ଦିଗପହଣ୍ଡି,୧୮।୧୧(ଅଶେଷ ନାଥ ମିଶ୍ର): ଗତ କାର୍ତ୍ତିକ ପୂର୍ଣ୍ଣିମା ଯାତ୍ରା ଉପଲକ୍ଷେ ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଦିଗପହଣ୍ଡି ଥାନା ମୌଳାଭଞ୍ଜା ଗ୍ରାମରେ ପ୍ରତିଯୋଗିତା ମୂଳକ ୨ ନାଟ୍ୟ ଅନୁଷ୍ଠାନ ପକ୍ଷରୁ ପୈାରାଣିକ ରାମାୟଣ ନାଟକ ମଞ୍ଚସ୍ଥ ହୋଇଥିଲା । ନାଟକରେ ରାବଣ ଭୂମିକାରେ ଅଭିନୟ କରିଥିବା କଳାକାର ଜଣଙ୍କ ଆଧ୍ୟାତ୍ମିକ ଓ ପୌରାଣିକ କଥାବସ୍ତୁ ରାମାୟଣ ଭଳି ପବିତ୍ର ଗ୍ରନ୍ଥକୁ ଅପମାନିତ କରି ସୀତାହରଣ ଦୃଶ୍ୟରେ ଅତ୍ୟନ୍ତ ଅଶ୍ଳିଳତା ଅଙ୍ଗଭଙ୍ଗୀ ପ୍ରଦର୍ଶନ କରିଥିଲେ। ନାଟକର ବିଭିନ୍ନ ଦୃଶ୍ୟରେ ଘୋଡ଼ା, ଓଟ ଭଳି ପ୍ରାଣୀ ଏବଂ ଜେସିବି ମେସିନ, କ୍ରେନ ମଧ୍ୟ ବ୍ୟବହାର କରାଯାଇଥିଲା। ଏହି ଦୃଶ୍ୟର ଭିଡିଓ ସୋସିଆଲ ମିଡିଆରେ ଘୁରି ବୁଲିଥିଲା। ବିଭିନ୍ନ ମହଲରେ ଏହାକୁ ବିରୋଧ କରାଯିବା ସହ ସଂସ୍କୃତିପ୍ରେମୀମାନେ ନିନ୍ଦା କରିଥିଲେ। ଦୁଇ ଦିନ ନାଟକ ପରିବେଷଣ ପାଇଁ ଚୁକ୍ତିନାମା ହୋଇଥିଲେ ମଧ୍ୟ ପୋଲିସ ଅନୁମତି ନ ଥାଇ ଉଭୟ ନାଟକ ଅନୁଷ୍ଠାନର ୨୦ରୁ ଉଦ୍ଧର୍ବ ନର୍ତ୍ତକୀ ଏବଂ ୫୦ରୁ ଊଦ୍ଧର୍ବ ଥାର୍ଡ ଜେଣ୍ଡର ୪ ଦିନ ନାଟକରେ ନଗ୍ନନୃତ୍ୟ ପରିବେଷଣ କରିଥିଲେ । ମଙ୍ଗଳବାର ଗଞ୍ଜାମ ଜିଲା ନାଟ୍ୟ ନିର୍ଦ୍ଦେଶକ ସଂଘ ସଭାପତି ରାଜ ଗୋପାଳ ପାଢ଼ୀ ଘଟଣାକୁ ବିରୋଧ କରି ଦିଗପହଣ୍ଡି ଥାନାରେ ଏତଲା ଦେଇଛନ୍ତି।
ଥାନା ଭାରପ୍ରାପ୍ତ ଆଇଆଇସି ତଥା ଡିଏସପି ପ୍ରଶାନ୍ତ କୁମାର ପାତ୍ରଙ୍କ ଅନୁପସ୍ଥିତିରେ ଦାୟିତ୍ୱରେ ଥିବା ଏସ୍ଆଇ ଜ୍ୟୋତି ରଞ୍ଜନ ବେହେରା ଏତଲାକୁ ଭିତ୍ତିକରି ଥାନା ମାମଲା ନଂ.