ଭୁବନେଶ୍ୱର,୨୫ା୩(ବ୍ୟୁରୋ): ସ୍କୁଲ ରୂପାନ୍ତରଣ କେବଳ ଭିତ୍ତିଭୂମିର ବିକାଶରେ ସୀମିତ ନୁହେଁ, ଶିକ୍ଷକ ନିୟୋଜନ ମଧ୍ୟ ଏହାର ଏକ ଅବିଚ୍ଛେଦ୍ୟ ଅଙ୍ଗ। ୨୦୨୩-୨୪ରେ ୧୦୪୫ କୋଟିରୁ ଊର୍ଦ୍ଧ୍ୱ ଟଙ୍କାର ବ୍ୟବସ୍ଥା କରାଯାଇ ୫୧,୫୩୫ ପଦବୀ ପୂରଣ ନିମିତ୍ତ ସୁଯୋଗ ସୃଷ୍ଟି କରାଯାଇଛି। ଉଚ୍ଚ ମାଧ୍ୟମିକ ବିଦ୍ୟାଳୟ ସ୍ତରରେ ୨୨୪୫, ମାଧ୍ୟମିକ ସ୍କୁଲରେ ୧୭,୪୨୮, ପ୍ରାଥମିକ ସ୍କୁଲ ସ୍ତରରେ ୨୦,୦୦୦, ଓଡ଼ିଶା ଆଦର୍ଶ ବିଦ୍ୟାଳୟରେ ୧୦୭୦ ପଦବୀ ଏବଂ ଅନ୍ୟାନ୍ୟ ୧୦,୭୯୨ ପଦବୀ ପୂରଣ କରିବା ପାଇଁ ପ୍ରସ୍ତାବ ରହିଛି। ଶୁକ୍ରବାର ବିରୋଧୀ ଦଳ ପକ୍ଷରୁ ଆଗତ ମୁଲତବୀ ପ୍ରସ୍ତାବ ଜବାବରେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ବିଧାନସଭାରେ ଏହା କହିଛନ୍ତି।
ମନ୍ତ୍ରୀ କହିଛନ୍ତି, ୨୦୨୧ରୁ ୫-ଟି କାର୍ଯ୍ୟକ୍ରମ ଜରିଆରେ ପରିବର୍ତ୍ତିତ ପରିଦୃଶ୍ୟ ପାଇଁ ସମୟୋପଯୋଗୀ ପଦକ୍ଷେପ ଗ୍ରହଣ କରିବା ଉପରେ ସର୍ବାଧିକ ଗୁରୁତ୍ୱ ଦିଆଯାଉଛି। ଉତ୍ତର ପ୍ରଦେଶରେ ଚଳିତବର୍ଷ ବୋର୍ଡ ପରୀକ୍ଷାରେ ୭.୮ ଲକ୍ଷ ଛାତ୍ରୀଛାତ୍ର ପରୀକ୍ଷା ଦେଇ ନ ଥିବା ବେଳେ ଆସାମରେ ଦଶମ ଶ୍ରେଣୀର ପ୍ରାୟ ୧୪,୦୦୦ ପରୀକ୍ଷାର୍ଥୀ ପରୀକ୍ଷା ଦେଇନାହାନ୍ତି। ମାଧ୍ୟମିକ ସ୍ତରରେ ଗୁଜରାଟର ଡ୍ରପଆଉଟ୍ ହାର ୨୩.୩ ପ୍ରତିଶତ, ମଧ୍ୟପ୍ରଦେଶ ୨୩.୮ ପ୍ରତିଶତ, ତ୍ରିପୁରା ୨୬ ପ୍ରତିଶତ, ବିହାର ୨୧.୪ ପ୍ରତିଶତ, ଝାଡ଼ଖଣ୍ଡ ୧୬.୬ ପ୍ରତିଶତ ଏବଂ କର୍ନାଟକର ଡ୍ରପଆଉଟ୍ ହାର ୧୬.୬ ପ୍ରତିଶତ ରହିଛି। ସରକାରୀ ତଥ୍ୟ ଅନୁଯାୟୀ ପଶ୍ଚିମବଙ୍ଗ, ଗୁଜରାଟ, ବିହାର ଏବଂ ତ୍ରିପୁରାରେ ମାଧ୍ୟମିକ ସ୍ତରରେ ଡ୍ରପଆଉଟ୍ ହାର ଜାତୀୟ ହାରଠାରୁ ଅଧିକ। ଶ୍ରେଷ୍ଠ ୧୦ ରାଜ୍ୟ ମଧ୍ୟରେ ଓଡ଼ିଶା ରହିଛି। ସୂଚନାଯୋଗ୍ୟ, ୨୦୧୭-୧୮ ଓ ୨୦୧୮-୧୯ ଶିକ୍ଷା ବର୍ଷରେ ଓଡ଼ିଶା ଲେଭଲ୍-୬ରେ ଏବଂ ୨୦୧୯-୨୦ରେ ଲେଭଲ୍-୪ରେ ଥିବାବେଳେ ୨୦୨୦-୨୧ରେ ଦିଲ୍ଲୀ, କର୍ନାଟକ, ହିମାଚଳପ୍ରଦେଶ, ହରିୟାଣା, ପୁଡୁଚେରି, ଲାକ୍ଷାଦ୍ୱୀପ ଲେଭଲ୍-୩ରେ ରହିଛି। ଏଜୁକେଶନ ଓ୍ବାର୍ଲଡ ପକ୍ଷରୁ ଏକ ଶୈକ୍ଷିକ ଭିତ୍ତିଭୂମି, ଗୁଣାତ୍ମକ ଶିକ୍ଷା ବ୍ୟବସ୍ଥା, ଶିକ୍ଷକ ଛାତ୍ର ଅନୁପାତ, ଆନୁଷଙ୍ଗିକ ଭିତ୍ତିଭୂମି ଆଦିକୁ ବର୍ଗୀକରଣ କରାଯାଇ ହୋଇଥିବା