ଭୁବନେଶ୍ୱର,୧।୩(ସ୍ପୋର୍ଟ୍ସ ବ୍ୟୁରୋ): ସ୍ଥାନୀୟ କଳିଙ୍ଗ ଷ୍ଟାଡିୟମରେ ଓଡ଼ିଶା ଓମେନ୍ସ ଲିଗ୍ ଫୁଟବଲ ଉଦ୍ଘାଟିତ ହୋଇଛି। ରାଜ୍ୟ ସରକାରଙ୍କ କ୍ରୀଡ଼ା ବିଭାଗ ଓ ଫୁଟ୍ବଲ ଆସୋସିଏଶନ ଅଫ୍ ଓଡ଼ିଶା (ଫାଓ)ର ମିଳିତ ଆନୁକୂଲ୍ୟରେ ଏହି ମେଗା ଇଭେଣ୍ଟ ରବିବାର ଆରମ୍ଭ ହୋଇଛି। ମାର୍ଚ୍ଚ ୨୭ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ପ୍ରତିଯୋଗିତାର ଉଦ୍ଘାଟନୀ ମ୍ୟାଚ୍ରେ ସ୍ପୋଟର୍ସ ହଷ୍ଟେଲ ୬-୧ ଗୋଲରେ ଓଡ଼ିଶା ପୋଲିସକୁ ହରାଇ ବୃହତ୍ ବିଜୟ ହାସଲ କରିଛି। ସ୍ପୋଟର୍ସ ହଷ୍ଟେଲ ତରଫରୁ ମନୀଷା ନାଏକ ଓ ମାଳତୀ ମୁଣ୍ଡା ୩ଟି ଲେଖାଏ ଗୋଲ ସ୍କୋର କରି ହ୍ୟାଟ୍ରିକ ଅର୍ଜନ କରିଛନ୍ତି। ଅପରପକ୍ଷରେ ଓଡ଼ିଶା ପୋଲିସ ତରଫରୁ ବଦଳ ଖେଳାଳି ସୋନାଲି ଓରାମ ୫୩ତମ ମିନିଟ୍ରେ ଗୋଲ ଦେଇଥିଲେ। ସେ ଅଧିନାୟିକା ମନୀଷା ତୀର୍କିଙ୍କ ବଦଳରେ ୧୮ତମ ମିନିଟ୍ରେ ପଡିଆରେ ପ୍ରବେଶ କରିଥିଲେ। ପୂରା ମ୍ୟାଚ୍ରେ ସ୍ପୋଟର୍ସ ହଷ୍ଟେଲ ଆଧିପତ୍ୟ ବିସ୍ତାର କରି ଖେଳିଥିଲା। ମନୀଷା ନାଏକ ୨୩, ୫୮ ଓ ୭୭ ମିନିଟ୍ରେ ଗୋଲ ଦେଇଥିଲେ। ସେହିପରି ମାଳତୀ ୧୨, ୨୯, ୬୮ତମ ମିନିଟ୍ରେ ୩ଟି ଗୋଲ ଦେଇଥିଲେ। ବିଷ୍ଣୁପ୍ରିୟା ଦାସ, ସୁଲତାନା ପରବୀନ, ଅମିରା ପ୍ରଧାନ,ବିଚିତ୍ର ପ୍ରଧାନ ଓ ଦୁର୍ଗାମାଧମ ନାଏକ ମ୍ୟାଚ୍ ପରିଚାଳନା କରିଥିଲେ।
ରବିବାର ଆୟୋଜିତ ଉଦ୍ଘାଟନୀ ଉତ୍ସବରେ ରାଜ୍ୟ ସରକାରଙ୍କ କ୍ରୀଡ଼ା ବିଭାଗର ସ୍ବତନ୍ତ୍ର ସଚିବ ଭିନିଲ୍ କ୍ରିଷ୍ଣା ମୁଖ୍ୟ ଅତିଥିଭାବେ ଯୋଗ ଦେଇଥିଲେ। ଏହି ଅବସରରେ ଅନ୍ୟମାନଙ୍କ ମଧ୍ୟରେ ଫାଓ ସମ୍ପାଦକ ଆଶୀର୍ବାଦ ବେହେରା, ଯୁଗ୍ମ ସମ୍ପାଦକ ଅଭିଜିତ ପାଲ୍, କୋଷାଧ୍ୟକ୍ଷ ଭକ୍ତବଲ୍ଲଭ ଦାସ, ଉପସଭାପତି ବିଜୟ ଦାସ, ଦିଲୀପ କୁମାର ସାହୁ, ହୃଦୟ ରଞ୍ଜନ ବେହେରା, ଫାଓ ସଦସ୍ୟ ସୌର୍ଯ୍ୟରଞ୍ଜନ ପରିଜା, ୧୫ ବର୍ଷରୁ କମ୍ ଜାତୀୟ ଦଳ କୋଚ୍ ଶୁଭେନ୍ଦୁ ପଣ୍ଡା ଓ କ୍ରୀଡ଼ା ବିଭାଗ ଓଏସ୍ଡି ସୁମିତ ପାଣ୍ଡେ ପ୍ରମୁଖ ଉପସ୍ଥିତ ଥିଲେ। ଲିଗ୍ର ମ୍ୟାଚ୍ଗୁଡିକ କଳିଙ୍ଗ ଷ୍ଟାଡିୟମ୍ ଓ କ୍ୟାପିଟାଲ ହାଇସ୍କୁଲ ପଡିଆରେ ଖେଳାଯିବ।
