”କୃମି ନିୟନ୍ତ୍ରଣ ହେଲେ ରକ୍ତହୀନତା ହେବ ନାହିଁ। ଅର୍ଥାତ୍ ପିଲାଙ୍କ ଶରୀରରେ ଲୋହିତ ରକ୍ତ କଣିକାର ପରିମାଣ ବୃଦ୍ଧି ହେବ। ଏହା ସହିତ ପିଲାଙ୍କର ପୋଷଣ ସ୍ତରରେ ଉନ୍ନତି ହେବ ଓ ସେମାନଙ୍କର ପାଠ ପଢ଼ା ପ୍ରତି ଆଗ୍ରହ ବୃଦ୍ଧି
ପାଇବ। ତେଣୁ ପିଲାଙ୍କର ସମ୍ପୂର୍ଣ୍ଣ ଶାରୀରିକ ସୁସ୍ଥତା ତଥା ମାନସିକ ବିକାଶ ନିମନ୍ତେ କୃମି ନିୟନ୍ତ୍ରଣ କରିବା ନିହାତି ଆବଶ୍ୟକ।“
ସୁସ୍ଥ ଓ ନୀରୋଗ ରହିବା ପାଇଁ ଆମେ ବିଭିନ୍ନ ପ୍ରକାରର ପ୍ରତିରୋଧମୂଳକ ପଦକ୍ଷେପ ଗ୍ରହଣ କରିଥାଉ। ତେବେ ଏପରି କିଛି ରୋଗ ଅଛି, ଯାହା କି ଆମ ଅଜାଣତରେ ଆମର ଶତ୍ରୁ ପାଲଟି ଯାଇଥାଏ। ସେଥିମଧ୍ୟରୁ ଆମ ପିଲାଙ୍କୁ ହେଉଥିବା କୃମି ରୋଗ ହେଉଛି ଅନ୍ୟତମ। ପ୍ରତିବର୍ଷ ସରକାରଙ୍କ ତରଫରୁ ଜାତୀୟ କୃମିନାଶକ ଦିବସ ପାଳନ କରାଯାଇଥାଏ। ଏବେ ଆଶା ଦିଦି, ଅଙ୍ଗନୱାଡି ଦିଦି, ସ୍ବାସ୍ଥ୍ୟକର୍ମୀମାନେ ଘରକୁ ଘର ଯାଇ ୧-୧୯ ବର୍ଷର ପ୍ରତ୍ୟେକ ପିଲାଙ୍କୁ କୃମିନାଶକ ବଟିକା ମାଗଣାରେ ଦେଉଛନ୍ତି। ସାଧାରଣତଃ ପିଲାଙ୍କ କ୍ଷେତ୍ରରେ ଅନେକ ସମୟରେ କୃମି ସମସ୍ୟା ଦେଖିବାକୁ ମିଳିଥାଏ। ତେବେ ପିଲାଙ୍କର ଏହି ସମସ୍ୟା ଜାଣିବା ମାତ୍ରେ ତୁରନ୍ତ ଚିକିତ୍ସା ଆରମ୍ଭ କରିବା ଉଚିତ। ନଚେତ୍ ଏହା ଆହୁରି ବିଭିନ୍ନ ପ୍ରକାରର ରୋଗକୁ ପରୋକ୍ଷରେ ଡାକି ଆଣିଥାଏ। ତେବେ ମାଆମାନେ ପିଲାମାନଙ୍କଠାରେ କୃମି ହେବାର ଲକ୍ଷଣ ଦେଖିବା ମାତ୍ରେ ଅଭିଜ୍ଞ ଶିଶୁ ରୋଗ ବିଶେଷଜ୍ଞଙ୍କ ପରାମର୍ଶ ଅନୁସାରେ ଚିକିତ୍ସା ଆରମ୍ଭ କରିବା ଉଚିତ। ତା’ ସହ ଏହି ରୋଗର ଲକ୍ଷଣ ସମ୍ପର୍କରେ ମା’ମାନେ ଅବଗତ ହେବା ନିହାତି ଜରୁରୀ।
କୃମି ସଂକ୍ରମଣର ପ୍ରଭାବ: ପିଲାଙ୍କ କ୍ଷେତ୍ରରେ କୃମି ହୋଇଥିଲେ ରକ୍ତହୀନତା, ଭୋକ ନ ଲାଗିବା, କୁପୋଷଣ, ଦୁର୍ବଳ ଓ ଉଦ୍ବେଗ ଅନୁଭବ କରିବା, ପେଟ କାଟିବା, ବାନ୍ତି ହେବା, ତରଳ ଝାଡା ଏବଂ ଓଜନ କମି ଯିବା ଭଳି ବିଭିନ୍ନ ଲକ୍ଷଣ ଦେଖା ଦେଇଥାଏ। ତେଣୁ ଏଭଳି ଲକ୍ଷଣ ଦେଖିଲେ ବିଳମ୍ବ ନ କରି ଶିଶୁରୋଗ ବିଶେଷଜ୍ଞଙ୍କ ପରାମର୍ଶ ନେବା ଉଚିତ।
