ଭୁବନେଶ୍ୱର, ୨୭।୧୧(ବ୍ୟୁରୋ): ରାଜ୍ୟର ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ନେଇ ବିଜେଡି-ଭାଜପା ମଧ୍ୟରେ ରାଜନୈତିକ ଲଢେଇ ଜୋର୍ ଧରିବାରେ ଲାଗିଛି। ଗୁରୁବାର ବିଳମ୍ବିତ ରାତିରେ ଭୁବନେଶ୍ୱର ଏମ୍ପି ଅପରାଜିତା ଷଡଙ୍ଗୀଙ୍କୁ ଆଚାର୍ଯ୍ୟ ବିହାରରେ ବିଜେଡି କର୍ମୀମାନେ ଘେରି ବିରୋଧ କରିଥିଲେ। ଏହାପରେ ୪ ଘଣ୍ଟା ପରେ ପୋଲିସ ଡିସିପି ଉମାଶଙ୍କର ଦାଶଙ୍କ ସହାୟତାରେ ଅପରାଜିତାଙ୍କୁ ସେଠାରୁ ଉଦ୍ଧାର କରାଗଲା। ଏହି ଘଟଣାକୁ ନେଇ ବର୍ତ୍ତମାନ ବିଜେଡି-ଭାଜପା ମଧ୍ୟରେ ରାଜନୈତିକ ଲଢେଇ ଜୋର୍ ଧରିଛି। ଶହୀଦ ନଗର ପୋଲିସ ଏହି ଘଟଣାରେ ସାଇନ୍ସପାର୍କ ନିକଟସ୍ଥ ବସ୍ତିର ୨ଜଣଙ୍କୁ ଗିରଫ କରିଥିବା ଜଣାପଡିଛି। ସେହିପରି ଭାଜପା ଭୁବନେଶ୍ୱର ଜିଲା କମିଟି ପକ୍ଷରୁ ପ୍ରତିବାଦ କରାଯାଇଥିବା ବେଳେ ପୋଲିସ ସହ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଛି।
ଖବରଦାତା ସମ୍ମିଳନୀ ଜରିଆରେ ଅପରାଜିତା କହିଛନ୍ତି ଯେ, ସେ ସୁରକ୍ଷିତ ନୁହନ୍ତି। ମହିଳାଙ୍କ କ୍ଷେତ୍ରରେ ହେଉଥିବା ଅପରାଧ କ୍ଷେତ୍ରରେ ଓଡିଶାକୁ ନେଇ ଦେଶରେ ବିଜେଡି ଏକ ନମ୍ବର କରିବାକୁ ଚାହୁଁଛନ୍ତି। ଆକ୍ରମଣ ଘଟଣା ପାଇଁ ସେ ମୁଖ୍ୟମନ୍ତ୍ରୀ ଦାୟୀ ବୋଲି କହିଛନ୍ତି। ଭାଜପା ରାଜ୍ୟ ସଭାପତି ସମୀର ମହାନ୍ତି କହିଛନ୍ତି, ଶାସକ ବିଜେଡି ଦ୍ୱାରା ଅପରାଜିତା ଷଡଙ୍ଗୀଙ୍କୁ କରାଯାଇଥିବା ସଙ୍ଘବଦ୍ଧ ଆକ୍ରମଣ ଘଟଣା ଅତ୍ୟନ୍ତ ଲଜ୍ଜାଜନକ। ବିଜେଡି ଶାସନରେ ମହିଳାମାନେ ବିପଦରେ ଅଛନ୍ତି। ଏ କଥା ମହିଳା ସାଂସଦଙ୍କୁ ଆକ୍ରମଣ ଘଟଣାରୁ ସ୍ପଷ୍ଟ ପ୍ରମାଣିତ ହୋଇଛି। ଭାଜପା ସଭାପତିଙ୍କ ଖବରଦାତା ସମ୍ମିଳନୀର ଜବାବ୍ରେ ବିଜେଡି ମୁଖପାତ୍ର ଲେନିନ ମହାନ୍ତି କହିଛନ୍ତି, ବିଭିନ୍ନ ସମସ୍ୟା ନେଇ ଭୁବନେଶ୍ୱର ଏମ୍ପିଙ୍କୁ କିଛି ପ୍ରଶ୍ନ ପଚାରିବାକୁ ସ୍ଥାନୀୟ ବସ୍ତିର କେତେଜଣ ମହିଳାମାନେ ଯାଇଥିଲେ। ହେଲେ ସେମାନଙ୍କୁ ସାଂସଦଙ୍କ ସୁରକ୍ଷା ବାହିନୀ ଯେଉଁଭଳି ଆକ୍ରମଣ ଓ ଅସଦାଚରଣ କଲେ ତାହାକୁ ଯେତେ ନିନ୍ଦା କଲେ ବି କମ୍ ହେବ। ଏଭଳି କାର୍ଯ୍ୟକୁ କେଉଁ ସ୍ବାର୍ଥରେ ଭାଜପା ସଭାପତି ସମର୍ଥନ କରୁଛନ୍ତି। ପୂର୍ବରୁ ତାଙ୍କ ନିଜ ଦଳର କର୍ମୀମାନେ ମଧ୍ୟ ଅପରାଜିତାଙ୍କ ଏହି ଘରୋଇ ସୁରକ୍ଷା ଦାୟିତ୍ୱରେ ଥିବା ଗୁଣ୍ଡାମାନଙ୍କ ଆକ୍ରମଣରୁ ବର୍ତ୍ତି ନଥିବା ଲେନିନ୍ କହିଛନ୍ତି ା ତେବେ ଭାଜପାର ଭୁବନେଶ୍ୱର ଜିଲା ସଭାପତି ବାବୁ ସିଂଙ୍କ ନେତୃତ୍ୱରେ ଶୁକ୍ରବାର ଏକ ବିଶାଳ ରାଲି ମାଷ୍ଟରକ୍ୟାଣ୍ଟିନ ଛକଠାରେ ଏକାଠି ହୋଇ ଏହାର ପ୍ରତିବାଦ କରିଥିବା ବେଳେ ପୋଲିସ ସେମାନଙ୍କୁ ଅଟକାଇବାରୁ ମୁହାଁମୁହିଁ ସ୍ଥିତି ସୃଷ୍ଟି ହୋଇଥିଲା।
