ପୁରୁଷୋତ୍ତମପୁର,୨୮। (ସବିତା ମିଶ୍ର) : ଗଞ୍ଜାମ ଜିଲା ପୁରୁଷୋତ୍ତମପୁର ରଥସାହିରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଏଠାରେ ପରିବାର ଓ ବନ୍ଧୁବର୍ଗଙ୍କ ମାନବିକତା ହଜିଯାଇଛି । ସବୁଥାଇ ମଧ୍ୟ ପରିବାର ଓ ସମ୍ପର୍କୀୟମାନେ ମୃତଦେହକୁ କାନ୍ଧ ଦେଲେନାହିଁ। ମୁହଁମୋଡି ଯେ ଯାହା ବାଟରେ ଚାଲିଗଲେ। ଏହାକୁ ନେଇ ସାହିବାସିନ୍ଦା ମଧ୍ୟରେ ତୀବ୍ର ପ୍ରତିକ୍ରିୟା ଦେଇଥିବାବେଳେ ଶେଷରେ ଥାନା ଆଇଆଇସି କୁଳମଣି ସେଠି ଓ ସାହିର ଯୁବଗୋଷ୍ଠିଙ୍କ ସହାୟତାରେ ବୁଧବାର ମୃତଦେହ ସତ୍କାର କରାଯାଇଛି। ଏଭଳି କାର୍ଯ୍ୟରେ ଥାନା ଆଇଆଇସିଙ୍କ ସହାୟତାର ମହାନତାକୁ ନେଇ ଜନସାଧାରଣ ସାଧୁବାଦ ଜଣାଇଛନ୍ତି। ମୃତ ବୃଦ୍ଧା ଜଣକ ହେଲେ ଇନ୍ଦିରା ପଟ୍ଟନାୟକ (୭୫) ।ଘଟଣାରୁ ଜାଣିବାକୁ ମିଳିଛି ଯେ, ଦୀର୍ଘ ୪୦ ବର୍ଷ ତଳେ କୁକୁଡାଖଣ୍ଡି ଗ୍ରାମର ଚନ୍ଦ୍ରଶେଖର ପଟ୍ଟନାୟକ ପୁରୁଷୋତ୍ତମପୁରକୁ ଶିକ୍ଷକତା କରିବାକୁ ଆସି ରଥସାହିରେ ଘରଦ୍ବାର କରି ପତ୍ନୀ ଇନ୍ଦିରାଙ୍କ ସମେତ ଦୁଇପୁଅ ଶୁଶାନ୍ତ (୫୫) ଓ ପ୍ରଶାନ୍ତ(୫୨)ଙ୍କୁ ନେଇ ବସବାସ କରୁଥିଲେ। ଇତି ମଧ୍ୟରେ ଦୁଇପୁଅ ମାନସିକ ବିକାରଗ୍ରସ୍ତ ହୋଇପଡିଥିବା ବେଳେ ଚନ୍ଦ୍ରଶେଖରଙ୍କ ଗତ ବର୍ଷେ ତଳେ ମୃତ୍ୟୁ ଘଟିଥିଲା । ବୃଦ୍ଧା ଇନ୍ଦିରା ବହୁକଷ୍ଟରେ ମାନସିକ ବିକାରଗ୍ରସ୍ତ ଦୁଇପୁଅଙ୍କୁ ନେଇ ଚଳାଉଥିବା ବେଳେ ସେ କୌଣସି କାରଣରୁ ମୃତ୍ୟୁବରଣ କରି ଘରେ ପଡିରହିଥିଲେ। ହେଲେ ସାହି ପଡିଶା ଜାଣିପାରି ନଥିବା ବେଳେ ମୃତଦେହଟି ପଚିସଢି ମଙ୍ଗଳବାର ଘରୁ ଦୁର୍ଗନ୍ଧ ଆସିବାରୁ ସାହିପଡିଶା ଲୋକେ ସନ୍ଦେହ କରି ସମ୍ପର୍କୀୟଙ୍କୁ ଖବର ଦେଇଥିଲେ। ହେଲେ ବୃଦ୍ଧା ଇନ୍ଦିରାଙ୍କ ୪ ଯାଆ,ପୁତୁରା ଓ ସମ୍ପର୍କୀୟମାନେ କୁକୁଡାଖଣ୍ଡି ଗ୍ରାମରୁ ଆସିଥିବା ବେଳେ ମୃତଦେହକୁ ନେଇ ସତ୍କାର କରିବା ବଦଳରେ ମୁହଁ ମୋଡି ଲୁଚି ଚାଲିଯାଇଥିଲେ । ଶେଷରେ ରଥସାହିର ଯୁବଗୋଷ୍ଠୀ ପୁରୁଷୋତ୍ତମପୁର ତହସିଲଦାର ବିନୋଦ କୁମାର ବେହେରା ଓ ଆଇଆଇସି କୁଳମଣି ସେଠୀଙ୍କୁ ଜଣାଇ ସହଯୋଗ ଲୋଡିଥିଲେ। ତହସିଲଦାର ଓ ଆଇଆଇସି ଘଟଣାସ୍ଥଳକୁ ଆସି ଏହାକୁ ଗୁରୁତର ସହ ନେଇ ମୃତଦେହକୁ ଜବତ କରି ଅପମୃତ୍ୟୁ ମାମଲା ୧୯/୨୬ ପ୍ରକାରେ ପୁରୁଷୋତ୍ତମପୁର ଗୋଷ୍ଠି ସ୍ବାସ୍ବ୍ୟକେନ୍ଦ୍ରକୁଆଣି ବ୍ୟବଚ୍ଛେଦ କରାଇଥିଲେ। ଏହାପରେ ସାହିର ଯୁବଗୋଷ୍ଠୀ ମୃତଦେହକୁ ସତ୍କାର କରିଥିଲେ । ହେଲେ ଦୁଇପୁଅ ମାନସିକ ବିକାରଗ୍ରସ୍ତ ହୋଇଥିବା ହେତୁ ଏମାନେ ବଞ୍ଚିବା ଲାଗି ସରକାର ଓ ଜିଲାପ୍ରଶାସନ ସହାୟତାର ହାତ ବଢାଇ ଏମାନଙ୍କୁ ଥଇଥାନ ଲାଗି ପଦକ୍ଷେପ ନେବାକୁ ଜନସାଧାରଣ ଦାବି କରିଛନ୍ତି ।
Odisha’s No.1 Odia Daily
