ନୂଆଦିଲ୍ଲୀ, ୨୧ା୧୧: ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ୯୦ ଲକ୍ଷ ଟପିଥିବାବେଳେ ମୃତ୍ୟୁସଂଖ୍ୟା ୧.୩୨ ଲକ୍ଷରେ ପହଞ୍ଚିଛି। ଗତ ୨୪ ଘଣ୍ଟା ମଧ୍ୟରେ ଭାରତରେ ୪୫,୮୮୨ ନୂଆ ମାମଲା ସାମ୍ନାକୁ ଆସିଥିବା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ରିପୋର୍ଟରୁ ଜଣାପଡ଼ିଛି। ଏବେ ସକ୍ରିୟ ମାମଲା ୪.୪୩ ଲକ୍ଷ ରହିଛି। ସଂକ୍ରମିତ ହୋଇଥିବା ୮୪.୨୮ ଲକ୍ଷ ଲୋକ ସୁସ୍ଥହୋଇ ଘରକୁ ଫେରିଥିବା ଜଣାପଡ଼ିଛି। ଗୁରୁବାର ୧୦.୮୩ ଲକ୍ଷ ସାମ୍ପଲ ପରୀକ୍ଷାକୁ ମିଶାଇ ଦେଶରେ ଏପର୍ଯ୍ୟନ୍ତ ପ୍ରାୟ ୧୩ କୋଟି ଟେଷ୍ଟ ସରିଥିବା ଆଇସିଏମ୍ଆର୍ ପକ୍ଷରୁ ଦର୍ଶାଯାଇଛି।
୧୭.୬୩ ଲକ୍ଷ ସଂକ୍ରମିତ ହୋଇଥିବାବେଳେ କେରଳ, ଆନ୍ଧ୍ରପ୍ରଦେଶ, ତାମିଲନାଡ଼ୁ, କର୍ନାଟକ ସ୍ଥିତି ଜଟିଳ ରହିଛି। ରାଜଧାନୀ ଦିଲ୍ଲୀରେ ଗତ କିଛିଦିନ ହେବ ସଂକ୍ରମଣ ବୃଦ୍ଧି ପାଇଥିବାବେଳେ କଡ଼ା ପଦକ୍ଷେପ ଗ୍ରହଣ କରାଯାଇଛି। ଗୁରୁବାର ସୁଦ୍ଧା ଏଠାରେ ୫.୧୦ ଲକ୍ଷ ସଂକ୍ରମିତ ହୋଇଥିବାବେଳେ ୮,୦୪୧ ଜଣଙ୍କ ଜୀବନ ଯାଇଛି।
ଗୁଜରାଟର ଅହମଦାବାଦରେ ସ୍ଥିତି ଜଟିଳ ହେବାରେ ଲାଗିଛି। ଗୁଜରାଟ ସରକାର ଶୁକ୍ରବାର ରାତି ୯ଟାରୁ ଏଠାରେ ୬୦ ଘଣ୍ଟା ଲାଗି କର୍ଫ୍ୟୁ ଜାରି କରିଛନ୍ତି। ସୋମବାର ସକାଳ ୬ଟା ପର୍ଯ୍ୟନ୍ତ ଏହି କର୍ଫ୍ୟୁ ବଳବତ୍ତର ରହିବ। କେବଳ ଔଷଧ, କ୍ଷୀର ଦୋକାନଗୁଡ଼ିକ ଏଠାରେ ଖୋଲା ରହିବ ବୋଲି କୁହାଯାଇଛି। କର୍ଫ୍ୟୁ ପରେ ରାତି ୯ଟାରୁ ସକାଳ ୬ଟା ରାତ୍ରିକାଳୀନ କର୍ଫ୍ୟୁ ଜାରି ରହିବ ବୋଲି ଅତିରିକ୍ତ ମୁଖ୍ୟ ସଚିବ ଆର୍.କେ. ଗୁପ୍ତା ସୂଚନା ଦେଇଛନ୍ତି। ଲକ୍ଡାଉନ୍ ଲଗାଯିବାର କୌଣସି ସମ୍ଭାବନା ନାହିଁ ବୋଲି ମୁଖ୍ୟମନ୍ତ୍ରୀ ବିଜୟ ରୁପାନୀ ପ୍ରକାଶ କରିଛନ୍ତି।
