବିରୋଧରେ ଏକପ୍ରକାର ଯୁଦ୍ଧ ଡାକରା ଦେଇଛନ୍ତି।
ପୋଲାଣ୍ଡ ସ୍ବାସ୍ଥ୍ୟ ମନ୍ତ୍ରଣାଳୟ ତଥ୍ୟ ଅନୁଯାୟୀ ପ୍ରତିବର୍ଷ ସେଠାରେ ୧୧୦୦ ଆଇନସମ୍ମତ ଗର୍ଭପାତ ମଧ୍ୟରୁ ୯୮ ପ୍ରତିଶତ ହେଉଛି ଭ୍ରୂଣଗତ ତ୍ରୁଟିଜନିତ। ତେଣୁ ନୂଆ ରାୟ ଅନୁଯାୟୀ ସେଠାରେ ଗର୍ଭପାତ ସମ୍ପୂର୍ଣ୍ଣ ବନ୍ଦ ହେବାକୁ ଯାଉଛି। ଏବେ ସେ ଏକବିଂଶ ଶତାବ୍ଦୀରେ ଏବଂ ୟୁରୋପରେ ଅଛନ୍ତି ବୋଲି ଅନୁଭବ କରିପାରୁ ନ ଥିବା ମାଜା ଟୋବିସ୍ ନାମ୍ନୀ ଜଣେ ମହିଳା କହିଛନ୍ତି। ପୂର୍ବରୁ ୨୦୧୬ରେ ଗର୍ଭପାତ ନିଷିଦ୍ଧ ନେଇ ଅଣାଯାଇଥିବା ଚିଠା ଆଇନକୁ ଜୋର୍ଦାର ବିରୋଧ କରାଯାଇଥିଲା। ସେତେବେଳେ ବହୁସଂଖ୍ୟାରେ ମହିଳା କଳାବସ୍ତ୍ର ପରିଧାନ କରି ରାସ୍ତାକୁ ଓହ୍ଲାଇଥିଲେ।
