ଭଞ୍ଜନଗର, ୩୧।୧୦(ବାବୁଲା ପ୍ରଧାନ)- ଗଞ୍ଜାମ ଜିଲା ଭଞ୍ଜନଗର ବ୍ଲକର ବନ୍ୟା ପ୍ରଭାବିତ ଅଞ୍ଚଳରେ କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ଜାତୀୟ ସେବା ଯୋଜନା (ଏନଏସଏସ) କୋ-ୟୁନିଟ୍ର ସ୍ବେଚ୍ଛାସେବୀମାନେ ମାନବିକତାର ପରିଚୟ ଦେଇଛନ୍ତି। ସ୍ବେଚ୍ଛାସେବୀମାନେ ବାହାଡ଼ାପଦର, ଚଢ଼େୟାପଲ୍ଲୀ ଓ ଗମ୍ଭାରୀଗୋଛା ଗ୍ରାମରେ ପହଞ୍ଚି ପ୍ରାୟ ୧୦୦୦ରୁ ଊର୍ଦ୍ଧ୍ୱ ବନ୍ୟା ପ୍ରଭାବିତ ଲୋକଙ୍କୁ ରନ୍ଧା ଓ ଶୁଖିଲା ଖାଦ୍ୟ ବଣ୍ଟନ କରିଥିଲେ। ଭଞ୍ଜନଗର ବ୍ଲକ ପ୍ରଶାସନ ପକ୍ଷରୁ ରନ୍ଧା ଖାଦ୍ୟ ପ୍ରସ୍ତୁତ କରାଯାଇଥିଲା।
ବାହାଡ଼ାପଦର ଗ୍ରାମର ସ୍ବେଚ୍ଛାସେବୀ ଓ ଏନଏସଏସ ସ୍ବେଚ୍ଛାସେବୀମାନେ ମିଳିତ ଭାବେ ଏହି ସେବା କାର୍ଯ୍ୟକୁ ସଫଳ କରିଥିଲେ। ଭଞ୍ଜନଗର ଏବିଡିଓ ପୂର୍ଣ୍ଣଚନ୍ଦ୍ର ପାଢ଼ୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଖାଦ୍ୟ ବଣ୍ଟନ କାର୍ଯ୍ୟ ସମ୍ପନ୍ନ ହୋଇଥିଲା। ବରିଷ୍ଠ ଶିକ୍ଷକ ନେତା ଜଗବନ୍ଧୁ ଜେନା ଓ ଜାତୀୟ ସେବା ଯୋଜନା ଅଧିକାରୀ ବାବୁଲା ପ୍ରଧାନ ଉପସ୍ଥିତ ରହି ଖାଦ୍ୟ ବଣ୍ଟନ କାର୍ଯ୍ୟ ଶାନ୍ତିଶୃଙ୍ଖଳାର ସହ ସମ୍ପନ୍ନ ହେବା ନେଇ ତଦାରଖ କରିଥିଲେ।
ଏହା ପୂର୍ବରୁ ମହାବିଦ୍ୟାଳୟର ଅଧ୍ୟକ୍ଷ ଡ. ଗଗନ ବିହାରୀ ପୁରୋହିତ ଏନଏସଏସ କୋ-ୟୁନିଟ ପକ୍ଷରୁ ଶୁଖିଲା ଖାଦ୍ୟ ବଣ୍ଟନ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଏହି ଖାଦ୍ୟ ସ୍ବାମୀ ଚିଦାନନ୍ଦ ସରସ୍ବତୀ କୁଷ୍ଠାଶ୍ରମ ସମେତ ବଡ଼କୋଦଣ୍ଡା, ସାନକୋଦଣ୍ଡା, ବାହାଡ଼ାପଦର ଓ ଚଢ଼େୟାପଲ୍ଲୀ ଆଦି ଗ୍ରାମରେ ବଣ୍ଟନ କରାଯାଇଥିଲା।
ଏଥିସହ ଗତ ଗୁରୁବାର ବନ୍ୟା ସମୟରେ ଏନଏସଏସ ସ୍ବେଚ୍ଛାସେବୀମାନେ ବନ୍ୟାଜଳ ଘେରରେ ଫସି ରହିଥିବା ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଥିଲେ। ବିପଦ ସମୟରେ ସ୍ବେଚ୍ଛାସେବୀମାନଙ୍କ ଏହି ନିଃସ୍ବାର୍ଥପର ସେବା କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
Dharitri – Odisha’s No.1 Odia Daily
