ଛତ୍ରପୁର,୨ା୮(ସନ୍ତୋଷ ପାଢ଼ୀ): ତିନି ଦିିନିଆ ଗଞ୍ଜାମ ଗସ୍ତରେ ଆସିଛନ୍ତି ଓଡ଼ିଶା ରାଜ୍ୟ ଖାଦ୍ୟ ଆୟୋଗର ଅଧ୍ୟକ୍ଷ ଅବନୀକାନ୍ତ ସାହୁ। ବୁଧବାର ପ୍ରଥମ ଦିନରେ ଛତ୍ରପୁରରେ ପହଞ୍ଚିବା ପରେ ଜିଲା ପରିଷଦ ସମ୍ମିଳନୀ କକ୍ଷରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଜିଲାପାଳଙ୍କ ସମେତ ଯୋଗାଣ ବିଭାଗର ଅଧିକାରୀମାନଙ୍କ ସହ ଅନ୍ୟ ବିଭାଗର ଅଧିକାରୀ ଓ କର୍ମଚାରୀ ସାମିଲ ହୋଇଥିଲେ। ଦିନ ମଜୁରୀ କାମ କରୁଥିବା ମହିଳାଙ୍କ ଥିବା ୬ ମାସରୁ ୩ ବର୍ଷ ପର୍ଯ୍ୟନ୍ତ ଛୁଆମାନଙ୍କ ଯତ୍ନ ନେବା ପାଇଁ କେନ୍ଦ୍ର ଖୋଲିବାକୁ ଆୟୋଗର ଅଧ୍ୟକ୍ଷ ବୈଠକରେ ପରାମର୍ଶ ଦେଇଛନ୍ତି। କାମ କରିବାକୁ ଯିବା ପୂର୍ବରୁ ପିଲାମାନଙ୍କୁ ତାଙ୍କ ମା’ମାନେ ଉକ୍ତ କେନ୍ଦ୍ରରେ ଛାଡ଼ି ଏବଂ ଅପରାହ୍ନରେ କାମରୁ ଫେରିବା ପରେ ଉକ୍ତ ପିଲାଙ୍କୁ ସେଠାରୁ ଘରକୁ ନେବେ। ଶିକ୍ଷା, ସ୍ବାସ୍ଥ୍ୟ ଓ ଖାଦ୍ୟ ଆଦିର ବ୍ୟବସ୍ଥା ଉକ୍ତ କେନ୍ଦ୍ରରେ କରାଯିବ। ଫଳରେ ଶିଶୁମାନଙ୍କର ସ୍ବାସ୍ଥ୍ୟ ଭଲ ରହିବା ସହ କାମକୁ ଯାଉଥିବା ମହିଳାମାନଙ୍କର ମଧ୍ୟ ସୁବିଧା ହୋଇପାରିବ। କେନ୍ଦୁଝର ଜିଲାରେ ଏହି ବ୍ୟବସ୍ଥା ହୋଇଥିବା ସେ ସୂଚନା ଦେଇଥିଲେ। ଜିଲାର ସମସ୍ତ ଡିଲର ପଏଣ୍ଟରେ ସିସିଟିଭି କ୍ୟାମେରା ଲଗାଯିବ, ଏହାସହ ଯେଉଁଠାରେ ଏସ୍ଏଚ୍ଜି ମହିଳାମାନେ ନିଜ ଅଞ୍ଚଳର ଲୋକଙ୍କୁ ରାଶନ ବଣ୍ଟନ ନିମନ୍ତେ ଚାହିଁବେ ସେଠାରେ ପ୍ରାଇଭେଟ ଡିଲରମାନଙ୍କୁ ବାହାର କରାଯାଇ ସମ୍ପୃକ୍ତ ମହିଳାମାନଙ୍କୁ ପ୍ରଦାନ କରାଯିବ ବୋଲି ସେ କହିଥିଲେ।
