ନୂଆଦିଲ୍ଲୀ, ୨୫ା୩: ଆଦାନୀ ଗ୍ରୁପ୍ର ଷ୍ଟକ୍ ଜାଲିଆତି ଅଭିଯୋଗର ତଦନ୍ତ ଯୁଗ୍ମ ସଂସଦୀୟ କମିଟି (ଜେପିସି) ଦ୍ୱାରା କରାଯିବା ଦାବିରେ ବିରୋଧୀ ଦଳଗୁଡ଼ିକ ଲୋକ ସଭାରେ ହଟ୍ଟଗୋଳ ଜାରି ରଖିଥିବାବେଳେ ୨୦୨୩-୨୪ ବର୍ଷ ଲାଗି ଅର୍ଥ ବିଲ୍ ୪୫ରୁ ଊର୍ଦ୍ଧ୍ୱ ସଂଶୋଧନ ସହ ଶୁକ୍ରବାର ଗୃହୀତ ହୋଇଛି। ଋଣ ମ୍ୟୁଚୁଆଲ ଫଣ୍ଡରୁ ଆୟ ଉପରେ ଟିକସ ଲାଗୁ କରିବା ପାଇଁ ନିଷ୍ପତ୍ତି ହୋଇଛି। ଅର୍ଥ ସଚିବ ଟି.ଭି. ସୋମନାଥନ୍ଙ୍କ ନେତୃତ୍ୱରେ ଏକ କମିଟି ଗଠନ କରାଯିବ। ଉକ୍ତ କମିଟି କର୍ମଚାରୀଙ୍କ ପେନ୍ସନ ସମ୍ପର୍କିତ ପ୍ରସଙ୍ଗକୁ ଅନୁଧ୍ୟାନ କରିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମନ ଲୋକ ସଭାରେ ଅର୍ଥ ବିଲ୍ ଉପରେ ଉଦ୍ବୋଧନ ଦେଇ କହିଥିଲେ। କ୍ରେଡିଟ୍ କାର୍ଡ ଜରିଆରେ ବିଦେଶ ଭ୍ରମଣ ପାଇଁ ଅର୍ଥ ପୈଠକୁ ଉଦାରୀକୃତ ପ୍ରେଷଣ ଯୋଜନାରୁ ବାଦ୍ ଦିଆଯାଇଛି। ସେମାନଙ୍କ ଆୟ ଉତ୍ସରୁ ଆଉ ଟିକସ ସଂଗୃହୀତ ହେବ ନାହିଁ ବୋଲି ଅର୍ଥମନ୍ତ୍ରୀ କହିଥିଲେ। ଏହା ବ୍ୟତୀତ ୨୦୨୪-୨୫ ଆକଳନ ବର୍ଷ ଲାଗି ଆଞ୍ଜେଲ୍ ଟ୍ୟାକ୍ସ ୨୦୨୪ ଏପ୍ରିଲ ୧ରୁ ଲାଗୁ ହେବ। ଏହାର କାର୍ଯ୍ୟକାରିତାକୁ ନେଇ ହିତାଧିକାରୀ ଚିନ୍ତାବ୍ୟକ୍ତ କରିଥିବାବେଳେ ସରକାର ଏହାର ସମାଧାନ କରିବେ। ଗୁରୁବାର ଲୋକ ସଭାରେ ୨୦୨୩-୨୪ ବର୍ଷ ଲାଗି ୪୫ ଲକ୍ଷ କୋଟି ଟଙ୍କାର ଖର୍ଚ୍ଚଦାବି ଗୃହୀତ ହୋଇଥିଲା।
