ଧାମନଗର,୪ା୮(ଦେବେନ୍ଦ୍ର ଆନ୍ଦିଆ): ଧାମନଗରଠାରେ ବୈତରଣୀ ଓ ତାର ଶାଖା କୋଚିଳା, ଗେଙ୍ଗୁଟି ନଦୀରେ ଚଳିତ ବର୍ଷ ପ୍ରଥମ ବନ୍ୟା ଆସି ୨୬ ପଞ୍ଚାୟତ ଅନ୍ତର୍ଗତ ୧୦୮ ରାଜସ୍ବ ଗ୍ରାମର ପାଖାପାଖି ଦେଢ଼ ଲକ୍ଷ ଲୋକ ପ୍ରଭାବିତ ହୋଇଛନ୍ତି। ବୁଧବାର ସାରେ ବୈତରଣୀ ନଦୀର ଗୌରାଙ୍ଗପୁର ଏବଂ ମଲ୍ଲିମାହାରା ଏସକେପ, ଗେଙ୍ଗୁଟି ନଦୀର କନକେଇ,ଗାଇଛନ୍ଦା ଏବଂ ମଠ ମାହାରା ଏସ୍କେପରୁ ବନ୍ୟାଜଳ ପ୍ରବାହିତ ହୋଇ ବହୁ ଗ୍ରାମ,ରାସ୍ତା ଘାଟ,ଚାଷ ଜମି ଜଳାର୍ଣ୍ଣବ ହୋଇଛି।
ମିଳିଥିବା ସୂଚନା ଅନୁସାରେ ବୈତରଣୀ ନଦୀର ବନ୍ୟାଜଳ ଆଖୁଆପଦାଠାରେ ବିପଦ ସଙ୍କେତ ୧୭ .୮୩ ମିଟର ରହିଥିବା ବେଳେ ଏହା ବୁଧବାର ବିଳମ୍ବିତ ରାତି ପର୍ଯ୍ୟନ୍ତ ବଢ଼ି ୧୯.୮୯ ମିଟରରେ ପହଞ୍ଚିଥିଲା । ଗୁରୁବାର ସକାଳେ ବୈତରଣୀ ନଦୀରେ ବନ୍ୟାଜଳ ହ୍ରାସ ପାଇ ଅପରାହ୍ନ ୬ଟା ସୁଦ୍ଧା ୧୯. ୩୮ ମିଟର ଅର୍ଥାତ୍ ବିପଦ ସଂକେତର ବହୁ ଊର୍ଦ୍ଧ୍ୱରେ ପ୍ରବାହିତ ହେଉଛି। ଧାମନଗର ବ୍ଲକର ଆନନ୍ଦପୁର ପଞ୍ଚାୟତ ସମେତ ଖଡ଼ିପଦା,କରଦା, ସୋହଡା, ପଧାନି,ଅର୍ଜୁନପୁର, ଭଟସାହି, ଦଳାଙ୍ଗ, ହସନାବାଦ, ଦୋବଲ, ମୁସ୍ତଫାପୁର, ଧୁଷୁରୀ,ବମକୁରା,ସାହାସପୁର, କୋଠାର, ନଦୀଗଁା, ବୟାଙ୍ଗଡିହ, ଅସୁରାଳି ଏବଂଗଢିଆଳି ପଞ୍ଚାୟତର ବିଭିନ୍ନ ଗ୍ରାମଗୁଡିକ ବନ୍ୟା ଘେରରେ ରହିଛ। ପଧାନି ପଞ୍ଚାୟତର କଇଥାଡିହ ,ଖଡିପଦା ପଞ୍ଚାୟତର କାଞ୍ଜିଆ ପାଳ,ହସନାବାଦ ପଞ୍ଚାୟତର ହସନାବାଦ ଗ୍ରାମ ବନ୍ୟାରେ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି। ଏ ସମସ୍ତ ଗ୍ରାମର ପ୍ରାୟ ୪୫୦ରୁ ଅଧିକ ପରିବାର ଦୁଇଦିନ ହେବ ଜଳବନ୍ଦୀ ହୋଇ ଦୁର୍ଦ୍ଦଶାରେ ଦିନ କାଟୁଛନ୍ତି। ବନ୍ୟାରେ ଭଦ୍ରକ ଆରଡି ମୁଖ୍ୟରାସ୍ତାର ଅସୁରାଳି, କୋଠାର, ପାୟାସାହି, ସୂର୍ଯ୍ୟପୁର, ଧୁଷୁରୀ ସ୍ଥାନ ମାନଙ୍କରେ ରାସ୍ତା ବୁଡି ପ୍ରାୟ ୪ଫୁଟ ଉଚ୍ଚରେ ବନ୍ୟା ସ୍ରୋତ ଚାଲୁଥିବାରୁ ଯାତାୟାତ ବିଚ୍ଛିନ୍ନ ହୋଇଛି। ବନ୍ୟାରେ ଧାମନଗର -ଦୋବଲ, ଦୋବଲ-ଷେଣ୍ଢପୁର, ଖଡ଼ିପଦା-ଆନନ୍ଦପୁର, ସୋହଡା-ପଧାନି, ସୁଜାଣସିଂପୁର-କରଦା,ହାସନାବାଦ-ଧୁଷୁରୀ, ଅନଳଡିହ-ଅସ୍ତକ, ଧାମନଗର-ଫଳପୁର, ଫଳପୁର-ରତ୍ନା ଫଳପୁର, ଅର୍ଜୁନପୁର-ବାଲିପାଟଣା, ଭଗତପୁର-ପଧାନି, ପତ୍ରିସାହି-ଶ୍ରୀରାମପୁର, ଅନ୍ନପୂର୍ଣ୍ଣା -ଦିନାଜପୁର, ପଛାଲୋ-ଖୋପସାହି, ଧୁଷୁରୀ -ନଦୀଗାଁ, ଧୁଷୁରୀ-ଖଡିମାହାରା, ଧୁଷୁରୀ ବମକୁରା ରାସ୍ତା ସମେତ ସମସ୍ତ ଗ୍ରାମ୍ୟ ରାସ୍ତା ଗୁଡିକ ବୁଡି ବନ୍ୟା ସ୍ରୋତ ଚାଲୁଛି। ଦୋବଲ ବଜାର ନିକଟରେ ଥିବା ଗେଙ୍ଗୁଟି ନଦୀର ପକା ପୋଲ ଉପରେ ଅଢ଼େଇ ଫୁଟ ଉଚ୍ଚରେ ବନ୍ୟା ପାଣି ଚାଲୁଛି। ଅନ୍ୟପକ୍ଷରେ ରେବ ଏବଂ କପାଳି ନଦୀରେ ଆସିଥିବା ବନ୍ୟାରେ କଟ ସାହି, ଖପରପଦା,କାଶିମପୁର, ଫତେପୁର ପଞ୍ଚାୟତର ଚାଷ ଜମି ବୁଡି ଜଳମଗ୍ନ ହୋଇଛି।
