ଭଞ୍ଜନଗର, ୩୧।୧୦(ବାବୁଲା ପ୍ରଧାନ): ଗଞ୍ଜାମ ଓ କନ୍ଧମାଳ ଜିଲା ସୀମାନ୍ତବର୍ତ୍ତୀ ଡାଙ୍ଗେଶୀ ଏବଂ ଗିଡ଼ିପାବାଲି ଅଞ୍ଚଳରେ ଗୁରୁବାର ରାତିରେ ଘଟିଥିବା ଭୟାବହ ବନ୍ୟା ଓ ଭୂସ୍ଖଳନ ଯୋଗୁ ୧୫ରୁ ଊର୍ଦ୍ଧ୍ୱ ଲୋକ ନିଖୋଜ ହୋଇଥିଲେ। ଏହି ହୃଦୟବିଦାରକ ଘଟଣାରେ ଶୁକ୍ରବାର କନ୍ଧମାଳ ପ୍ରଶାସନ ଡାଙ୍ଗେଶୀ ଗ୍ରାମର ଗୋଟିଏ ପରିବାରର ତିନିଜଣଙ୍କ ମୃତଦେହ ଉଦ୍ଧାର କରିଥିବା ବେଳେ ଶନିବାର ସକାଳେ ଗିଡ଼ିପାବାଲି ଅଞ୍ଚଳରୁ ଜଣଙ୍କୁ ଜୀବିତ ଅବସ୍ଥାରେ ଉଦ୍ଧାର କରାଯାଇଛି।
ଶନିବାର ସକାଳେ ଗଞ୍ଜାମ ଓ କନ୍ଧମାଳ ଜିଲା ପ୍ରଶାସନର ମିଳିତ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚିଥିଲେ। ଉଭୟ ଅଞ୍ଚଳରେ ଅନେକ ଘର ମାଟି ତଳେ ପୋତି ହୋଇଯାଇଥିବାରୁ ଓଡ୍ରାଫ୍ (ODRAF) ଓ ଏନ୍ଡିଆର୍ଏଫ୍ (NDRF) ଟିମ୍ ପକ୍ଷରୁ ମାଟି ଖୋଳି ଉଦ୍ଧାର କାର୍ଯ୍ୟ ଜୋରଦାର ଜାରି ରହିଛି।
ଅନ୍ୟ ନିଖୋଜ ବ୍ୟକ୍ତିଙ୍କ ସମ୍ପର୍କରେ ଏଯାଏଁ କୌଣସି ସୂଚନା ମିଳି ନ ଥିବାରୁ ଜଙ୍ଗଲ ଭିତରେ କେହି ଜୀବିତ ଥାଇପାରନ୍ତି ଆଶା ରଖି ବନ ବିଭାଗ ଓ ପ୍ରଶାସନ ପକ୍ଷରୁ ଜଙ୍ଗଲ ଅଞ୍ଚଳରେ ମଧ୍ୟ ତଲାସୀ ଅଭିଯାନ ଚାଲିଛି।
ଉଦ୍ଧାର କାର୍ଯ୍ୟ ପାଇଁ ଶନିବାର ସକାଳେ ବରିଷ୍ଠ ପ୍ରଶାସନିକ ଅଧିକାରୀ, ଅଗ୍ନିଶମ ବାହିନୀ, ବନ ବିଭାଗ, ୨୦୦ରୁ ଊର୍ଦ୍ଧ୍ୱ ଯବାନ, ପୋଲିସ ଓ ଆମ୍ବୁଲାନ୍ସ ଘଟଣାସ୍ଥଳକୁ ବାହାରିଥିଲେ। ରାସ୍ତାରେ ପଡ଼ିଥିବା ବଡ଼ ବଡ଼ ଗଛଗୁଡ଼ିକୁ କାଟି ରାସ୍ତା ସଫା କରିବା ପରେ ଉଦ୍ଧାରକାରୀ ଦଳ ସକାଳ ପ୍ରାୟ ୧୦ଟାରେ ପ୍ରଭାବିତ ଅଞ୍ଚଳରେ ପହଞ୍ଚିବାକୁ ସକ୍ଷମ ହୋଇଥିଲେ।
ଗଞ୍ଜାମ ଜିଲାରୁ ଭଞ୍ଜନଗର ଉପ-ଜିଲାପାଳ ଉମା ଶଙ୍କର ବେହେରା, ବିଡିଓ ଭାରତୀ ଦେବୀ, ଅତିରିକ୍ତ ତହସିଲଦାର ଅବିନାଶ ମହାର ପ୍ରମୁଖ ଘଟଣାସ୍ଥଳରେ ଉପସ୍ଥିତ ରହି ଉଦ୍ଧାର କାର୍ଯ୍ୟର ସରଜମିନ ତଦାରଖ କରୁଛନ୍ତି।
ଏହାସହ କନ୍ଧମାଳ ଜିଲା ପ୍ରଶାସନର ବରିଷ୍ଠ ଅଧିକାରୀମାନେ ମଧ୍ୟ ସ୍ଥିତି ଉପରେ ନଜର ରଖିଛନ୍ତି। ସୂଚନାଯୋଗ୍ୟ ଯେ, ସର୍ବାଧିକ କ୍ଷତିଗ୍ରସ୍ତ ଡାଙ୍ଗେଶୀ ଗ୍ରାମ କନ୍ଧମାଳ ଜିଲାର ହୋଇଥିବା ବେଳେ ଗିଡ଼ିପାବାଲି ଗ୍ରାମ ଗଞ୍ଜାମ ଜିଲା ଭଞ୍ଜନଗର ବ୍ଲକ ଅନ୍ତର୍ଗତ ବାଇବାଲି ପଞ୍ଚାୟତର ଅଂଶବିଶେଷ।
