ଆଚାର୍ଯ୍ୟ ଚାଣକ୍ୟଙ୍କ ନୀତିକୁ ଆଜିବି ଲୋକେ ଆପଣାଇଥାନ୍ତି। ଏହାକୁ ଅନୁସରଣ କରି ଜୀବନକୁ ସହଜ ଏବଂ ସରଳ କରିହେବ। ଯଦିଓ ନୀତିଗୁଡ଼ିକୁ ଆପଣାଇବା କଷ୍ଟକର, ହେଲେ ଯିଏ ଏହାକୁ ଗ୍ରହଣ କରିନିଏ ସେ ସଫଳ ଏବଂ ସୁଖୀ ହୋଇଥାଏ। ସେହିଭଳି ଚାଣକ୍ୟ ଏକ ନୀତିରେ କହିଛନ୍ତି, ବ୍ୟକ୍ତି ଯଦି କିଛି ଜିନିଷ ବିଷୟରେ ଦ୍ୱିଧାବୋଧ କରନ୍ତି କିମ୍ବା ଲଜ୍ଜିତ ଅନୁଭବ କରନ୍ତି ତେବେ ସେ କେବେହେଲେ ସୁଖୀ ଏବଂ ସଫଳ ହେବେ ନାହିଁ। ଏପରିକି ସେମାନଙ୍କର ଭବିଷ୍ୟତ ମଧ୍ୟ ବିପଦରେ ପଡ଼ିଥାଏ। ଜାଣନ୍ତୁ ସେସବୁ ବିଷୟରେ:-
धनधान्यप्रयोगेषु विद्यासङ्ग्रहणेषु च ।
आहारे व्यवहारे च त्यक्तलज्ज: सुखी भवेत।।
ଏହି ଶ୍ଳୋକରେ ଚାଣକ୍ୟ କହିଛନ୍ତି ଧନ ସମ୍ବନ୍ଧୀୟ ମାମଲାରେ ବ୍ୟକ୍ତିକୁ କେବେହେଲେ ଲଜ୍ଜା ଅନୁଭବ କରିବା ଉଚିତ ନୁହେଁ। ଯଦି ଏପରି ହୋଇଥାଏ ତେବେ ଧନହାନୀର ସମ୍ଭାବନା ଥାଏ। ଏଣୁ ଟଙ୍କାପଇସା ମାମଲାରେ କେବେ ବି ଲାଜ କରନ୍ତୁ ନାହିଁ।
ଚାଣକ୍ୟ କୁହନ୍ତି କାହାଠାରୁ କିଛି ଶିଖିବା ସମୟରେ ଲଜ୍ଜିତ ଅନୁଭବ କରିବା ଉଚିତ ନୁହେଁ। କାରଣ ଯଦି ବ୍ୟକ୍ତିଟିଏ କିଛି ଶିଖେ, ଜ୍ଞାନ ଆହରଣ କରେ ତେବେ ତା ଭବିଷ୍ୟତକୁ ସେ ମଜଭୂତ କରିଥାଏ। ଏଣୁ ଜଣେ ଶିଷ୍ୟକୁ ଗୁରୁଙ୍କଠାରୁ କୌଣସି ପ୍ରଶ୍ନର ଉତ୍ତର ଜାଣିବାକୁ ଦ୍ୱିଧା ଅନୁଭବ କରିବା ଉଚିତ ନୁହେଁ।
ଚାଣକ୍ୟ କୁହନ୍ତି ଜଣେ ବ୍ୟକ୍ତିକୁ ଖାଇବା ପିଇବାରେ କେବେ ବି ସଙ୍କୋଚ କରିବା ଉଚିତ ନୁହେଁ। ଯଦି ଭୋକିଲା ଥାଇ ବି ଖାଇବା ଲାଗି ଦ୍ୱିଧା ଅନୁଭବ କରୁଛ, ତେବେ ତାହା ଠିକ୍ ନୁହେଁ। ଏପରି କରିବା ଅନୁଚିତ। ଭୋକକୁ ମାରିବା ଦ୍ୱାରା ସ୍ବାସ୍ଥ୍ୟ ଉପରେ ଖରାପ ପ୍ରଭାବ ପଡ଼ିଥାଏ।
ଶେଷରେ ଚାଣକ୍ୟ କହିଛନ୍ତି, ଯେଉଁ କାମ ଜଣେ କରୁଥାନ୍ତୁ ନା କାହିଁକି, ଜଣେ ଏଥିନେଇ ଲଜ୍ଜା ଅନୁଭବ କରିବା ଅନୁଚିତ। କାର୍ଯ୍ୟରେ ଅସୁବିଧା କିମ୍ବା ସମସ୍ୟାର ସମ୍ମୁଖୀନ ହେଲେ, ଲୋକଙ୍କୁ ପଚାରିବା ଉଚିତ। ଫଳରେ ସମାଧାନର ବାଟ ବାହାରିବ। ଯଦି ଏଭଳି ନ କରନ୍ତି ତେବେ ଆପଣ ଅସୁବିଧାରେ ପଡ଼ିପାରନ୍ତି।
