Posted inଖେଳ

ଅଲିମ୍ପିକ୍ସ ମହିଳା ବକ୍ସିଂ: ପଦାର୍ପଣରେ ପଦକ ନିଶ୍ଚିତ କଲେ ଲଭଲିନା

ଟୋକିଓ,୩୧।୮(ପି.ଟି.): ଟୋକିଓ ଅଲିମ୍ପିକ୍ସରେ ମହିଳା ବକ୍ସର ଲଭଲିନା ବୋରଗୋହେନ ଇତିହାସ ସୃଷ୍ଟି କରିଛନ୍ତି। ଅଲିମ୍ପିକ୍ସରେ ପଦାର୍ପଣ କରିଥିବା ଆସାମର ଏହି ତାରକା ମହିଳା ବକ୍ସର ୬୯ କେ.ଜି. ବର୍ଗରେ ସେମିଫାଇନାଲରେ ପ୍ରବେଶ କରି ପଦକ ନିଶ୍ଚିତ କରିଛନ୍ତି। ଶୁକ୍ରବାର ଅନୁଷ୍ଠିତ କ୍ୱାର୍ଟର ଫାଇନାଲ ମୁକାବିଲାରେ ସେ ପୂର୍ବତନ ବିଶ୍ୱ ଚାମ୍ପିୟନ ଚାଇନିଜ ତାଇପେର ନିଏନ- ଚିନ ଚେନ୍‌ଙ୍କୁ ପରାସ୍ତ କରିଛନ୍ତି। ଏଥିସହ ସେ ବକ୍ସିଂରେ ଭାରତ ପାଇଁ ପ୍ରଥମ ପଦକ ହାସଲ କରିବା ସ୍ପଷ୍ଟ ହୋଇଛି।
୨୩ ବର୍ଷୀୟା ଲଭଲିନା ୩ ରାଉଣ୍ଡ ବିଶିଷ୍ଟ ବାଉଟ୍‌ରେ ୪-୧ ବ୍ୟବଧାନରେ ଚେନ୍‌ଙ୍କୁ ହରାଇଛନ୍ତି। ପ୍ରଥମ ରାଉଣ୍ଡରେ କଡ଼ା ଟକ୍କର ଦେଖିବାକୁ ମିଳିଥିଲା। ଦ୍ୱିତୀୟ ରାଉଣ୍ଡରେ ଲଭଲିନା ଏକତରଫା ଭାବେ ଜିତିଥିଲେ। ତୃତୀୟ ରାଉଣ୍ଡରେ ତାଙ୍କୁ କେବଳ ଡିଫେନ୍ସ କରିବାର ଥିଲା। ଏହି ରାଉଣ୍ଡରେ ୪ଜଣ ଜଜ୍‌ ତାଙ୍କୁ ୧୦ ପଏଣ୍ଟ ଦେଇଥିଲେ। ଫଳରେ ସେ ବିଜୟୀ ହୋଇଥିଲେ। ସେମିଫାଇନାଲରେ ଲଭଲିନା ବିଶ୍ୱ ଚାମ୍ପିୟନ ତଥା ବିଶ୍ୱର ଏକନମ୍ବର ବକ୍ସର ତୁର୍କୀର ବୁସେନାଜ ସୁରମେନେଲିଙ୍କୁ ଭେଟିବେ। ବୁସେନାଜ ଅନ୍ୟ ଏକ କ୍ୱାର୍ଟର ଫାଇନାଲ ବାଉଟ୍‌ରେ ୟୁକ୍ରେନର ଆନ୍ନା ଲିସେଙ୍କୋଙ୍କୁ ହରାଇ ସେମିରେ ପ୍ରବେଶ କରିଛନ୍ତି। ଲଭଲିନା ବିଶ୍ୱ ର଼୍ୟାଙ୍କିଙ୍ଗର ୩ ନମ୍ବର ସ୍ଥାନରେ ରହିଛନ୍ତି।
ଆସାମର ପ୍ରଥମ ମହିଳା ବକ୍ସର ଭାବେ ଲଭଲିନା ଅଲିମ୍ପିକ୍ସ ଖେଳିବାକୁ ଯୋଗ୍ୟତା ହାସଲ କରିଥିଲେ। ସେ ପୂର୍ବରୁ ୨ଥର ବିଶ୍ୱ ଚାମ୍ପିୟନଶିପ୍‌ ବ୍ରୋଞ୍ଜ ପଦକ ହାସଲ କରିଥିଲେ। କ୍ୱାର୍ଟରରେ ସେ ଧୈର୍ଯ୍ୟ ଓ ଶାନ୍ତ ସ୍ବଭାବ ଆଚରଣ କରି ଚେନ୍‌ଙ୍କୁ ଚକ୍‌ମା ଦେଇଥିଲେ। ପୂର୍ବରୁ ୨୦୧୮ ବିଶ୍ୱ ଚାମ୍ପିୟନଶିପ୍‌ରେ ଚେନ୍‌ ଲଭଲିନାଙ୍କୁ ହରାଇଥିଲେ। ଏବେ ଲଭଲିନା ଏହି ପରାଜୟର ମଧୁର ପ୍ରତିଶୋଧ ନେଇଛନ୍ତି। ୫ ଫୁଟ ୧୧ ଇଞ୍ଚ ଉଚ୍ଚତା ବିଶିଷ୍ଟ ଲଭଲିନା ଆରମ୍ଭରୁ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲେ। ବାଉଟ୍‌ର ଅନ୍ତିମ ୩ ମିନିଟ୍‌ ଗୁରୁତ୍ୱପୂର୍ଣ୍ଣ ଥିଲା। ସେ କାଉଣ୍ଟର ଆଟାକ କରିବାକୁ ମନସ୍ଥ କରିଥିଲେ ମଧ୍ୟ ନିଜର ଡିଫେନ୍ସକୁ ଦୃଢ କରିଥିଲେ ଓ ଚେନ୍‌ଙ୍କୁ ଚକ୍‌ମା ଦେବାକୁ ସକ୍ଷମ ହୋଇଥିଲେ। ନିଜ ଉଚ୍ଚତାର ଫାଇଦା ଉଠାଇଥିଲେ ଲଭଲିନା। ପୂର୍ବରୁ ଆକ୍ରମଣାତ୍ମକ ଖେଳି ସେ ଚେନ୍‌ଙ୍କଠାରୁ ପରାସ୍ତ ହୋଇଥିଲେ। ତେଣୁ ଏହି ମୁକାବିଲାରେ ସେ ଭିନ୍ନ ରଣନୀତି ଆପଣେଇଥିଲେ ବୋଲି ଜାତୀୟ ବକ୍ସିଂ କୋଚ୍‌ ମହମ୍ମଦ ଅଲି କମାର କହିଛନ୍ତି। ଧୈର୍ଯ୍ୟର ସହ ଛିଡା ହେବା ସହ ନିକଟକୁ ଆସିବାକୁ ଚେନ୍‌ଙ୍କୁ ସୁଯୋଗ ଦେବାକୁ ଲଭଲିନାଙ୍କୁ ପରାମର୍ଶ ଦିଆଯାଇଥିଲା। ସେ ଆଦୌ ଉତ୍ସାହିତ ହୋଇ ନ ଥିଲେ ଓ ନିଜର ରଣନୀତିକୁ ସଫଳତା ଭାବେ କାର୍ଯ୍ୟକାରୀ କରିଥିଲେ ବୋଲି କମାର କହିଛନ୍ତି।
ଲଭଲିନା ଗତବର୍ଷ କୋଭିଡ୍‌-୧୯ର ଶିକାର ହୋଇଥିଲେ। ଫଳରେ ୟୁରୋପରେ ଟ୍ରେନିଂ ନେବାରୁ ବଞ୍ଚିତ ହୋଇଥିଲେ। ମା’ ମାମୋନି ବୋରଗୋହେନଙ୍କ କିଡ୍‌ନୀ ପ୍ରତିରୋପଣ ହୋଇଥିଲା। ତାଙ୍କୁ ଦେଖିବାକୁ ହସ୍ପିଟାଲ ଯାଇଥିବା ବେଳେ ଲଭଲିନା ସଂକ୍ରମିତ ହୋଇଥିଲେ। ତାଙ୍କ ବାପା ଜଣେ ଛୋଟ ବ୍ୟବସାୟୀ। ବଡ଼ ଭଉଣୀ ମଧ୍ୟ ଜଣେ କିକ୍‌ ବକ୍ସର।
ଆସାମର ଗୋଲାଘାଟ ଜିଲାରେ ପ୍ରତିଭା ଅନ୍ବେଷଣ କରିବା ବେଳେ ସ୍ପୋଟର୍‌ସ ଅଥରିଟି ଅଫ୍‌ ଇଣ୍ଡିଆ (ସାଇ) କୋଚ୍‌ ପଦୁମ ବୋରୋ ଲଭଲିନାଙ୍କୁ ଚିହ୍ନଟ କରିଥିଲେ। ଏହାପୂର୍ବରୁ ସେ ପ୍ରଥମେ ଜଣେ କିକ୍‌ ବକ୍ସର ଭାବେ ଖେଳ ଆରମ୍ଭ କରିଥିଲେ। କିନ୍ତୁ ବକ୍ସିଂକୁ ଆପଣାଇବା ପରେ ସେ ପଛକୁ ଫେରି ଚାହିଁନାହାନ୍ତି। ୨୦୧୮ ବିଶ୍ୱ ଚାମ୍ପିୟନଶିପ୍‌ରେ ସେ ପଦାର୍ପଣ କରି ବ୍ରୋଞ୍ଜ ପଦକ ହାସଲ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ୨୦୧୯ରେ ସେ ଆଉ ଏକ ବ୍ରୋଞ୍ଜ ପଦକ ଜିତିଥିଲେ। ସେ ମଧ୍ୟ ଦୁଇଥର ଏସିଆନ ଚାମ୍ପିୟଶନିପ୍‌ରେ ବ୍ରୋଞ୍ଜ ପଦକ ହାସଲ କରିଥିଲେ। ଗୋଲାଘାଟ ଜିଲାର ବାରୋ ମୁଖିଆ ଗ୍ରାମରେ ଜନ୍ମଗ୍ରହଣ କରିଥିବା ଲଭଲିନା ନିଜର ସ୍ବପ୍ନ ପୂରଣ କରିବା ପାଇଁ ଗୁଆହାଟିକୁ ଯାଇଥିଲେ।
ପୂର୍ବରୁ ବକ୍ସିଂରେ ବିଜେନ୍ଦର ସି (୨୦୦୮) ଓ ଏମ୍‌ସି ମେରିକମ (୨୦୧୨) ଭାରତ ପାଇଁ ଅଲିମ୍ପିକ୍‌ ପଦକ ହାସଲ କରିଥିଲେ। ଉଭୟ ବ୍ରୋଞ୍ଜ ପଦକ ହାସଲ କରିଥିଲେ। ଏବେ ଲଭଲିନା ଆହୁରି ଉନ୍ନତ ପ୍ରଦର୍ଶନ କରି ରୌପ୍ୟ କିମ୍ବା ସ୍ବର୍ଣ୍ଣ ପଦକ ହାସଲ କରିବା ଲକ୍ଷ୍ୟରେ ରହିଛନ୍ତି। ଭାରତ ତରଫରୁ ଅନ୍ୟତମ ମହିଳା ବକ୍ସର ସମରନଜିତ କୌର ୬୦ କେ.ଜି. ବର୍ଗରେ ପ୍ରି- କ୍ୱାର୍ଟର ଫାଇନାଲରେ ଥାଇଲାଣ୍ଡର ସୁଡାପୋର୍ନ ସିସୋଣ୍ଡିଙ୍କଠାରୁ ୦-୫ରେ ପରାସ୍ତ ହୋଇ ବିଦାୟ ନେଇଥିଲେ।


