ଡେରାଡୁନ୍, ୨୫।୧୨: ଓମିକ୍ରନ୍ ଭାରିଆଣ୍ଟ ଯୋଗୁ ମହାମାରୀର ତୃତୀୟ ଲହର ସମ୍ଭାବନା ସୃଷ୍ଟି ହୋଇଛି। ଏଭଳି ସ୍ଥିତିରେ ଉତ୍ତରପ୍ରଦେଶ ବିଧାନସଭା ନିର୍ବାଚନକୁ ମାସେ ଦୁଇ ମାସ ପରାମର୍ଶ ଦେଇଥିଲେ ଆଲାହାବାଦ ହାଇକୋର୍ଟ। ଏଥିସହିତ ନିର୍ବାଚନୀ ରାଲି ବନ୍ଦ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ନିର୍ବାଚନ କମିଶନଙ୍କୁ ମଧ୍ୟ ଅନୁରୋଧ କରିଥିଲେ। ହାଇକୋର୍ଟଙ୍କ ପରାମର୍ଶ କ୍ରମେ ଆସନ୍ତା ସପ୍ତାହରେ ସ୍ଥିତି ଅନୁଧ୍ୟାନ କରିବା ପାଇଁ ନିର୍ବାଚନ କମିଶନ (ଇସି) ଦଳ ୟୁପି ଗସ୍ତ କରିବ। ତା’ ପରେ ନିର୍ବାଚନ ସ୍ଥଗିତ ରଖିବା ପ୍ରସ୍ତାବ ଉପରେ ଉପଯୁକ୍ତ ନିଷ୍ପତ୍ତି ନିଆଯିବ। ଏ ନେଇ ଶୁକ୍ରବାର କହିଛନ୍ତି ମୁଖ୍ୟ ନିର୍ବାଚନ କମିଶନର (ସିଇସି) ସୁଶୀଲ ଚନ୍ଦ୍ରା।
ରାଲି ବନ୍ଦ କରା ନ ଗଲେ ସଂକ୍ରମଣ ଦ୍ୱିତୀୟ ଲହରକୁ ଟପିଯିବ ବୋଲି ଜଷ୍ଟିସ୍ ଶେଖର ଯାଦବ କହିଥିଲେ। ଉତ୍ତରପ୍ରଦେଶ ଗ୍ରାମପଞ୍ଚାୟତ ନିର୍ବାଚନ ଏବଂ ପଶ୍ଚିମବଙ୍ଗ ବିଧାନସଭା ନିର୍ବାଚନ ବେଳେ କୋଭିଡ୍ ସଂକ୍ରମଣ ଦ୍ରୁତ ବୃଦ୍ଧି ଘଟିବା ସହ ଅନେକ ଲୋକଙ୍କ ଜୀବନ ନେଇଥିଲା। ଆଗାମୀ ୟୁପି ନିର୍ବାଚନ ଲାଗି ରାଜନୈତିକ ଦଳଗୁଡ଼ିକ ରାଲି ସମାବେଶରେ ବ୍ୟସ୍ତ ରହିଛନ୍ତି ଯେଉଁଠି ସାମାଜିକ ଦୂରତ୍ୱ ନିୟମ ପାଳନ ହେଉନାହିଁ। ତେଣୁ ରାଲି ଓ ସମାବେଶ ନିଷେଧ ହେବା ଆବଶ୍ୟକ। ଏହା ବଦଳରେ ଦୂରଦର୍ଶନ କିମ୍ବା ଖବରକାଗଜ ଜରିଆରେ ପ୍ରଚାର କରିବା ନିମନ୍ତେ ରାଜନୈତିକ ଦଳଗୁଡ଼ିକୁ ନିର୍ଦ୍ଦେଶ ଦେବାକୁ ହାଇକୋର୍ଟ ନିର୍ବାଚନ କମିଶନଙ୍କୁ କହିଥିଲେ।
