ନୂଆଦିଲ୍ଲୀ,୧୫।୨: ରଖେ ହରି ତ ମାରେ କିଏ। ଏହି ଉକ୍ତିଟି ପ୍ରମାଣିତ ହୋଇଥିବା ଦେଖିବାକୁ ମିଳିଛି ଦେଶର ରାଜଧାନୀ ଦିଲ୍ଲୀରେ। ନିକଟରେ ଦିଲ୍ଲୀରେ ଏକ ଅଭାବନୀୟ ଘଟଣା ଘଟିଛି। ଯାହା ସ୍ପଷ୍ଟ ଭାବେ ଦର୍ଶାଉଛି ଯେ, ଯଦି ଭଗବାନ କାହାକୁ ଆଶୀର୍ବାଦ କରନ୍ତି, ତେବେ କେହି ତାଙ୍କୁ କ୍ଷତି ପହଞ୍ଚାଇ ପାରିବେ ନାହିଁ। ଏହି ମାମଲା ଘଟିଛି ଜଣେ ଦେଢ଼ବର୍ଷର ଶିଶୁ ସହିତ। ସୂଚନା ମୁତାବକ, ଜଣେ ଦେଢ଼ ବର୍ଷର ଶିଶୁ ଘରେ ଖେଳୁଥିବା ବେଳେ ଚେୟାରରେ ଚଢ଼ି ସାବୁନ ପାଣିରେ ଭର୍ତ୍ତି ଥିବା ୱାଶିଂ ମେସିନରେ ପଡ଼ିଯାଇଥିଲେ। ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, ପିଲାଟି ପ୍ରାୟ ୧୫ ମିନିଟ ପର୍ଯ୍ୟନ୍ତ ଉକ୍ତ ସାବୁନ ପାଣିରେ ଛଟପଟ ହେଉଥିଲେ। ଶିଶୁଟିର ମା’ ଘରେ ଖୋଜାଖୋଜି କରିବା ପରେ ତାଙ୍କୁ ମେସିନ ଭିତରେ ଦେଖିବାକୁ ପାଇଥିଲେ। ସେତେବେଳେ ତାଙ୍କୁ ତୁରନ୍ତ ଉଦ୍ଧାର କରି ହସ୍ପିଟାଲକୁ ନେଇଥିଲେ। ୧୫ ମିନିଟ୍ ପର୍ଯ୍ୟନ୍ତ ସାବୁନ ପାଣିରେ ଥିବାରୁ ଶିଶୁର ସ୍ବାସ୍ଥ୍ୟାବସ୍ଥା ବିଗିଡିଯାଇଥିଲା। ପିଲାଟି ୭ ଦିନ କୋମାରେ ରହିବା ସହ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା। ହେଲେ ୭ ଦିନ ପରେ ଶିଶୁର ସ୍ବାସ୍ଥ୍ୟାବସ୍ଥାରେ ସୁଧାର ଆସିବାରୁ ତାଙ୍କୁ ୱାର୍ଡକୁ ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କୁ ଡାକ୍ତର ୧୨ଦିନ ଯାଏ ନିଜ ତତ୍ତ୍ୱାବଧାନରେ ରଖିଥିଲେ। ବର୍ତ୍ତମାନ ଶିଶୁଟି ସୁସ୍ଥ ଥିବାରୁ ତାଙ୍କୁ ହସ୍ପିଟାଲରୁ ଡିସଚାର୍ଜ କରାଯାଇଛି ବୋଲି ବସନ୍ତ କୁଞ୍ଜର ଫୋର୍ଟିସ ହସ୍ପିଟାଲର ଡାକ୍ତରମାନେ କହିଛନ୍ତି। ଅନ୍ୟପଟେ ଡାକ୍ତରଙ୍କ କହିବାନୁସାରେ, ଯେତେବେଳେ ପରିବାର ଲୋକ ଶିଶୁ ସହିତ ଡାକ୍ତରଖାନାକୁ ଆସିଥିଲେ, ସେତେବେଳେ ସେ ଅଚେତ ଥିଲେ। ଶିଶୁଟିର କୌଣସି ଗତିବିଧି ନ ଥିବା ବେଳେ ସେ ସମ୍ପୂର୍ଣ୍ଣ ଥଣ୍ଡା ପଡ଼ିଯାଇଥିଲେ ଏବଂ ନିଃଶ୍ୱାସ ନେବାରେ କଷ୍ଟ ଅନୁଭବ ହେଉଥିଲା। ପିଲାଟି ନୀଳ ହୋଇଯାଇଥିବା ବେଳେ ତାଙ୍କର ପଲ୍ସ କିମ୍ବା ବିପି ଜଣାପଡ଼ୁ ନ ଥିଲା ବୋଲି ଡାକ୍ତର କହିଛନ୍ତି।