Enter your email to get our daily news in your inbox.

All Right Reserved By Dharitri.Com

Posted inଖେଳ View All

ରାଜସ୍ଥାନର କ୍ରମାଗତ ଦ୍ୱିତୀୟ ବିଜୟ

ଜୟପୁର,୨୮ା୩: ଜୟପୁରର ସଓ୍ବାଇ ମାନସିଂ ଷ୍ଟାଡିୟମରେ ଗୁରୁବାର ଖେଳାଯାଇଥିବା ୯ତମ ଆଇପିଏଲ୍‌ ମ୍ୟାଚରେ ଦିଲ୍ଲୀ କ୍ୟାପିଟାଲ୍ସକୁ ୧୨ ରନ୍‌ରେ ହରାଇ କ୍ରମାଗତ ଦ୍ୱିତୀୟ ବିଜୟୀ ହୋଇଛି...

ଦିଲ୍ଲୀକୁ ୧୮୬ ରନର ଟାର୍ଗେଟ୍‌ ଦେଲା ରାଜସ୍ଥାନ

ଜୟପୁର,୨୮।୩: ଦିଲ୍ଲୀ କ୍ୟାପିଟାଲ ଏବଂ ରାଜସ୍ଥାନ ରୟାଲ ମଧ୍ୟରେ ଖେଳାଯାଉଥିବା ୯ମ ମ୍ୟାଚରେ ଦିଲ୍ଲୀକୁ ୧୮୬ ରନର ଲକ୍ଷ୍ୟ ଦେଇଛି ରାଜସ୍ଥାନ। ଏହି ମ୍ୟାଚ ଜୟପୁରର...

