କେସିଙ୍ଗା, ୧୩।୧୦ (ତୁମେଶ୍ୱର ସାହୁ): କଳାହାଣ୍ଡି ଜିଲାର କେସିଙ୍ଗା ମହାବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ବାତିଲ ହେବାକୁ ନେଇ ରାଜନୈତିକ ଉତ୍ତେଜନା ଦେଖାଦେଇଛି। ଏହାର ପ୍ରତିବାଦରେ ବିଜେଡି ସମର୍ଥିତ ଅନୁଭବ ପଟ୍ଟନାୟକଙ୍କ ନେତୃତ୍ୱରେ ମଙ୍ଗଳବାର ମହାବିଦ୍ୟାଳୟ ସମ୍ମୁଖରେ ଗଣଧାରଣା ଦିଆଯିବା ସହ ପ୍ରତିବାଦ କରାଯାଇଥିଲା। ନିର୍ବାଚନକୁ ନେଇ ଭାଜପା ଓ ବିଜେଡି ମଧ୍ୟରେ ଅସନ୍ତୋଷ ତୀବ୍ର ହୋଇଛି।
ସୂଚନା ଅନୁଯାୟୀ, ବିଜେଡି ସମର୍ଥିତ ପ୍ରାର୍ଥୀ ଅନୁଭବ ପଟ୍ଟନାୟକଙ୍କ ନାମରେ ଥାନାରେ ମାମଲା ଥିବା ଏବଂ ପୋଲିସର ରିପୋର୍ଟ ଆଧାରରେ ତାଙ୍କ ପ୍ରାର୍ଥୀପତ୍ର ନାକଚ ହୋଇଥିବା କୁହାଯାଇଛି। ଏହାକୁ ନେଇ ବିଜେଡି ପକ୍ଷରୁ କଲେଜ ଅଧ୍ୟକ୍ଷ ଓ ଆଇଆଇସିଙ୍କ ସହ ଆଲୋଚନା କରାଯାଇଥିଲା। ନର୍ଲା ବିଧାୟିକା ମନୋରମା ମହାନ୍ତି, ଯୁବ ବିଜେଡି ଟାଉନ୍ ସଭାପତିଙ୍କ ସମେତ ଅନ୍ୟ ଦଳୀୟ ନେତାମାନେ ଅନୁଭବଙ୍କ ପ୍ରାର୍ଥୀପତ୍ର ନାକଚ କରାଯିବାର କାରଣ ସମ୍ପର୍କରେ ଆଲୋଚନା କରିଥିଲେ।
ପରେ ରାଜ୍ୟ ଉଚ୍ଚଶିକ୍ଷା ବିଭାଗର ନିର୍ଦ୍ଦେଶ ପରେ ଅନୁଭବଙ୍କ ପ୍ରାର୍ଥୀପତ୍ର ପୁନର୍ବାର କାଏମ ରହିଥିବା କୁହାଯାଇଛି। ଏହାକୁ ନେଇ ଭାଜପା ପକ୍ଷରୁ ପ୍ରତିବାଦ କରାଯାଇଥିଲା। ନିର୍ବାଚନ ସମୟରେ ନର୍ଲା ବିଧାୟିକା ଓ ଯୁବ ବିଜେଡି ଟାଉନ୍ ସଭାପତି କିପରି କଲେଜ କ୍ୟାମ୍ପସକୁ ପ୍ରବେଶ କଲେ, ସେନେଇ ଭାଜପା ପକ୍ଷରୁ କଲେଜ ଅଧ୍ୟକ୍ଷଙ୍କ ନିକଟରେ ଅଭିଯୋଗ କରାଯାଇଥିଲା।
ଏହାକୁ ନେଇ କଲେଜରେ ଉତ୍ତେଜନା ଓ ଆଇନଶୃଙ୍ଖଳା ସମସ୍ୟା ଦେଖାଦେବାରୁ କଲେଜ ପରିଚାଳନା କମିଟିର ଅଧ୍ୟକ୍ଷ ଉପଜିଲାପାଳଙ୍କୁ ଅବଗତ କରାଇଥିଲେ। ଉପଜିଲାପାଳଙ୍କ ସମୀକ୍ଷା ପରେ ଅନିର୍ଦ୍ଦିଷ୍ଟ କାଳ ପାଇଁ ନିର୍ବାଚନ ବାତିଲ ଘୋଷଣା କରାଯାଇଛି। ଏହାକୁ ନେଇ ଉଭୟ ଭାଜପାଓ ବିଜେଡି ମଧ୍ୟରେ ପୁଣି ଅସନ୍ତୋଷ ଦେଖାଦେଇଛି।
ବିଜେଡି ଯୁବନେତା ଅଭିନାଶ ଠାକୁର ଅଭିଯୋଗ କରିଛନ୍ତି ଯେ, ଭାଜପା ସମର୍ଥିତ ପ୍ରାର୍ଥୀ ହାରିବା ଆଶଙ୍କାରେ ଆରମ୍ଭରୁ ଶାସକ ଦଳ ପକ୍ଷରୁ ବିଭିନ୍ନ ଷଡ଼ଯନ୍ତ୍ର କରାଯାଇଥିଲା। ଅନୁଭବ ପଟ୍ଟନାୟକଙ୍କ ପ୍ରାର୍ଥୀପତ୍ର ପୁନର୍ବାର କାଏମ ରହିବା ପରେ ପରାଜୟ ଭୟରେ ନିର୍ବାଚନ ବାତିଲ କରାଯାଇଥିବା ସେ ଅଭିଯୋଗ କରିଛନ୍ତି। ଅନ୍ୟପକ୍ଷରେ, କଲେଜରେ ଆଇନଶୃଙ୍ଖଳା ପରିସ୍ଥିତି ସ୍ୱାଭାବିକ ନଥିବାରୁ ନିର୍ବାଚନ ବାତିଲ କରାଯାଇଥିବା ବିଜେପି ପକ୍ଷରୁ କୁହାଯାଇଛି।
ଏହି ଘଟଣାକୁ ନେଇ ଆଗାମୀ ଦିନରେ କେସିଙ୍ଗା ମହାବିଦ୍ୟାଳୟର ଛାତ୍ର ସଂସଦ ନିର୍ବାଚନକୁ ନେଇ ରାଜନୈତିକ ମାହୋଲ ଆହୁରି ସରଗରମ ହେବାର ଆଶଙ୍କା ରହିଛି।
