ଭୁବନେଶ୍ୱର,୧୭ା୫(ବ୍ୟୁରୋ):କରୋନା ମହାମାରୀ ଯୋଗୁ ରାଜ୍ୟରେ ପର୍ଯ୍ୟଟନ ଶିଳ୍ପ ମୁଣ୍ଡ ଟେକି ନ ଥିବା ବେଳେ ଓଡ଼ିଶାକୁ ଆଉ ଏକ ଝଟକା ଲାଗିଛି। କେନ୍ଦ୍ର ସରକାର ନିକଟରେ ପୂର୍ବ ଭାରତର ରାଜ୍ୟଗୁଡ଼ିକ ପାଇଁ ୮ଟି ରିଭର କ୍ରୁଜ୍ ପର୍ଯ୍ୟଟନ ପାଇଁ ବୁଝାମଣା ପତ୍ର (ଏମ୍ଓୟୁ) ସ୍ବାକ୍ଷର କରିଛନ୍ତି। ହେଲେ ଓଡ଼ିଶା ଏଥିରୁ ବଞ୍ଚତ୍ତ ହୋଇଛି। ପଡ଼ୋଶୀ ରାଜ୍ୟ ଆସାମ ଓ ପଶ୍ଚିମବଙ୍ଗ ଏହି ସୁଯୋଗକୁ ହାତଛଡ଼ା କରି ନ ଥିବା ବେଳେ ଓଡ଼ିଶା ଏଥିରୁ ବାଦ୍ ପଡ଼ିଛି।
ରାଜ୍ୟରେ କ୍ରୁଜ୍ ପର୍ଯ୍ୟଟନ ପାଇଁ ବ୍ୟାପକ ସୁଯୋଗ ରହିଛି। ପର୍ଯ୍ୟଟକମାନଙ୍କୁ ଆକୃଷ୍ଟ କରିବା ସକାଶେ ରାଜ୍ୟ ସରକାର ୨୦୨୦ ସେପ୍ଟେମ୍ବରରେ ରିଭର କ୍ରୁଜ୍ ପର୍ଯ୍ୟଟନ ଯୋଜନା କରିଥିଲେ। ଏଥିପାଇଁ ୩ଟି ସ୍ଥାନକୁ ପର୍ଯ୍ୟଟନ ସର୍କିଟ୍ ଭାବେ ଚିହ୍ନଟ କରାଯାଇଛି। ସେଗୁଡ଼ିକ ହେଲା ମହାନଦୀ, ଚିଲିକା ଏବଂ ଡାଙ୍ଗମାଳ ସଂରକ୍ଷିତ ଜଙ୍ଗଲ। ଏଥିସହିତ ଜଳପଥ-୫ ଧାମରାରୁ ପାରାଦୀପକୁ ମଧ୍ୟ ସାମିଲ କରାଯାଇଛି। ଚିଲିକା ହେଉଛି ଏସିଆର ସର୍ବବୃହତ୍ ଲୁଣା ହ୍ରଦ। ପକ୍ଷୀ ଓ ପ୍ରକୃତିପ୍ରେମୀଙ୍କ ପାଇଁ ଏହା ଏକ ଉତ୍ତମ ପର୍ଯ୍ୟଟନ ସ୍ଥଳ। ଏଠାରେ ପର୍ଯ୍ୟଟକମାନଙ୍କ ପାଇଁ ସମସ୍ତ ପ୍ରକାର ରାତ୍ରକାଳୀନ ରହଣି ବ୍ୟବସ୍ଥା ରହିଛି। ଚିଲିକାର ବିଭିନ୍ନ ପର୍ଯ୍ୟଟନ ସ୍ଥଳ ସହ ସଂଯୋଗ ରହିଛି। ସେହିପରି ଭିତରକନିକା ସିର୍ମିଟ ଚାନ୍ଦବାଲି-ଆରଡ଼ି-ଧାମରା-ଖୋଲା ସହିତ ସଂଯୋଗ କରୁଛି। ଏହା ପର୍ଯ୍ୟଟକଙ୍କ ପାଇଁ ଏକ ପ୍ରକୃଷ୍ଟ ସ୍ଥାନ। ଏଠାରେ ୫ ରାତି, ୬ ଦିନ ରହିବା ପାଇଁ ସମସ୍ତ ସୁବିଧା ରହିଛି। ଏହି ଶିଳ୍ପର ବିକାଶ ପାଇଁ ତତ୍କାଳୀନ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀଙ୍କୁ ଭୂପୃଷ୍ଠ ଜଳପଥ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରି ଆବଶ୍ୟକ ଅନୁମତି ଆଣିବାକୁ କୁହାଯାଇଥିଲା। ପ୍ରଥମ ପର୍ଯ୍ୟାୟରେ ମହାନଦୀର ସାତକୋଶିଆ, ଚିଲିକା, ହୀରାକୁଦ, ଭିତରକନିକାରେ କ୍ରୁଜ୍ ପର୍ଯ୍ୟଟନ ଆରମ୍ଭ କରିବାକୁ ପ୍ରସ୍ତାବ ଥିଲା। ପର୍ଯ୍ୟଟକମାନେ ଜଳରେ ପ୍ରକୃତିର ସୌନ୍ଦର୍ଯ୍ୟ ଉପଭୋଗ କରିବା ସହ ରାତ୍ର ରହଣିର ସୁଯୋଗ ରହିଛି। ଏ ନେଇ ପର୍ଯ୍ୟଟନ ବିଭାଗ ପକ୍ଷରୁ ମଧ୍ୟ ତତ୍ପରତା ପ୍ରକାଶ ପାଇଥିଲା। ସରକାରୀ ଓ ଘରୋଇ ଭାଗୀଦାରି(ପିପିପି) ମୋଡ୍ରେ ଏହାକୁ ଆରମ୍ଭ କରିବାକୁ ନିଷ୍ପତ୍ତି ହୋଇଥିଲା। ରାଜ୍ୟରେ କ୍ରୁଜ୍ ପର୍ଯ୍ୟଟନର ବିକାଶ ପାଇଁ ରାଜ୍ୟ ସରକାର ଓଡ଼ିଶା ବୋଟ୍ ରୁଲ୍-୨୦୧୭ ପ୍ରସ୍ତୁତ କରିଛନ୍ତି। ଏହାଦ୍ୱାରା ଜଳାଶୟ କ୍ରୀଡ଼ା ଓ ପର୍ଯ୍ୟଟନକୁ ନିୟନ୍ତ୍ରିତ କରାଯିବ। କ୍ରୁଜ୍ ପର୍ଯ୍ୟଟନକୁ ଦିନ ଓ ରାତିରେ ଚଳାଇବା ପାଇଁ ବ୍ୟବସ୍ଥା ହୋଇଥିଲା। ମାତ୍ର କରୋନା ମହାମାରୀ ଯୋଗୁ ଏହି ପ୍ରସ୍ତାବ ଏକପ୍ରକାର ଧିମା ପଡ଼ିଯାଇଥିଲା। କରୋନା କଟକଣା ଉଠିବା ପରେ ଏହି ପର୍ଯ୍ୟଟନ ପ୍ରତି ଆଗ୍ରହ ବଢ଼ିବାରେ ଲାଗିଛି। ତେବେ ଏହି ପର୍ଯ୍ୟଟନ ପ୍ରତି ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ସେପରି ପ୍ରୋତ୍ସାହନ ମିଳିନାହିଁ। ଏହାକୁ ନେଇ ପର୍ଯ୍ୟଟକ ନିରାଶ ହୋଇଛନ୍ତି।
ପର୍ଯ୍ୟଟନ ବିଭାଗର ପୂର୍ବତନ ଆସିଷ୍ଟାଣ୍ଟ ଡାଇରେକ୍ଟର ସୁନୀଲ ପଟ୍ଟନାୟକ କହିଛନ୍ତି ଯେ, ରିଭର କ୍ରୁଜ୍ ପର୍ଯ୍ୟଟନ ପାଇଁ ରାଜ୍ୟରେ ପର୍ଯ୍ୟାପ୍ତ ସୁଯୋଗ ରହିଛି। ରାଜ୍ୟ ପର୍ଯ୍ୟଟନକୁ ଗତିଶୀଳ କରିବା ଦିଗରେ ଏହା ଏକ ଉତ୍ତମ ପଦକ୍ଷେପ। ସରକାରୀ ସ୍ତରରେ ଏହି ଶିଳ୍ପ ପ୍ରତି ଆନ୍ତରିକତା ପ୍ରଦର୍ଶନ କରାଗଲେ ପର୍ଯ୍ୟଟକଙ୍କୁ ଆକୃଷ୍ଟ କରାଯାଇପାରନ୍ତା। ଏହାବ୍ୟତୀତ କେନ୍ଦ୍ର ସରକାରଙ୍କ ସହଯୋଗ ମିଳିଲେ ରାଜ୍ୟର ବଡ଼ ବଡ଼ ଜଳାଶୟରେ କ୍ରୁଜ୍ ପର୍ଯ୍ୟଟନର ବିକାଶ ହୋଇପାରନ୍ତା।