କେଶବ ମହାରାଜଙ୍କୁ ଦଳରେ ସାମିଲ କଲା ରାଜସ୍ଥାନ ରୟାଲ୍ସ, କେକେଆର ଆଣିଲା ୧୬ ବର୍ଷ ବୟସ୍କ ଆଫଗାନିସ୍ତାନ ସ୍ପିନର

ନୂଆଦିଲ୍ଲୀ ,୨୮।୩: ଆହତ ପ୍ରସିଦ୍ଧ କ୍ରିଷ୍ଣାଙ୍କ ସ୍ଥାନରେ ବଦଳ ଖେଳାଳି ଭାବେ ରାଜସ୍ଥାନ ରୟାଲ୍ସ ଦକ୍ଷିଣ ଆଫ୍ରିକାର ସ୍ପିନର କେଶବ ମହାରାଜଙ୍କୁ ଦଳରେ ସାମିଲ କରିଛି।...

ଇତିହାସ ରଚିଲେ ରିଷଭ ପନ୍ତ, ଏଭଳି କରିବାରେ ହେଲେ ୭ମ ଖେଳାଳି

ଜୟପୁର,୨୮।୩: ୨୦୨୪ ଆଇପିଏଲର ୧୭ ତମ ସିଜନରେ ପ୍ରାୟ ପ୍ରତ୍ୟେକ ମ୍ୟାଚରେ ନୂଆ ରେକର୍ଡ ସୃଷ୍ଟି ହେଉଛି । ଜୟପୁରର ସୱାଇ ମାନ ସିଂ ଷ୍ଟାଡିୟମରେ...

ମୁମ୍ବାଇ ଇଣ୍ଡିଆନ୍ସ ପାଇଁ ଖରାପ ଖବର, ଏହି ଗୁରୁତ୍ୱପୂର୍ଣ୍ଣ ଖେଳାଳିଙ୍କ ଫେରିବା କଷ୍ଟକର

ନୂଆଦିଲ୍ଲୀ,୨୮।୩: ସନରାଇଜର୍ସ ହାଇଦ୍ରାବାଦ ବିପକ୍ଷରେ ପରାଜୟ ପରେ ମୁମ୍ବାଇ ଇଣ୍ଡିଆନ୍ସ ପାଇଁ ଆଉ ଏକ ଖରାପ ଖବର ଆସିଛି। ଦଳର ଷ୍ଟାର ବ୍ୟାଟର ସୂର୍ଯ୍ୟକୁମାର ଯାଦବ...

ହାର୍ଦ୍ଦିକ ପାଣ୍ଡ୍ୟାଙ୍କୁ ଭିଲିଆନ୍‌ ସଜେଇଲେ ଏହି କ୍ରିକେଟର୍‌: କହିଦେଲେ ଏମିତି କଥା

ହାଇଦ୍ରାବାଦ୍‌,୨୮।୩: ମୁମ୍ବାଇ ଇଣ୍ଡିଆନ୍ସକୁ ସନରାଇଜର୍ସ ହାଇଦ୍ରାବାଦ ବିପକ୍ଷରେ ପରାଜୟର ସାମ୍ନା କରିବାକୁ ପଡିଛି। ହାର୍ଦ୍ଦିକ ପାଣ୍ଡ୍ୟାଙ୍କ ଅଧିନାୟକତ୍ୱକୁ ନେଇ ପ୍ରଶ୍ନ ଉଠିଛି। ଏଥି ସହ ବର୍ତ୍ତମାନ...

ରୋହିତଙ୍କୁ ସମ୍ଭାଳିବାକୁ ପଡିଲା ମୁମ୍ବାଇ ଇଣ୍ଡିଆନ୍ସର ଅଧିନାୟକତ୍ୱ! ପାଣ୍ଡ୍ୟାଙ୍କୁ କହିଲେ…

ନୂଆଦିଲ୍ଲୀ,୨୮।୩: ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ସନରାଇଜର୍ସ ହାଇଦ୍ରାବାଦ ୨୦ ଓଭରରେ ୩ ଉଇକେଟ୍‌ ହରାଇ ୨୭୭ ରନ୍‌ ସଂଗ୍ରହ କରିଥିଲା। ଆଇପିଏଲ ଇତିହାସରେ ଏହା ହେଉଛି...

ପାଣ୍ଡ୍ୟାଙ୍କୁ ଗାଳି, ଗାଏକଓ୍ବାଡଙ୍କ ପାଇଁ ତାଳି…ଅଧିନାୟକ ଦାୟିତ୍ୱ କିଭଳି ଦିଆଯାଏ ଧୋନୀଙ୍କଠାରୁ ଶିଖିବା ଉଚିତ

ନୂଆଦିଲ୍ଲୀ,୨୮।୩: ଆଇପିଏଲ୍‌ରେ ମାର୍ଚ୍ଚ ୨୪ ଏବଂ ୨୬ର ଦୃଶ୍ୟ ବହୁତ କିଛି ବୟାନ କରୁଛି। ପ୍ରଥମେ ମାର୍ଚ୍ଚ ୨୪ ବିଷୟରେ କଥା ହେବା। ଏହି ଦିନ...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri