ନୂଆଦିଲ୍ଲୀ,୧୯ା୧୨: ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଅଧିନିୟମ (MGNREGA) ସ୍ଥାନରେ ଆସିଥିବା ‘ବିକଶିତ ଭାରତ ଗ୍ୟାରେଣ୍ଟି ଫର୍ ରୋଜଗାର ଏବଂ ଆଜୀବିକା ମିଶନ (ଗ୍ରାମୀଣ)’ (VB-G RAM G) ବିଲ୍ ସଂସଦରେ ଗୃହୀତ ହେବା ପରେ ବିରୋଧୀ ଦଳର ନେତାମାନେ ଗୁରୁବାର ରାତିରେ ସଂସଦ ପରିସରରେ ୧୨ ଘଣ୍ଟିଆ ଧାରଣା ଦେଇଛନ୍ତି।
ରାଜ୍ୟସଭାରେ ଟିଏମସିର ଉପନେତ୍ରୀ ସାଗରିକା ଘୋଷ କେନ୍ଦ୍ର ସରକାରଙ୍କୁ ଏହି ‘ଗରିବ ବିରୋଧୀ, ଜନ ବିରୋଧୀ’ ବିଲକୁ ‘ବୁଲଡୋଜ୍’ କରି ପାସ୍ କରାଇଥିବାର ଅଭିଯୋଗ କରିଛନ୍ତି। ସେ କହିଛନ୍ତି, ଏହି ବିଲ୍ ଦ୍ୱାରା MGNREGA କୁ ହଟାଇ ଦିଆଯାଇଛି, ଯାହା ଭାରତର ଗରିବ ଏବଂ ମହାତ୍ମା ଗାନ୍ଧୀଙ୍କ ପାଇଁ ଏକ ଅପମାନ।
କଂଗ୍ରେସର ସାଧାରଣ ସମ୍ପାଦକ ରଣଦୀପ ସିଂ ସୂର୍ଯ୍ୟେୱାଲା ଏହାକୁ ଦେଶର ଶ୍ରମିକଙ୍କ ପାଇଁ ଏକ ‘ଦୁଃଖଦ ଦିନ’ ବୋଲି କହିବା ସହ ମୋଦି ସରକାରଙ୍କୁ ‘କୃଷକ ବିରୋଧୀ ଏବଂ ଗରିବ ବିରୋଧୀ’ ବୋଲି ଅଭିଯୋଗ କରିଛନ୍ତି। ସେ କହିଛନ୍ତି, MGNREGA କୁ ଉଚ୍ଛେଦ କରି ବିଜେପି ସରକାର ୧୨ କୋଟି ଲୋକଙ୍କ ଜୀବିକା ଉପରେ ଆକ୍ରମଣ କରିଛନ୍ତି।
ଟିଏମସିର ସାଗରିକା ଘୋଷ ଦାବି କରିଛନ୍ତି ଯେ ଏହି ଗୁରୁତ୍ୱପୂର୍ଣ୍ଣ ବିଲକୁ ବିଚାର ପାଇଁ ସିଲେକ୍ଟ କମିଟିକୁ ପଠାଯିବା ଉଚିତ ଥିଲା। କିନ୍ତୁ ସରକାର ଏହା ନ କରି ଗଣତନ୍ତ୍ରର ‘ହତ୍ୟା’ କରିଛନ୍ତି।
ବିରୋଧୀ ଦଳର ନେତାମାନେ ରାଜ୍ୟସଭାରେ ମଧ୍ୟରାତ୍ରି ପରେ ଏହି ବିଲ୍ ପାସ୍ ହେବା ପରେ ନିଜର ବିରୋଧ ଜାରି ରଖିଥିଲେ ଏବଂ ଏହି “କଳା ଆଇନ” ବିରୁଦ୍ଧରେ ଦେଶବ୍ୟାପୀ ରାଜରାସ୍ତାକୁ ଓହ୍ଲାଇବେ ବୋଲି ଘୋଷଣା କରିଛନ୍ତି।
