ବରଗଡ,୧।୫(ପ୍ରେମାନନ୍ଦ ଖମାରୀ): ବରଗଡ଼ ବହୁଚର୍ଚ୍ଚିତ ଲେଙ୍ଗୁ ମିଶ୍ର ଛକରୁ ପୁରୁଣା ଜିରାବ୍ରିଜ ରାସ୍ତା ଜବରଦଖଲ ଉଚ୍ଛେଦ ଦାବି ପୁଣି ତେଜି ଉଠିଛି। ଏହି ଦାବି ନେଇ ବରଗଡ଼ ନାଗରିକ ମଞ୍ଚର ଏକ ପ୍ରତିନିଧି ଦଳ ଜିଲାପାଳ ଆଦିତ୍ୟ ଗୋୟଲଙ୍କୁ ଫେରାଦ ହୋଇଛନ୍ତି। ଏଠାରୁ ଜବରଦଖଲ ଉଚ୍ଛେଦ ଦିଗରେ ବିହିତ ପଦକ୍ଷେପ ନେବା ପାଇଁ ସେମାନେ ଦାବି କରିଛନ୍ତି। ଦାବି ପୂରଣ ନ ହେଲେ ଆଗକୁ ଗଣତାନ୍ତ୍ରିକ ପଦ୍ଧତିରେ ଆନ୍ଦୋଳନ କରାଯିବ ବୋଲି ବରଗଡ଼ ନାଗରିକ ମଞ୍ଚ ଚେତାବନୀ ଦେଇଛି ।
ସେହିପରି ବରଗଡର ବିଭିନ୍ନ ସ୍ଥାନରେ ଜବର ଦଖଲ ଉଚ୍ଛେଦ ହେଉଥିବାବେଳେ ସହରବାସୀଙ୍କ ଦୀର୍ଘଦିନର ଦାବି ସତ୍ତ୍ବେ ବ୍ୟସ୍ତବହୁଳ ଏହି ରାସ୍ତାରୁ କାହିଁକି ଜବରଦଖଲ ଉଛେଦ ହେଉ ନାହିଁ ବୋଲି ବରଗଡ଼ ନାଗରିକ ମଞ୍ଚ ପ୍ରଶ୍ନ କରିଛି।
ଉକ୍ତ ରାସ୍ତାରୁ ଜବର ଦଖଲ ହଟାଯାଇ ରାସ୍ତା ପ୍ରଶସ୍ତିକରଣ କରିବା ସହିତ ଉଚ୍ଚ ନ୍ୟାୟାଳୟରେ ସରକାରଙ୍କ ପକ୍ଷରୁ ନିଯୁକ୍ତ ହୋଇଥିବା ଓକିଲଙ୍କୁ ତୁରନ୍ତ ପରିବର୍ତ୍ତନ କରିବାକୁ ନାଗରିକ ମଞ୍ଚ ଦାବି କରିଛି। ସେହିପରି ବରଗଡ଼ ସହର ମଧ୍ୟରେ ଥିବା ସିଏଚସି ଓ ଜିଲା ମୁଖ୍ୟ ଡାକ୍ତରଖାନାରେ ସ୍ବାସ୍ଥ୍ୟ ବ୍ୟବସ୍ଥା ସୁଦୃଢ କରିବା, ସହର ମଧ୍ୟରେ ଜଳାଶୟ ଗୁଡିକର ପୁନଃରୁଦ୍ଧାର, ବନ୍ଧକଟା ଗୁଡିକୁ ଜବରଦଖଲ ମୁକ୍ତ କରିବା, ପରିମଳ ବ୍ୟବସ୍ଥାକୁ ସୁଦୃଢ କରିବା, କ୍ୟାନସର ହସ୍ପିଟାଲକୁ ପୂର୍ଣ୍ଣ କାର୍ଯ୍ୟକ୍ଷମ କରିବା, ଧାନବିକ୍ରିରୁ ବଞ୍ଚିତ ଚାଷୀଙ୍କ ଖରିଫ ଧାନ ଶୀଘ୍ର କିଣିବା, ଗ୍ରୀଷ୍ମ ଦିନରେ ପାନୀୟ ଜଳ ବ୍ୟବସ୍ଥା କରିବା, ଜବରଦଖଲ ଉଚ୍ଛେଦରେ ବିସ୍ଥାପିତମାନଙ୍କୁ ଶୀଘ୍ର ଥଇଥାନ କରିବାକୁ ମଞ୍ଚ ଦାବି କରିଛି। ମଞ୍ଚର ସଭାପତି ଭୀଷ୍ମଦେବ ସରାଫଙ୍କ ନେତୃତ୍ୱରେ ସମ୍ପାଦକ ଭବାନୀ ସାହୁ, ଶୟନ ପଣ୍ଡା, ଟିଙ୍କୁ ନନ୍ଦ, ନିତ୍ୟାନନ୍ଦ ବାଗ, ସୁରଥ ସାହୁ, ଶିବାନନ୍ଦ ମଟାରୀ, ଜିଭି ରାଓ, ଗଙ୍ଗା ପୂଝରୀ, ଲିଙ୍ଗରାଜ ପୁରୋହିତ, ବାସୁଦେବ ଦାଶ, ଜୀବନ ଲାଲ ଚୌଧୁରୀ, ମୁକୁନ୍ଦ ତାଣ୍ଡି, ସୁଜିତ କନ୍ଧେର, ମକରଧଜ ମେହେର, ରତନ ତାଣ୍ଡି, ରବି ପାଠୀ ପ୍ରମୁଖ ଦାବିପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।
Dharitri – Odisha’s No.1 Odia Daily