ସର୍ଭେ ଅନୁସାରେ ଗଞ୍ଜାମର ଓଏଭି, ହାତିଓଟା ସରକାରୀ ସ୍କୁଲ ବର୍ଗରେ ପଞ୍ଚମ ସ୍ଥାନ ହାସଲ କରିପାରିଥିବା ବେଳେ ଆବାସିକ ସରକାରୀ ସ୍କୁଲ ବର୍ଗରେ ମୟୂରଭଞ୍ଜ ଜିଲାର ବାରିପଦା ଆଦର୍ଶ ବିଦ୍ୟାଳୟ ଦଶମ ସ୍ଥାନରେ ସ୍ଥାନିତ ହୋଇଛି। ଓଡ଼ିଶା ଆଦର୍ଶ ବିଦ୍ୟାଳୟର ୧୦ଜଣ ଛାତ୍ରୀଛାତ୍ର ସର୍ବଭାରତୀୟସ୍ତରୀୟ ମେଡିକାଲ, ଇଞ୍ଜିନିୟରିଂ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ପ୍ରବେଶିକା ପରୀକ୍ଷାରେ ନିଜର ଉତ୍କର୍ଷ ପ୍ରତିପାଦନ କରିଛନ୍ତି। ସିବିଏସ୍ଇ ବୋର୍ଡ ଦ୍ୱାରା ପରିଚାଳିତ ଦଶମ ଶ୍ରେଣୀ ପରୀକ୍ଷାରେ ୯୫.୭୧ ପ୍ରତିଶତ ଉତ୍ତୀର୍ଣ୍ଣ ହୋଇଥିବା ବେଳେ ୧୦୫୨ ଜଣ ପରୀକ୍ଷାର୍ଥୀ ୯୦ ପ୍ରତିଶତରୁ ଊର୍ଦ୍ଧ୍ୱ ମାର୍କ ରଖିଛନ୍ତି। ୫-ଟି ହାଇସ୍କୁଲ ରୂପାନ୍ତରଣ ଅଧୀନରେ ଏ ପର୍ଯ୍ୟନ୍ତ ରାଜ୍ୟରେ ୩ ପର୍ଯ୍ୟାୟରେ ୬୮୭୨ ହାଇସ୍କୁଲ ରୂପାନ୍ତରଣ କରାଯାଇଥିବା ବେଳେ ଏଥିପାଇଁ ୩୪୧୧ କୋଟି ଟଙ୍କା ଖର୍ଚ୍ଚ ହୋଇଛି। ୪ର୍ଥ ପର୍ଯ୍ୟାୟ ପାଇଁ ମୋଟ ୧,୦୦୦ ଲକ୍ଷ ଟଙ୍କାର ବ୍ୟୟ ଅଟକଳ କରାଯାଇଛି। ବିଦ୍ୟାଳୟ ରୂପାନ୍ତରଣ ଯୋଗୁ ବେସରକାରୀ ସ୍କୁଲରେ ୨୦୧୯-୨୦ରେ ଥିବା ବିଦ୍ୟାର୍ଥୀ ସଂଖ୍ୟା ୧୬ ଲକ୍ଷ ୫ ହଜାରରୁ ପ୍ରାୟ ଦେଢ ଲକ୍ଷ ହ୍ରାସ ପାଇ ୨୦୨୧-୨୨ରେ ୧୪ ଲକ୍ଷ ୬୨ ହଜାରରେ ପହଞ୍ଚିଛି। ଅର୍ଥାତ ସରକାରୀ ସ୍କୁଲରେ ୮୧ ପ୍ରତିଶତ ପିଲା ବର୍ତ୍ତମାନ ଅଧ୍ୟୟନରତ ଅଛନ୍ତି। ଏହାକୁ ଅଧିକ କ୍ରିୟାଶୀଳ କରିବା ପାଇଁ ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ବାବଦରେ ୨୦୨୩-୨୪ ଆର୍ଥିକ ବର୍ଷରେ ପ୍ରାୟ ୧୩୯ କୋଟି ଟଙ୍କା ବ୍ୟୟବରାଦ କରାଯାଇଛି। ୫୩,୬୧୮ ଛାତ୍ରୀଛାତ୍ର, ୧୮୫୯ ଶିକ୍ଷୟିତ୍ରୀଶିକ୍ଷକ, ୨୩୬୪ ବିଦ୍ୟାଳୟ, ୩ ଜିଲା, ୧୦ ବ୍ଲକ୍, ୪୧୪ ଗ୍ରାମପଞ୍ଚାୟତ, ୪୧୯ ଏସ୍ଏମ୍ସି ଏବଂ ୪୧୯ଟି ଶ୍ରେଷ୍ଠ ଆଲୁମ୍ନିକୁ ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ପ୍ରଦାନ କରିବା ବ୍ୟବସ୍ଥା ହୋଇଛି। ବିରୋଧୀ ଆଣିଥିବା ଅଭିଯୋଗ ସତ୍ୟ ଉପରେ ଆଧାରିତ ନୁହେଁ ବୋଲି ମନ୍ତ୍ରୀ କହିଥିଲେ। ତେବେ ମନ୍ତ୍ରୀଙ୍କ ଉତ୍ତରରେ ଅସନ୍ତୁଷ୍ଟ ହୋଇ ବିରୋଧୀ ଭାଜପା ଓ କଂଗ୍ରେସ ସଭ୍ୟମାନେ ବିଧାନସଭା କକ୍ଷ ଛାଡ଼ି ବାହାରକୁ ଚାଲି ଯାଇଥିଲେ।