ବିଶ୍ୱରେ ୬ ଗୁଣ ଅଧିକ ସଂକ୍ରମଣ
ବିଶ୍ୱରେ କରୋନା ସଂକ୍ରମିତଙ୍କ ସଂଖ୍ୟା ୫.୭୩ କୋଟି ପାର୍ କରିଛି। ମହାମାରୀ ସଂକ୍ରମଣରେ ୧୩.୬୮ ଲକ୍ଷରୁ ଅଧିକ ଲୋକ ପ୍ରାଣ ହରାଇଲେଣି। ପ୍ରାୟ ୧୧ ମାସ ହେବ ବିଶ୍ୱବାସୀ କରୋନାକୁ ନେଇ ଚିନ୍ତାରେ ଅଛନ୍ତି। ଏବେବି ସ୍ଥିତିରେ ସୁଧାର ଆସିପାରିନି। ସମସ୍ତଙ୍କ ଅପେକ୍ଷା ଟିକାକୁ। ହେଲେ ସୂଚନା ଅପେକ୍ଷା ବିଶ୍ୱରେ ୬ ଗୁଣ ଅଧିକ ବ୍ୟକ୍ତି ସଂକ୍ରମିତ ହୋଇଥିବା ଏକ ଅନୁସନ୍ଧାନରୁ ଜଣାପଡ଼ିଛି। ଅଷ୍ଟ୍ରେଲିଆର ଜାତୀୟ ବିଶ୍ୱବିଦ୍ୟାଳୟ(ଏଏନ୍ୟୁ) ଏବଂ ମେଲବନର୍ର୍ ବିଶ୍ୱବିଦ୍ୟାଳୟର ଗବେଷକମାନେ ମାର୍ଚ୍ଚରୁ ଅଗଷ୍ଟ ମଧ୍ୟରେ ୧୫ ଦେଶର ସଂକ୍ରମଣ ସ୍ଥିତି ସମ୍ପର୍କରେ ଅନୁଧ୍ୟାନ କରି ସୂଚନା ଅପେକ୍ଷା ସଂକ୍ରମଣ ସ୍ଥିତି ୬.୨ ଗୁଣ ଅଧିକ ବୋଲି ଜାଣିବାକୁ ପାଇଥିଲେ।
ଜର୍ନାଲ ରୟାଲ ସୋସାଇଟି ଓପନ ସାଇନ୍ସରେ ପ୍ରକାଶିତ ତଥ୍ୟ ଅନୁଯାୟୀ ବ୍ରିଟେନ, ଫ୍ରାନ୍ସ, ବେଲଜିୟମ୍ ଓ ଇଟାଲୀରେ ସୂଚନା ଅନୁଯାୟୀ କରୋନା ସଂକ୍ରମଣ ହାର ଯଥେଷ୍ଟ ଅଧିକ। ଇଟାଲୀରେ ଏହି ହାର ୧୭ ଗୁଣ ଅଧିକ ବୋଲି ଜଣାପଡ଼ିଛି। ୧୧ ୟୁରୋପୀୟ ରାଷ୍ଟ୍ରର ୮୦ କୋଟି ଲୋକଙ୍କ ସହ ଅଷ୍ଟ୍ରେଲିଆ, କାନାଡ଼ା, ଦକ୍ଷିଣ କୋରିଆ ଏବଂ ଆମେରିକାରେ ଏଭଳି ଗବେଷଣା କରାଯାଇଥିବା ବିଶେଷଜ୍ଞମାନେ କହିଛନ୍ତି। ଅଷ୍ଟ୍ରେଲିଆରେ ଅଗଷ୍ଟ ସୁଦ୍ଧା ସୂଚନା ଅପେକ୍ଷା ସଂକ୍ରମଣ ସ୍ଥିତି ୫ ଗୁଣ ଅଧିକ ଥିବା ଦର୍ଶାଯାଇଛି।
