ନୂଆଦିଲ୍ଲୀ,୧୭।୧୦: ଦେଶରେ କୋଭିଡ୍ ସଂକ୍ରମଣ ଯଥେଷ୍ଟ ହ୍ରାସ ପାଇଥିବା ବେଳେ ଅଧିକାଂଶ ସ୍ଥାନରେ ଅନେକ କଟକଣାକୁ କୋହଳ କରାଯାଇଛି। ଇତିମଧ୍ୟରେ ଭାରତରେ ଓମିକ୍ରନ୍ର ଆଉ ଏକ ନୂଆ ସବ୍ଭାରିଆଣ୍ଟ ଚିହ୍ନଟ ହେବା ପରେ ସମସ୍ତଙ୍କ ଚିନ୍ତାର କାରଣ ପାଲଟିଛି। ଦୀପାବଳି ବେଳକୁ ଦେଶରେ କୋଭିଡ୍ ସଂକ୍ରମଣ ବଢ଼ିପାରେ ବୋଲି ବିଶେଷଜ୍ଞ ଆଶଙ୍କା କରୁଛନ୍ତି। ସେଥିପାଇଁ ପାର୍ବଣ ଋତୁରେ ଅଧିକ ସତର୍କ ରହିବା ଲାଗି ପରାମର୍ଶ ଦିଆଯାଇଛି। ବିଏଫ୍.୭ ନାମକ ଏହି ସବ୍ଭାରିଆଣ୍ଟ ଅଧିକ ସଂକ୍ରାମକ ଓ ଏହା ଶୀଘ୍ର ବ୍ୟାପିଥାଏ। ଗୁଜରାଟର ବାୟୋଟେକ୍ନୋଲୋଜି ରିସର୍ଚ୍ଚ ସେଣ୍ଟର ବିଏଫ୍.୭ର ପ୍ରଥମ ମାମଲା ଠାବ କରିଛି। ଚାଇନାର ମଙ୍ଗୋଲିଆରେ ପ୍ରଥମେ ବିଏ.୫.୧.୭ ଏବଂ ବିଏଫ୍.୭ ଚିହ୍ନଟ ହେବା ପରେ ଏହା ଅନ୍ୟ ଦେଶକୁ ବ୍ୟାପି ସାନି ବିପଦ ସୃଷ୍ଟି କରିଛି। ଚାଇନାରେ ନିକଟରେ ସଂକ୍ରମଣ ବୃଦ୍ଧି ପାଇବାର କାରଣ ଏହି ଦୁଇ ସବ୍ଭାରିଆଣ୍ଟ ବୋଲି କୁହାଯାଉଛି। ଏହା ଅତି ଦ୍ରୁତ ବେଗରେ ସଂକ୍ରମିତ ହେଉଥିବା ବେଳେ ଏବେ ବ୍ରିଟେନ, ଆମେରିକା, ଅଷ୍ଟ୍ରେଲିଆ, ବେଲ୍ଜିୟମ ପ୍ରଭୃତି ଦେଶକୁ ବ୍ୟାପିସାରିଲାଣି। ଓମିକ୍ରନ୍ ବିଏଫ୍.୭ର ବିଶେଷତ୍ୱ ହେଉଛି ଏହା କୋଭିଡ୍ର ପୂର୍ବ ସଂକ୍ରମଣ ଏବଂ ଟିକା ନେବା ଦ୍ୱାରା ଶରୀରରେ ସୃଷ୍ଟି ହୋଇଥିବା ଆଣ୍ଟିବଡ଼ିକୁ ଚକ୍ମା ଦେଖାଇବାକୁ ସମର୍ଥ। ପୂର୍ବ ଭାରିଆଣ୍ଟଗୁଡ଼ିକ ତୁଳନାରେ ଏହା ଅଧିକ ଶୀଘ୍ର ବ୍ୟାପିବ ବୋଲି କୁହାଯାଉଛି। ସେଥିପାଇଁ ଆଗାମୀ ଦୁଇ/ତିନି ସପ୍ତାହ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଆଗକୁ ପାର୍ବଣ ଥିବାରୁ ସତର୍କତା ଅବଲମ୍ବନ କରିବା ଜରୁରୀ ବୋଲି ନ୍ୟାଶନାଲ ଟେକ୍ନିକାଲ ଆଡଭାଇଜରୀ ଗ୍ରୁପ୍ ଅଫ୍ ଇମ୍ୟୁନାଇଜେଶନ(ଏନ୍ଟିଏଜିଆଇ)ର ଅଧ୍ୟକ୍ଷ ଡ. ଏନ୍.କେ. ଆରୋରା କହିଛନ୍ତି।
