ଯାଜପୁର,୨୧।୨(ହର୍ଷବର୍ଦ୍ଧନ ବେହେରା) : ଯାଜପୁର ରୋଡରୁ ଧାମରା ରେଳପଥ ପ୍ରକଳ୍ପ ଲାଗି ଟଙ୍କା ନାହିଁ। ମାତ୍ର ପୁରୀ-କୋଣାର୍କ ରେଳପଥ ଲାଗି ୪୯୨ କୋଟି ଟଙ୍କ ମଞ୍ଜୁର କରିଛନ୍ତି। ଏହାକୁ ସ୍ବାଗତ କରୁଥିବାବେଳେ ରେଳମନ୍ତ୍ରୀ ଦୀର୍ଘଦିନର ଦାବି ଯାଜପୁର, ଭଦ୍ରକ ଓ କେନ୍ଦ୍ରାପଡା ଜିଲାବାସୀଙ୍କୁ ପ୍ରତାରିତ କରିବା ଅତ୍ୟନ୍ତ ଦୁର୍ଭାଗ୍ୟଜନକ ଅଟେ ବୋଲି ଯାଜପୁର ରୋଡ-ଧାମରା ରେଳପଥ ସଂଗ୍ରାମ ପରିଷଦ ପକ୍ଷରୁ ଅଭିଯୋଗ କରାଯାଇଛି। ପରିଷଦର ସଂଯୋଜକ ପଦ୍ମାକର ଗୁରୁ ଏକ ବିଜ୍ଞପ୍ତିରେ ଆହୁରି ଜଣାଇଛନ୍ତି, କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ମଙ୍ଗଳବାର ଏକ ଖବରଦାତା ସମ୍ମିଳନୀରେ ପୁରୀରୁ କୋଣାର୍କ ଦୀର୍ଘ ପ୍ରାୟ ୩୨ କିଲୋମିଟର ରେଳପଥକୁ ମଞ୍ଜୁରୀ ଦେବା ସହ ଏହି ପ୍ରକଳ୍ପର କାର୍ଯ୍ୟକୁ ତ୍ୱରାନ୍ବିତ କରିବା ଲାଗି ୪୯୨ କୋଟି ଟଙ୍କା ମଞ୍ଜୁର କରିଛନ୍ତି। ମାତ୍ର ଯାଜପୁର ରୋଡ-ଧାମରା ଦୀର୍ଘ ପ୍ରାୟ ୯୬ କିଲୋମିଟର ରେଳପଥର ଆରଓଆର ୨୭.୩୭ ପ୍ରତିଶତ ଥିବା ସତ୍ତ୍ୱେ ବଜେଟରେ କିମ୍ବା ଉକ୍ତ ଖବରଦାତା ସମ୍ମିଳନୀରେ କୌଣସି ଅର୍ଥ ଘୋଷଣା ନ କରିବା ପାତର ଅନ୍ତର ନୀତିକୁ ସୂଚାଉଛି।
ଯାଜପୁର ରୋଡ-ଧାମରା ଭାୟା ବିରଜାକ୍ଷେତ୍ର, ଆରଡ଼ି, ଚାନ୍ଦବାଲି, ଭିତରକନିକା ଦେଇ ଧାମରା ପ୍ରକଳ୍ପ ପ୍ରତି ଉପେକ୍ଷା ମନ୍ତ୍ରୀଙ୍କ ବୈମାତୃକ ମାନସିକତାର ପରିଚୟ। ଏହି ରେଳପଥ ନିର୍ମାଣ କରାଗଲେ ଉପରୋକ୍ତ ୩ ଜିଲାର ପ୍ରାୟ ୧୨ ଲକ୍ଷ ଲୋକ ଉପକୃତ ହୋଇ ପାରିବେ। ତେଣୁ ଏହି ପ୍ରସ୍ତାବିତ ପ୍ରକଳ୍ପକୁ ତ୍ୱରାନ୍ବିତ କରିବା ପାଇଁ ରେଳମନ୍ତ୍ରୀ ଅନୂନ୍ୟ କିଛି ଟଙ୍କା ବି ଘୋଷଣା କରିପାରିଥାନ୍ତେ । ମାତ୍ର ହୀନ ରାଜନୈତିକ ମନୋଭାବ ପୋଷଣ କରି ଏହି ଜିଲାବାସୀଙ୍କ ପ୍ରତି କୁଠାରଘାତ କରିଛନ୍ତି। ଏହି ରେଳପଥର ଅଗ୍ରଗତି ପାଇଁ ଭାଜପା ଓ ବିଜେଡିର କୋଳାକୋଳି ନୀତିରେ ଉଭୟ ଦଳର ନେତାମାନଙ୍କ ନୀରବତା ଆହୁରି ଚକିତ କରୁଛି । ଏହି ୩ ଜିଲାର ଭାଜପା ନେତାମାନେ ଆଗରୁ ଶ୍ରେୟ ନେବାଲାଗି ଯାଜପୁର ରୋଡରୁ ଧାମରା ରେଳପଥ ନିର୍ମାଣ ପାଇଁ ପୋଷ୍ଟର ଓ ହୋର୍ଡିଂ ଲଗାଉଥିଲେ । ମାତ୍ର ବଜେଟ୍ ଘୋଷଣା ପରେ ସେମାନଙ୍କ ଅହେତୁକ ନୀରବତା କେବଳ ହୀନ ରାଜନୈତିକ ଛଡ଼ା ଆଉ କିଛି ନାହିଁ । ରେଳମନ୍ତ୍ରୀଙ୍କ ଏପରି ପାତରଅନ୍ତର ନିଷ୍ପତ୍ତି ବିରୋଧରେ ଆସନ୍ତା ୨୯ ତାରିଖ ପୂର୍ବାହ୍ନ ୧୧ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ଯାଜପୁର ରୋଡ଼-ଧାମରା ରେଳପଥ ସଂଗ୍ରାମ ପରିଷଦ ପକ୍ଷରୁ ଯାଜପୁର ଟାଉନ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଜନ ଜାଗରଣ ସମାବେଶ ଅନୁଷ୍ଠିତ ହେବ। ଏହାସହ ସେହିଦିନ ଧାମରା ଠାରେ ଅପରାହ୍ନ୪ଟା୩୦ରୁ ସନ୍ଧ୍ୟା ୬ ଟା ୩୦ ପର୍ଯ୍ୟନ୍ତ ଜନ ସାଧାରଣ, ବୁଦ୍ଧିଜୀବୀ, ସଚେତନ ନାଗରିକ ମାନଙ୍କୁ ଏକାଠି କରାଯିବ। ରେଳମନ୍ତ୍ରୀଙ୍କ କୁଶ ପୁତ୍ତଳିକା ଦାହ କରାଯିବ ବୋଲି ପରିଷଦର ସଂଯୋଜକ ଗୁରୁ ଉକ୍ତ ପ୍ରେସ ବିଜ୍ଞପ୍ତିରେ ପ୍ରକାଶ କରିଛନ୍ତି ।
