ନୂଆପଡ଼ା ଅଫିସ,୨୭।୮: ପଶ୍ଚିମ ଓଡିଶାର ନୂଆଁଖାଇ ଆଉ ୫ ଦିନ ବାକି ରହିଥିବା ବେଳେ ସହରଠାରୁ ଗାଁ ପର୍ଯ୍ୟନ୍ତ ସବୁଠି ଚଳଚଞ୍ଚଳ ହୋଇଉଠୁଛି। ଗତ ୨ ବର୍ଷ କରୋନା ଯୋଗୁ କେବଳ ନୂଆଁଖାଇ ନୁହେଁ ଅନ୍ୟ ପର୍ବ ମଧ୍ୟ ଫିକା ପଡିଥିଲା। ଚଳିତବର୍ଷ ବର୍ଷ ଠିକଭାବେ ବର୍ଷା ହୋଇଥିବାରୁ ଚାଷୀଙ୍କ ମୁହଁରେ ହସ ଦେଖା ଦେଇଛି। ପଶ୍ଚିମ ଓଡିଶାର ଗଣପର୍ବ ନୂଆଁଖାଇ ପାଇଁ ଦୁର ଦୁରାନ୍ତରେ ରହିଥିବା ଶ୍ରମିକ, ଖଟିଖିଆ, ଦିନମଜୁରିଆ ଓ କମ୍ପାନୀରେ ଚାକିରି କରୁଥିବା ଲୋକ ଘରକୁ ପ୍ରତ୍ୟାବର୍ତନ କରୁଛନ୍ତି। ନୂଆଁଖାଇ ଆଉ ମାତ୍ର ୫ ଦିନ ବାକି ରହିଥିବା ବେଳେ ଗାଁରେ ମହିଳାମାନେ ଘର, ଦ୍ୱାର ଲିପା ପୋଛା କରିବା ସହ ଘର ଜିନିଷ ପତ୍ରକୁ ଧୋଇ ସଫା କରାଯାଉଛି। ଗାଁ ଦାଣ୍ଡ ସବୁ ଅଇଳା ଆବର୍ଜନା ସଫା କରିବାରେ ଲୋକେ ବ୍ୟସ୍ତ ରହିଛନ୍ତି। ନୂଆଁଖାଇ ଦିନ ନୂତନ ବସ୍ତ୍ର ପରିଧ୍ୟାନ କରି ନୂଆଁ ଅର୍ଣ୍ଣ ଭକ୍ଷଣ କରାଯାଉଥିବାରୁ କପଡା ଦୋକାନରେ ଭିଡ ଜମିବାରେ ଲାଗିଛି। ଏହା ସହିତ ଦୈନିକ ବଜାର ଓ ସପ୍ତାହିକ ହାଟ ସବୁ ଭିଡ ଜମିବାରେ ଲାଗିଛି। ଏହା କେବଳ ଓଶ୍ଚିମ ଓଡିଶାବାସୀ ପାଳନ କରନ୍ତି ତାହା ନୁହେଁ ପଡୋଶୀ ଛତିଶଗଡର ମଧ୍ୟ ଅଧା ଅଧିକ ଲୋକେ ଏହି ଗଣପର୍ବ ପାଳନ କରିଥାନ୍ତି। ପଶ୍ଚିମ ଓଡିଶା ସୀମାବର୍ତ୍ତୀ ଛତିଶଗଡର ଲୋକଙ୍କ ସମ୍ପର୍କ ଓଡିଶା ସହିତ ରହିଥିବାରୁ ଏହି ପର୍ବ ଧୁମଧାମରେ ପାଳନ କରିଥାନ୍ତି। ଛତିଶଗଡ ସୀମାବର୍ତ୍ତି ଅଞ୍ଚଳରେ ମଧ୍ୟ ଲୋକେ ଚଳଚଞ୍ଚଳ ହୋଇ ନୂଆଁଖାଇ ପର୍ବ ପାଇଁ ସଜବାଜ ହେଉଥିବା ଦେଖିବାକୁ ମିଳିଛି। ନୂଆଁଖାଇ ପରବର୍ତ୍ତି ଦିନକୁ ନୂଆଁଖାଇ ବାସୀ ବା ମିଳନର ପର୍ବ ରୂପେ ପାଳନ କରିଥାନ୍ତି। ଘରକୁ କୁଣିଆ ଆସିଲେ ଭୋଜିଭାତ କରି ପରସ୍ପର ମଧ୍ୟରେ ଜୁହାର ଭେଟ ହୋଇଥାନ୍ତି। ରାତିରେ ସାଂସ୍କୃତିକ କାର୍ଯ୍ୟକ୍ରମ କରି ପରସ୍ପର ମଧ୍ୟରେ ଜୁହାର ଭେଟ ପାଇଁ ଗାଁରେ ପ୍ରସ୍ତୁତି ଚାଲିଛି। ନୂଆଁଖାଇଠାରୁ ବାସୀ ପର୍ବ ବଡଆଡମ୍ବର ସହ ପାଳନ କରାଯାଇଥାଏ।
