ନୂଆଦିଲ୍ଲୀ,୧୮।୧୨: ବିରୋଧୀ ଦଳର ଦୃଢ ବିରୋଧ ମଧ୍ୟରେ କେନ୍ଦ୍ର ସରକାର ଏକକାଳୀନ ଲୋକ ସଭା ଏବଂ ବିଧାନସଭା ନିର୍ବାଚନ କରିବାର ବ୍ୟବସ୍ଥା ସହିତ ମଙ୍ଗଳବାର ଲୋକ ସଭରେ ‘ଏକ ଦେଶ ଏକ ନିର୍ବାଚନ’ ବିଲ୍ ଆଗତ କରିଛନ୍ତି। ସରକାରଙ୍କ ତରଫରୁ ଏହା କୁହାଯାଇଛି ଯେ ଏହାକୁ ସଂଯୁକ୍ତ ସଂସଦୀୟ କମିଟି (ଜେପିସି)କୁ ବିସ୍ତୃତ ଆଲୋଚନା ପାଇଁ ପଠାଯିବ। ଏହି ପ୍ରସଙ୍ଗରେ ରାମନାଥ କୋବିନ୍ଦ କମିଟିକୁ ୪୭ ଟି ରାଜନୈତିକ ଦଳ ନିଜ ରାୟ ଦେଇଥିଲେ। ଏଥିମଧ୍ୟରୁ ୩୨ ଟି ଦଳ ଏହାକୁ ସମର୍ଥନ କରିଥିବା ବେଳେ ୧୫ଟି ଦଳ ଏହାକୁ ବିରୋଧ କରିଥଲେ।
ଭାଜପା ନେତୃତ୍ୱାଧୀନ ସରକାର ହୁଏତ ଏହି ବିଲ୍ ଆଗତ କରିଥିବେ, କିନ୍ତୁ ଏହାକୁ ପାରିତ କରିବା ଏକ ଚ୍ୟାଲେଞ୍ଜ ହେବ। ଏହି ବିଲ୍ ପାସ କରିବାକୁ ଅତିକମରେ ଦୁଇ-ତୃତୀୟାଂଶ ଭୋଟ ଆବଶ୍ୟକ, କିନ୍ତୁ ବର୍ତ୍ତମାନ ଏନଡିଏରେ କେବଳ ଏକ ସଂଖ୍ୟାଗରିଷ୍ଠତା ରହିଛି। ପ୍ରଥମ ଥର ପାଇଁ ଏହି ବିଲ୍ ପ୍ରଣୟନ ପାଇଁ ସଂସଦରେ ଇଲେକ୍ଟ୍ରୋନିକ ମେସିନ ଭୋଟିଂ ଅନୁଷ୍ଠିତ ହୋଇଛି, ଯେଉଁଥିରେ ସରକାରଙ୍କ ସପକ୍ଷରେ ୨୬୯ ଭୋଟ ା ଏବଂ ସରକାରଙ୍କ ବିରୋଧରେ ୧୯୮ ଭୋଟ ଦିଆଯାଇଛି।
ବର୍ତ୍ତମାନ ଲୋକ ସଭାରେ ଭାଜପାର ୨୪୦ ଏବଂ ଏନଡିଏ ୨୯୩ ଏମ୍ପି ଅଛନ୍ତି। ସେମାନଙ୍କ ଉପସ୍ଥିତି ପାଇଁ ତିନି ଧାଡି ହ୍ବିପ୍ ଜାରି କରାଯିବା ସତ୍ତ୍ୱେ ଏହି ପ୍ରସ୍ତାବ ଉପସ୍ଥାପିତ ହେବାପରେ ଶାସକ ଦଳର ବହୁ ଏମ୍ପି ଅନୁପସ୍ଥିତ ରହିଥିଲେ। ଭୋଟ ସମୟରେ ୨୦ ଜଣ ଏମ୍ପି ଲୋକ ସଭାରେ ଅନୁପସ୍ଥିତ ରହିଥିଲେ। ଏହି ୨୦ ଏମ୍ପିଙ୍କୁ ଦଳ କାରଣ ଦର୍ଶାଅ ନୋଟିସ ଜାରି କରିଛି।
