ଦିଗପହଣ୍ଡି,୮।୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଭୀଷ୍ମଗିରି ଗ୍ରାମର କନ୍ତାରୁ ବକ୍ସି(୮୩) ନାମକ ଜଣେ ବୃଦ୍ଧଙ୍କୁ ଗତ ୭ ମାସ ହେଲା ଭତ୍ତା ଟଙ୍କା ନ ମିଳିବାରୁ ସେ ଦିଗପହଣ୍ଡି ଥାନାରେ ଏତଲା ଦେଇଥିବା ଜଣାପଡିଛି। ବାର୍ଦ୍ଧକ୍ୟ ଭତ୍ତା ପାଉଥିବା କନ୍ତାରୁ ୮୩ ବର୍ଷ ଅତିକ୍ରାନ୍ତ କରିଥିବାରୁ ବର୍ଦ୍ଧିତ ଭତ୍ତା ୩୫୦୦ ଟଙ୍କା ପାଉଥିଲେ। ଦିଗପହଣ୍ଡି ସ୍ଥିତ ଭାରତୀୟ ଷ୍ଟେଟବ୍ୟାଙ୍କ ଶାଖା ଜରିଆରେ ପୂର୍ବରୁ ତାଙ୍କ ଜମା ଖାତାକୁ ଭତ୍ତା ଅର୍ଥରାଶି ନିୟମିତ ଭାବେ ଆସୁଥିବା ବେଳେ କିଛି ମାସ ହେଲା ସେ ପଞ୍ଚାୟତ କାର୍ଯ୍ୟାଳୟ ଜରିଆରେ ଏହି ଭତ୍ତା ଟଙ୍କା ପାଉଥିଲେ। ଗତ ଫେବୃଆରୀ ମାସ ଠାରୁ ଜୁଲାଇ ପର୍ଯ୍ୟନ୍ତ ୭ ମାସର ଭତ୍ତା ଟଙ୍କା ତାଙ୍କୁ ମିଳିନଥିବାରୁ ତାଙ୍କ ଜୀବିକାନିର୍ବାହ କରିବା କଷ୍ଟକର ହୋଇପଡିଛି। ରାଜ୍ୟ ପଞ୍ଚାୟତିରାଜ ଓ ପାନୀୟ ଜଳ ବିଭାଗର ନିୟମ ଅନୁଯାୟୀ ଯେଉଁ ହିତାଧିକାରୀଙ୍କ ବୟସ ୮୦ ବର୍ଷରୁ ଅଧିକ ଏବଂ ସେମାନେ ପଞ୍ଚାୟତ କାର୍ଯ୍ୟାଳୟକୁ ଆସିପାରିବେ ନାହିଁ ସେମାନଙ୍କୁ ବ୍ଲକ କାର୍ଯ୍ୟାଳୟ କର୍ମଚାରୀ ଘରକୁ ଯାଇ ଭତ୍ତା ଟଙ୍କା ପ୍ରଦାନ କରିବେ। ଭୀଷ୍ମଗିରି ପଞ୍ଚାୟତ ନିର୍ବାହୀ ଅଧିକାରୀ ପ୍ରଦୀପ କୁମାର ପଣ୍ଡା ବୃଦ୍ଧ କନ୍ତାରୁଙ୍କୁ ଗତ୭ ମାସ ହେଲା ଭତ୍ତା ଟଙ୍କା ପ୍ରଦାନ କରିନାହାନ୍ତି । ଭୀଷ୍ମଗିରି ପଞ୍ଚାୟତକୁ ସରପଞ୍ଚ ଗାୟତ୍ରୀ ବ୍ରହ୍ମା ଓ ପଞ୍ଚାୟତ ନିର୍ବାହୀ ଅଧିକାରୀ ନିୟମିତ ଯାଉନଥିବା କାରଣରୁ ସେ ବାରମ୍ବାର ପଞ୍ଚାୟତ କାର୍ଯ୍ୟାଳୟକୁ ଯାଇଥିଲେ ମଧ୍ୟ ଉଭୟଙ୍କ ଦେଖା ମିଳୁନାହିଁ ବୋଲି ସେ କ୍ଷୋଭ ପ୍ରକାଶ କରିଛନ୍ତି। ପଞ୍ଚାୟତ ନିର୍ବାହୀ ଅଧିକାରୀ ପ୍ରଦୀପ କୁମାର ପଣ୍ଡାଙ୍କୁ ପଚାରିବାରୁ ପୂର୍ବରୁ ବୈଷୟିକ ତ୍ରୁଟି କାରଣରୁ ରାଜ୍ୟସାରା ଭତ୍ତା ଟଙ୍କା ଉଠାଣ ରେ ସମସ୍ୟା ରହିଥିଲା। ଗତ ଜୁଲାଇ ୧୮ ତାରିଖରେ ଭତ୍ତା ଟଙ୍କା ମିଳୁନଥିବା ନେଇ କନ୍ତାରୁ ବିଡ଼ିଓ ଅନାମିକା ପାଣ୍ଡେଙ୍କୁ ଲିଖିତ ଭାବେ ଜଣାଇଥିଲେ। ବିଡ଼ିଓ ତାଙ୍କୁ ବ୍ଲକ କାର୍ଯ୍ୟାଳୟ ଚ୍ୟାମ୍ବରକୁ ଡକାଇ ସମସ୍ତ ନଥି ପତ୍ର ନେଇ ଦେଖିବା ପରେ ସବୁ ଠିକ ଥିବା କହିଥିଲେ। ବିଡ଼ିଓଙ୍କ ନିର୍ଦ୍ଦେଶକ୍ରମେ ଜୁଲାଇ ୨୦ ତାରିଖରେ ଗତ ଫେବୃଆରୀ ଠାରୁ ଜୁନ ମାସ ଯାଏଁ ୬ ମାସର ତାଙ୍କ ଭତ୍ତା ଟଙ୍କା ଉଠାଣ କରାଯାଇଥିଲା।ସେ ଭତ୍ତା ଟଙ୍କା ନେବା ପାଇଁ ପଞ୍ଚାୟତ କାର୍ଯ୍ୟାଳୟକୁ ଆଦୌ ଆସିନଥିଲେ। ପରେ ସେ ଏନେଇ ଥାନାରେ ଏତଲା ଦେବା କଥା ବିଡ଼ିଓଙ୍କୁ ଜଣାଇଥିଲେ। ବିଡ଼ିଓ ଦିଗପହଣ୍ଡି ଥାନା ଆଇଆଇସି କିଶୋର କୁମାର ସାମଲଙ୍କ ସହ ଏନେଇ ସବିଶେଷ କଥା ହୋଇଥିଲେ। କନ୍ତାରୁଙ୍କୁ ତୁରନ୍ତ ଭତ୍ତା ଟଙ୍କା ତାଙ୍କୁ ପ୍ରଦାନ ନିମନ୍ତେ ବିଡ଼ିଓ କହିବାରୁ ଗୁରୁବାର ତାଙ୍କ ଭୀଷ୍ମଗିରି ଗ୍ରାମ ଜଳସେଚନ କାର୍ଯ୍ୟାଳୟ ନିକଟ ଘରକୁ ଯାଇଥିଲେ। ସେ ଭତ୍ତା ଟଙ୍କା ନଗଦ ଅର୍ଥରାଶି ଗ୍ରହଣ କରିବାକୁ ସିଧା ସଳଖ ମନାକରିଦେଇଥିଲେ। ତାଙ୍କୁ ବ୍ୟାଙ୍କ ଜମାଖାତା ଦ୍ୱାରା ଭତ୍ତା ଟଙ୍କା ପ୍ରଦାନ କରିବାକୁ ଅନୁରୋଧ କରିଥିଲେ। ତେବେ ବୃଦ୍ଧ ଜଣକ ଭତ୍ତା ଟଙ୍କା ପାଇବାରେ ଅହେତୁକ ବିଳମ୍ବ ଏବଂ ପ୍ରଶାସନିକ ହଟଚମଟକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର୍ ଧରିଛି ।
