ଭୁବନେଶ୍ୱର, ୨୭।୩(ବ୍ୟୁରୋ)- ପଚାଶ କିମ୍ବା ତଦୂଦ୍ଧ୍ୱର୍ର୍ ମହିଳା କର୍ମଚାରୀ କାର୍ଯ୍ୟ କରୁଥିବା ସରକାରୀ ସଂସ୍ଥାରେ କ୍ରେଚ୍ ବ୍ୟବସ୍ଥା କରିବାକୁ ଓଡ଼ିଶା ମାନବିକ ଅଧିକାର କମିଶନ(ଓଏଚ୍ଆର୍ସି) ପକ୍ଷରୁ ସରକାରଙ୍କୁ ସୁପାରିସ କରାଯାଇଛି। ମହିଳା କର୍ମଚାରୀଙ୍କ ଶିଶୁଙ୍କ ପାଇଁ ମାତୃତ୍ୱ ସୁବିଧା ଆଇନ ଅନୁଯାୟୀ ଏହି ନିଷ୍ପତ୍ତି ନିଆଯାଇଛି। କମିଶନ ଅଧ୍ୟକ୍ଷ ଜଷ୍ଟିସ୍ ବିଜୟକୃଷ୍ଣ ପଟେଲ, ସଦସ୍ୟ ଜଷ୍ଟିସ୍ ରଘୁବୀର ଦାଶ ଏବଂ ଅସୀମ ଅମିତାଭ ଦାଶଙ୍କୁ ନେଇ ଗଠିତ ପୂର୍ଣ୍ଣାଙ୍ଗ ଖଣ୍ଡପୀଠ ପକ୍ଷରୁ ଏହି ନିର୍ଦ୍ଦେଶ ଦିଆଯାଇଛି। ଆସନ୍ତା ୬ ମାସ ମଧ୍ୟରେ ଏହାକୁ କାର୍ଯ୍ୟକାରୀ କରିବା ପାଇଁ ମହିଳା ଓ ଶିଶୁ ବିକାଶ ବିଭାଗ ପ୍ରମୁଖ ଶାସନ ସଚିବଙ୍କୁ କମିଶନ ନିଦ୍ଦେର୍ର୍ଶ ଦେଇଛନ୍ତି। ବିଜୟ କୁମାର ପଣ୍ଡା, ଗୋଲେଖ ପ୍ରସାଦ ନାୟକ, ସୁଭାଶିଷ ପଣ୍ଡା, ପ୍ରକାଶ ଚନ୍ଦ୍ର ଦାସ ଓ ବିଶ୍ବପ୍ରିୟ କାନୁନଗୋ ପ୍ରମୁଖ ଆଇନ୍ଜୀବୀମାନଙ୍କ ପକ୍ଷରୁ ଦିଆଯାଇଥିବା ପିଟିଶନ (କେସ୍ ନଂ ୨୨୬୧/୨୦୧୯) ଉପରେ ଶୁଣାଣି କରି କମିଶନ ପକ୍ଷରୁ ଏହି ରାୟ ଦିଆଯାଇଛି। ମାତୃତ୍ୱ ସୁବିଧା ଆଇନର ସଂଶୋଧିତ ଆଇନ ଧାରା-୧୧(କ) ଅନୁସାରେ ପ୍ରତ୍ୟେକ ଅନୁଷ୍ଠାନ, ଯେଉଁଥିରେ ସର୍ବନିମ୍ନ ପଚାଶ ଜଣ ମହିଳା କର୍ମଚାରୀ କାର୍ଯ୍ୟରତ, ସେମାନଙ୍କର ଶିଶୁମାନଙ୍କ ପାଇଁ କ୍ରେଚ ବ୍ୟବସ୍ଥା କରାଯିବା ବାଧ୍ୟତାମୂଳକ ରହିଛି। ଏହିଭଳି ଆଇନଗତ ବ୍ୟବସ୍ଥା ସତ୍ତ୍ୱେ ସଚିବାଳୟଠାରୁ ଆରମ୍ଭ କରି ଉଚ୍ଚ ଅଦାଲତ ପର୍ଯ୍ୟନ୍ତ କୌଣସି ସରକାରୀ କାର୍ଯ୍ୟାଳୟରେ କ୍ରେଚ୍ ବ୍ୟବସ୍ଥା ନ ଥିବା ନେଇ ୯ ଅକ୍ଟୋବର ୨୦୧୯ରେ ଓଏଚ୍ଆର୍ସିରେ ଅଭିଯୋଗ ହୋଇଥିଲା। ଏହି ଅଭିଯୋଗ ଆଧାରରେ କମିଶନଙ୍କ ପକ୍ଷରୁ ରାଜ୍ୟ ମହିଳା ଓ ଶିଶୁ ବିକାଶ ବିଭାଗକୁ ନୋଟିସ ଜାରି କରାଯାଇଥିଲା। ଏନେଇ ବିଭାଗୀୟ ପ୍ରମୁଖ ଶାସନ ସଚିବଙ୍କ ପକ୍ଷରୁ ୨୦୨୧ ନଭେମ୍ବର ୧୧ରେ ଜବାବ ଦିଆଯାଇଥିଲା। ବିଭିନ୍ନ ସରକାରୀ ସଂସ୍ଥାକୁ ବିଭାଗ ପକ୍ଷରୁ ୨୦୨୦ ଜୁଲାଇ ୨୨ରେ ଚିଠି ଲେଖାଯାଇଛି ଏବଂ ଆଇନ ଅନୁସାରେ ସଂସ୍ଥା ସବୁ କ୍ରେଚ ପାଇଁ ପଦକ୍ଷେପ ନେଉଛନ୍ତି ବୋଲି ଜଣାଇଥିବା ବିଭାଗ ପକ୍ଷରୁ କମିଶନଙ୍କୁ ସୂଚନା ଦିଆଯାଇଥିଲା।