୪୧୯/୨୫ ବିଏନଏସର ଦଫା- ୨୯୯/୨୯୬/୩୫୨/୩(ଆଇ) ଏବଂ ରିପ୍ରେଜେଣ୍ଟେସନ ପ୍ରିଭେନ୍ସନ ଆକ୍ଟ ଅନୁଯାୟୀ ମକଦ୍ଦମା ରୁଜୁ କରାଯାଇଥିବା କହିଛନ୍ତି। ଯାତ୍ରାରେ ନାଟକ ପରିବେଷଣ ନାଁରେ କଳାକାରମାନେ ଅଶ୍ଳିଳତା ପ୍ରଦର୍ଶନ ଘଟଣା ଦିନକୁ ଦିନ ବଢି ଚାଲିଥିଲେ ମଧ୍ୟ ପୋଲିସ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ନିଆନଯିବା ବୁଦ୍ଧିଜୀବୀ ଓ ସଂସ୍କୃତି ପ୍ରେମୀଙ୍କୁ ଆଶ୍ଚର୍ଯ୍ୟ କରିଛି। ହିନ୍ଦୁ ମାନଙ୍କ ପବିତ୍ର ଧର୍ମଗ୍ରନ୍ଥ ରାମାୟଣରେ ରାବଣ ଚରିତ୍ରରେ ଅଭିନୟ କରୁଥିବା ବ୍ୟକ୍ତି ଜଣକ ମଞ୍ଚ ଉପରେ ସୀତାଙ୍କୁ ହରଣ ନାଁରେ କିଭଳି ଉତ୍ତେଜିତ ଦୃଶ୍ୟ କରି ଉପସ୍ଥିତ ହଜାର ହଜାର ଦର୍ଶକଙ୍କ ଧାର୍ମିକ ଭାବନାକୁ ଆଘାତ ଦେବା ସହ ଓଡ଼ିଆ ସଂସ୍କୃତିକୁ କଳୁଷିତ କରିଛନ୍ତି ବୋଲି ଏତଲାରେ ଉଲ୍ଲେଖ ରହିଛି । ଏପରିକି ଲକ୍ଷାଧିକ ଟଙ୍କା ପାରିଶ୍ରମିକ ନେଇ ନାଟକ ଆସିଥିବା ଜଣେ ନୃତ୍ୟାଙ୍ଗନା ଅର୍ଦ୍ଧନଗ୍ନ ନୃତ୍ୟ ପରିବେଷଣ କରିବା ସହ ନିଜର ପୋଷାକ ଓ ଅନ୍ଥଃବସ୍ତ୍ର ଖୋଲି ନାଚିବା ଘଟଣା ଯୁବ ସମାଜକୁ ପଥଭ୍ରଷ୍ଟ କରିଥିବା ନେଇ ମଧ୍ୟ ଏତଲାରେ ଦର୍ଶାଯାଇଛି। ଯାତ୍ରା ନାଁରେ ନାଟକ ଆୟୋଜନ କରିଥିବା ପରିଚାଳନା କମିଟି, ରାବଣ ଭୂମିକାରେ ଅଭିନୟ କରୁଥିବା କଳାକାର ଏବଂ ଦୁଇଟି ରାମାୟଣ ନାଟକ ଅନୁଷ୍ଠାନର ନିର୍ଦେଶକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଏତଲାରେ ନିବେଦନ କରାଯାଇଛି।
ଥାନାରେ ଏତଲା ଦେବା ବେଳେ ଗଞ୍ଜାମ ଜିଲା ନାଟ୍ୟ ସଂଘର କାର୍ଯ୍ୟକର୍ତ୍ତା ସୁଶାନ୍ତ ପଟ୍ଟନାୟକ, ସପ୍ନେଶ୍ୱର ପ୍ରଧାନ , ଅରୁଣ କୁମାର ପଣ୍ଡା ଓ ଆଇନଜୀବୀ ତଥା ଭାଜପା ରାଜ୍ୟ ପରିଷଦ ସଦସ୍ୟ ପରେଶ ଚନ୍ଦ୍ର ରଥ ପ୍ରମୁଖ ଉପସ୍ଥିତ ଥିଲେ ।
