ପ୍ୟାରିସ/ବର୍ଲିନ,୨୧ ।୧: ବ୍ରିଟେନରେ ଓମିକ୍ରନ୍ ପିକ୍ରେ ପହଞ୍ଚି ଏବେ କମ୍ ହୋଇଯାଇଥିବା ସେଠାକାର ପ୍ରଧାନମନ୍ତ୍ରୀ ଘୋଷଣା କରିଛନ୍ତି ସତ । ହେଲେ ୟୁରୋପୀୟ ଦେଶରେ କରୋନାର ତାଣ୍ଡବ ଜାରି ରହିଛି । ଫ୍ରାନ୍ସରେ ଲଗାତାର ଦ୍ୱିତୀୟ ଦିନରେ ୪ ଲକ୍ଷ ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଗତ ୨୪ ଘଣ୍ଟା ମଧ୍ୟରେ ସେଠାରେ ନୂଆ କରୋନା ସଂକ୍ରମିତଙ୍କ ସଂଖ୍ୟା ରହିଛି ୪.୩୬ ଲକ୍ଷ । ଏପଟେ ଜର୍ମାନୀରେ ଗତ ୨୪ ଘଣ୍ଟା ମଧ୍ୟରେ ୧.୨୧ ଲକ୍ଷରୁ ଅଧିକ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି ନ୍ୟୁଜିଲାଣ୍ଡରେ ଓମିକ୍ରନ୍ ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି । ଏହାକୁ ନଜରରେ ରଖି ସେଠାକାର ପ୍ରଧାନମନ୍ତ୍ରୀ ଜେସିକା ଅର୍ଡର୍ନ କହିଛନ୍ତି ଯଦି ଏହାର ଗୋଷ୍ଠୀ ସଂକ୍ରମଣ ହେଲା ତେବେ ସାରା ଦେଶରେ ଲକଡାଉନ ହୋଇପାରେ ।
ଆମେରିକା ଓ ବ୍ରାଜିଲ ବି କରୋନା ମହାମାରୀ କବଳରେ ପଡି ଛଟପଟ ହେଉଛନ୍ତି । ଆମେରିକାରେ ଗତ ୨୪ ଘଣ୍ଟାରେ ୭ଲକ୍ଷରୁ ଅଧିକ ନୂଆ ସଂକ୍ରମିତ ସାମ୍ନାକୁ ଆସିଛନ୍ତି । ଦେଶରେ ପ୍ରତିଦିନ ପାଖାପାଖି ୨୦୦୦ ଲୋକଙ୍କର କରୋନା ସଂକ୍ରମଣ ଯୋଗୁ ମୃତ୍ୟୁ ହେଉଛି । ବ୍ରାଜିଲରେ ବି କରୋନାର ପ୍ରକୋପ କିଛି କମ୍ ନାହିଁ । ସେଠାରେ ଗୋଟିଏ ଦିନରେ ୨ ଲକ୍ଷରୁ ଅଧିକ ସଂକ୍ରମିତ ଚିହ୍ନଟ ହେବା ପରେ ସରକାରଙ୍କ ଚିନ୍ତା ବଢି ଯାଇଛି । ଏହା ପୂର୍ବ ରେକର୍ଡକୁ ଭାଙ୍ଗି ଦେଇଛି ବୋଲି କୁହାଯାଉଛି । ସେହିପରି ଦେଶରେ ପ୍ରତିଦିନ ମୃତକଙ୍କ ସଂଖ୍ୟା ପ୍ରାୟ ୩୫୦ ରହିଛି । ସଂକ୍ରମିତଙ୍କ ସଂଖ୍ୟା ବଢି ଚାଲିଥିବାରୁ ହସ୍ପିଟାଲରେ ବେଳକୁ ବେଳ ବେଡ୍ର ଘୋର ଅଭାବ ଦେଖାଦେଇଛି ।
ଆମେରିକା ରାଷ୍ଟ୍ରପତି ଜୋ ବାଇଡେନ କହିଛନ୍ତି କରୋନା ଯୋଗୁ ଆମେରିକା ଲୋକେ ଥକି ପଡିଲେଣି । ତଥାପି ସେମାନଙ୍କର ମନୋବଳ ଦୃଢ ଅଛି ବୋଲି ସେ କହିଛନ୍ତି । ଆମେରିକାରେ ପ୍ରତିଦିନ ଲକ୍ଷ ଲକ୍ଷ ସଂଖ୍ୟାରେ କରୋନା ମହାମାରୀରେ ସଂକ୍ରମିତ ହେଉଥିବା ବେଳେ ହଜାର ହଜାର ସଂଖ୍ୟାରେ ମୃତ୍ୟୁ ବି ହେଉଛି ।