କୃମି ନିୟନ୍ତ୍ରଣ : କୃମି ନିୟନ୍ତ୍ରଣ ହେଲେ ରକ୍ତହୀନତା ହେବ ନାହିଁ। ଅର୍ଥାତ୍ ପିଲାଙ୍କ ଶରୀରରେ ଲୋହିତ ରକ୍ତ କଣିକାର ପରିମାଣ ବୃଦ୍ଧି ହେବ। ଏହା ସହିତ ପିଲାଙ୍କର ପୋଷଣ ସ୍ତରରେ ଉନ୍ନତି ହେବ ଓ ସେମାନଙ୍କର ପାଠ ପଢ଼ା ପ୍ରତି ଆଗ୍ରହ ବୃଦ୍ଧି ପାଇବ। ତେଣୁ ପିଲାଙ୍କର ସମ୍ପୂର୍ଣ୍ଣ ଶାରୀରିକ ସୁସ୍ଥତା ତଥା ମାନସିକ ବିକାଶ ନିମନ୍ତେ କୃମି ନିୟନ୍ତ୍ରଣ କରିବା ନିହାତି ଆବଶ୍ୟକ।
କୃମିନାଶକ ଔଷଧର ପ୍ରଭାବ: କୃମିନାଶକ ବଟିକା ଖାଇବା ଦ୍ୱାରା ପିଲାଙ୍କ ପୂର୍ଣ୍ଣାଙ୍ଗ ଶାରୀରିକ ଓ ମାନସିକ ଦକ୍ଷତା ବୃଦ୍ଧି ପାଇପାରିବ। କୃମିନାଶକ ବଟିକା ‘ଆଲବେଣ୍ଡାଜୋଲ’ ଖାଇବା ଦ୍ୱାରା କୌଣସି ପ୍ରତିକୂଳ ପ୍ରଭାବ ପଡେ ନାହିଁ। ଏହା ସମ୍ପୂର୍ଣ୍ଣ ନିରାପଦ। କିନ୍ତୁ ଏହି ଔଷଧକୁ ପିଲାମାନେ ବେଳେବେଳେ ଗିଳିବା ପାଇଁ ଚେଷ୍ଟା କରିବାବେଳେ ତାହା ତଣ୍ଟିରେ ଲାଖି ଯାଇଥାଏ। ତେଣୁ ଏହି ଔଷଧକୁ ସବୁବେଳେ ଚକୋଲେଟ ପରି ଖାଇବା ଉଚିତ ନଚେତ୍ ଏହାକୁ ଚୋବାଇ ଚୋବାଇ ଖାଇପାରିବେ।
ସଂକ୍ରମଣ ରୋକିବା ପାଇଁ ସଚେତନତା: କୃମି ସଂକ୍ରମଣ ରୋକିବା ପାଇଁ ସର୍ବଦା ବିଶୁଦ୍ଧ ପିଇବା ପାଣି ବ୍ୟବହାର କରିବା ଉଚିତ। ଏହା ସହିତ ଖୋଲା ସ୍ଥାନରେ ମଳତ୍ୟାଗ କରିବା ଉଚିତ ନୁହେଁ। ସବୁବେଳେ ଶୌଚାଳୟ ବ୍ୟବହାର କରନ୍ତୁ। ଏହା ସହିତ ଖୋଲା ପାଦରେ ପିଲାଙ୍କୁ ଚଲାନ୍ତୁ ନାହଁି। ସବୁ ସମୟରେ ଜୋତା କିମ୍ବା ଚପଲ ବ୍ୟବହାର କରିବାକୁ କୁହନ୍ତୁ। ଏହା ସହିତ ଘର ଚାରିପାଖର ପରିବେଶକୁ ମଧ୍ୟ ପରିଷ୍କାର ରଖନ୍ତୁ। ନିଜେ ଛୋଟ ନଖ ରଖିବା ସହିତ ପିଲାଙ୍କର ମଧ୍ୟ ଠିକ୍ ସମୟରେ ନଖ କାଟି ଦିଅନ୍ତୁ। ଖାଇବା ପୂର୍ବରୁ ଓ ଶୌଚାଳୟ ଯିବା ପରେ ସାବୁନରେ ଭଲ ଭାବରେ ହାତ ଧୋଇବାକୁ ପିଲାମାନଙ୍କୁ କୁହନ୍ତୁ। ଏହା ସହ ମାଆମାନେ ଘରେ ରାନ୍ଧୁଥିବା ଖାଦ୍ୟ ପଦାର୍ଥକୁ ସର୍ବଦା ଘୋଡ଼ାଇ ରଖିନ୍ତୁ। ସେହିପରି ପନିପରିବାକୁ ରୋଷେଇ କରିବା ପୂର୍ବରୁ ଭଲ ଭାବରେ ପାଣିରେ ଧୋଇବା ଉଚିତ।
ବିରାଟ ରାଜା ପଧାନ
-ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀଙ୍କ
କାର୍ଯ୍ୟାଳୟ, ଝାରସୁଗୁଡ଼ା
ମୋ :୯୪୩୯୯୮୯୯୪୧
