ପାରାଦୀପ ୨୧।୨(ଶରତ ରାଉତ): ପାରାଦୀପ ନିକଟସ୍ଥ ସମୁଦ୍ର କୂଳରେ ଏବେ କିଛି ଦିନ ହେଲା ମୃତ ଅଲିଭରିଡ୍ଲେ କଇଁଛ ସଂଖ୍ୟା ଅଧିକ ଦେଖିବାକୁ ମିଳୁଛି। ଉକ୍ତ କଇଁଛଗୁଡ଼ିକୁ ବୁଲା କୁକୁର ଖାଉଛନ୍ତି। ଏପରିସ୍ଥିତି ଯୋଗୁ ବେଳାଭୂମିରେ ଦୁର୍ଗନ୍ଧ ହେଉଛି। ପ୍ରାୟ ୧୫ ଦିନ ହେଲା ଏଭଳି ସ୍ଥିତି ଲାଗିରହିଛି। ଅପରପକ୍ଷେ କଇଁଛ ମରିବାର କାରଣ ଏପର୍ଯ୍ୟନ୍ତ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ସ୍ପଷ୍ଟ କରାଯାଇନାହିଁ। କାରଣ ଏପର୍ଯ୍ୟନ୍ତ କୌଣସି ମୃତ କଇଁଛଙ୍କ ବ୍ୟବଚ୍ଛେଦ ହୋଇପାରୁନାହିଁ। ପ୍ରାଣୀଧନ ଚିକିତ୍ସକମାନେ ଆନ୍ଦୋଳନ ଜାରି ରଖିଥିବାରୁ ଏପରି ହୋଇଛି ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି। ଯେଉଁ କଇଁଛଗୁଡିକ କୂଳରେ ମରିପଡ଼ିଛନ୍ତି, ସେଥିରେ କାହାର କ୍ଷତ ରହିଛି ତ କାହା ବେକରେ ଜାଲ ଲାଗିଛି।
ସୂଚନାଯୋଗ୍ୟ, ବିରଳ ଅଲିଭରିଡ୍ଲେ କଇଁଛଙ୍କ ସୁରକ୍ଷା ପାଇଁ ବିଶ୍ୱସ୍ତରରେ କଟକଣା ଜାରି କରାଯାଇଛି। ଏପରିକି ଭାରତରେ ପ୍ରତିବର୍ଷ ନଭେମ୍ବର ୧ ରୁ ପରବର୍ଷ ମେ ୩୧ ପର୍ଯ୍ୟନ୍ତ ଉପକୂଳରେ କଟକଣା ଜାରି କରାଯାଏ। ଅର୍ଥାତ୍ କୂଳଠାରୁ ୬ କି.ମି. ସମୁଦ୍ର ପର୍ଯ୍ୟନ୍ତ କୌଣସି ମାଛଧରା ବୋଟ୍ ମାଛ ଧରିବେ ନାହିଁ। ଏଥିସହ ଗହୀରମଥା, ଋ଼ଷିକୁଲ୍ୟା ମୁହାଣ, ବରୁଣେଇ ମୁହାଣ ଆଦି ଅଞ୍ଚଳରେ ବୋଟ ଯାତାୟାତ ଉପରେ ଅଙ୍କୁଶ ଲଗାଯାଇଛି। ଏହାସତ୍ତ୍ୱେ କିଛି ମାଛଧରା ବୋଟ ଓ ଛୋଟ ଡଙ୍ଗା ମାଧ୍ୟମରେ କଟକଣା ଅଞ୍ଚଳରେ ମାଛ ଧରାଯାଉଛି । ରାଜନଗର ବନଖଣ୍ଡ ପକ୍ଷରୁ ଅଧିକାଂଶ ସମୟରେ ବୋଟ ମଧ୍ୟ ଜବତ ହେଉଛି। ଫଳରେ ଶତାଧିକ ବିରଳ କଇଁଛ ମରୁଥିବା ଆଶଙ୍କା କରାଯାଉଛି। ଏବେ ସେହି ମୃତ କଇଁଛଗୁଡ଼ିକୁ କୁଜଙ୍ଗ ବନାଞ୍ଚଳ କର୍ମଚାରୀମାନେ ବାଲିରେ ଗାତ ଖୋଳି ପୋତି ଦେଉଛନ୍ତି। କଇଁଛ ମରିବା ସମ୍ପର୍କରେ ବନାଞ୍ଚଳ ଅଧିକାରୀ ରଞ୍ଜନ ମିଶ୍ର କୁହନ୍ତି, ଆମେ ଯଥା ସମ୍ଭବ ପାଟ୍ରୋଲିଂ ଓ ସୁରକ୍ଷା ସମ୍ପର୍କରେ ସତର୍କତା ଅବଲମ୍ବନ କରୁଛୁ। ତଥାପି କଇଁଛ ମରୁଛନ୍ତି। ଚଳିତ ବର୍ଷ ବ୍ୟବଚ୍ଛେଦ ରିପୋର୍ଟ ଆସି ନ ଥିବାରୁ କାରଣ ଜଣାପଡ଼ିନାହିଁ।
