ନୂଆଦିଲ୍ଲୀ,୧୨ା୨: ଲୋକ ସଭା ବାଚସ୍ପତି ଓମ୍ ବିର୍ଲାଙ୍କ ବିରୋଧରେ ବିପକ୍ଷ ସଦସ୍ୟମାନେ ଅନାସ୍ଥା ପ୍ରସ୍ତାବ ଆଗତ କରିବା ପାଇଁ ଦେଇଥିବା ନୋଟିସ ତ୍ରୁଟିଯୁକ୍ତ। ନୋଟିସ ଡ୍ରାଫ୍ଟିଙ୍ଗ୍ରେ ଏଭଳି ଭୁଲ୍ ରହିଛି ଯେ ତାହା ଖାରଜ ହୋଇଯାଇପାରେ। ତେଣୁ ବାଚସ୍ପତି ନିଜ ବିରୋଧରେ ଆଗତ ନୋଟିସରେ ଥିବା ତ୍ରୁଟିବିଚ୍ୟୁତି ସୁଧାରିବା ପାଇଁ ପରାମର୍ଶ ଦେଇଛନ୍ତି।
ରାଜସ୍ଥାନ କୋଟା ସଂସଦୀୟ ଆସନର ଭାଜପା ଏମ୍ପି ଓମ୍ ବିର୍ଲା ଶାସକ ପକ୍ଷକୁ ସୁହାଇଲା ଭଳି କାର୍ଯ୍ୟ କରୁଥିବା ଅଭିଯୋଗ ଆଣି କଂଗ୍ରେସ ସମେତ ବିରୋଧୀ ଦଳଗୁଡ଼ିକ ତାଙ୍କୁ ବାଚସ୍ପତି ପଦରୁ ହଟାଇବା ପାଇଁ ଉଦ୍ୟମ ଚଳାଇଛନ୍ତି। ଏହି କ୍ରମେ ୧୧୮ ବିରୋଧୀ ସଦସ୍ୟଙ୍କ ଦସ୍ତଖତ ସମ୍ୱଳିତ ନୋଟିସକୁ ଲୋକ ସଭା ସେକ୍ରେଟାରି ଜେନେରାଲ ଉତ୍ପଳ କୁମାର ସିଂଙ୍କ ନିକଟରେ ମଙ୍ଗଳବାର ଦାଖଲ କରାଯାଇଥିଲା। ପରେ ବିରୋଧୀ ସଦସ୍ୟମାନେ ଏହାକୁ ପ୍ରତ୍ୟାହାର କରିନେଇଥିଲେ। ଏଥିସହ ତାରିଖ ସଂଶୋଧନ କରିବା ପରେ ଅନ୍ୟ ଏକ ନୋଟିସ ଦେଇଥିଲେ। ଉକ୍ତ ନୋଟିସରେ ୨୦୨୬ ପରିବର୍ତ୍ତେ ୨୦୨୫ ଫେବୃଆରୀ ଉଲ୍ଲେଖ କରାଯାଇଥିଲା। ଏହି କାରଣରୁ ଉକ୍ତ ନୋଟିସ ଖାରଜ ହେବାର ଯଥେଷ୍ଟ ଆଶଙ୍କା ରହିଛି। ତେବେ ବାଚସ୍ପତି ଏହା ଜାଣିବା ପରେ ତାକୁ ସୁଧାରି ପୁଣି ଥରେ ନୋଟିସ ଦାଖଲ କରିବାକୁ ସେକ୍ରେଟାରି ଜେନେରାଲଙ୍କୁ ନିର୍ଦ୍ଦେଶ ଦେଇଥିଲେ। ସଂଶୋଧିତ ନୋଟିସ ମିଳିବା ପରେ ନିୟମାନୁସାରେ ତ୍ୱରିତ ପଦକ୍ଷେପ ନିଆଯିବ ବୋଲି ସୂତ୍ରରୁ ପ୍ରକାଶ। ସମ୍ୱିଧାନର ଅନୁଚ୍ଛେଦ ୯୪(ସି) ଅନୁଯାୟୀ ବିଭିନ୍ନ ବିରୋଧୀ ଦଳ ତରଫରୁ ଲୋକ ସଭାରେ କଂଗ୍ରେସ ଉପନେତା ଗୌରବ ଗୋଗୋଇ, ମୁଖ୍ୟ ହୁଇପ୍ କେ. ସୁରେଶ ଏବଂ ହୁଇପ୍ ମହମ୍ମଦ ଜାଓ୍ୱେଦ ନିମ୍ନ ସଦନର ମହାସଚିବ ଉତ୍ପଳ କୁମାର ସିଂଙ୍କ ନିକଟରେ ନୋଟିସ ଦାଖଲ କରିଛନ୍ତି। ଉକ୍ତ ନୋଟିସରେ କଂଗ୍ରେସ, ଡିଏମ୍କେ, ସମାଜବାଦୀ ପାର୍ଟି, ବାମଦଳ, ଆର୍ଜେଡି, ଶିବସେନା(ୟୁବିଟି) ଏବଂ ଏନ୍ସିପି-ଏସ୍ପି ସମେତ ବିରୋଧୀ ଦଳଗୁଡ଼ିକର ଏମ୍ପିମାନେ ସ୍ୱାକ୍ଷର କରିଛନ୍ତି। ତେବେ ବିର୍ଲା ନୈତିକତା ଦୃଷ୍ଟିରୁ ତାଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଗତ ନ ହେବା ପର୍ଯ୍ୟନ୍ତ ନିଜ ଆସନରେ ବସିବେ ନାହିଁ ବୋଲି କହିଛନ୍ତି। ମାର୍ଚ୍ଚ ୯ରେ ଦ୍ୱିତୀୟ ପର୍ଯ୍ୟାୟ ବଜେଟ ଅଧିବେଶନ ପାଇଁ ସଂସଦ ପୁନର୍ୱାର ଖୋଲିବା ପରେ ଅନାସ୍ଥା ଉପରେ ବିଚାର କରାଯାଇପାରେ ବୋଲି ଜଣେ ଅଧିକାରୀ ସୂଚନା ଦେଇଛନ୍ତି।
ଇତିମଧ୍ୟରେ ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ କହିଛନ୍ତି, ୨୦ରୁ ୨୫ କଂଗ୍ରେସ ଏମ୍ପି ବାଚସ୍ପତିଙ୍କ ଚାମ୍ୱରକୁ ଯାଇ ତାଙ୍କୁ ଦୁର୍ୱ୍ୟବହାର କରିଛନ୍ତି। ଏପରି କି କେ.ସି. ବେଣୁଗୋପାଳ ଓ ପ୍ରିୟଙ୍କା ଗାନ୍ଧୀ ଭଦ୍ରା ସେଠାରେ ଉପସ୍ଥିତ ଥାଇ ସବୁ ଦେଖୁଥିଲେ। ସେମାନେ କଂଗ୍ରେସ ସଦସ୍ୟମାନଙ୍କୁ ଏଥିରୁ ବାରଣ କରି ନ ଥିଲେ। ବାଚସ୍ପତି ଚାହିଁଥିଲେ ସେମାନଙ୍କୁ ଗୃହରୁ ନିଲମ୍ୱନ କରିପାରିଥାନ୍ତେ ବୋଲି ରିଜିଜୁ କହିଛନ୍ତି।
