ନୂଆଦିଲ୍ଲୀ,୨୪।୧: ମୋଦି ସରକାର ‘ବନ୍ଦେ ମାତରମ’କୁ ଜାତୀୟ ସଙ୍ଗୀତ ପରି ସମାନ ସମ୍ମାନ ଦେବା ପାଇଁ ଏକ ପ୍ରୋଟୋକଲ ଆଣିବାକୁ ଯୋଜନା କରୁଛନ୍ତି। ଏକ ରିପୋର୍ଟ ଅନୁଯାୟୀ, ଚଳିତ ମାସର ପ୍ରାରମ୍ଭରେ ଗୃହ ମନ୍ତ୍ରଣାଳୟ ଦ୍ୱାରା ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଏହି ପ୍ରସଙ୍ଗ ଉପରେ ବିସ୍ତୃତ ଆଲୋଚନା କରାଯାଇଥିଲା। ଭାରତୀୟ ସମ୍ବିଧାନ ଅନୁଯାୟୀ, ଜାତୀୟ ସଙ୍ଗୀତ ଏବଂ ଜାତୀୟ ଗୀତ ଉଭୟକୁ ସମାନ ସମ୍ମାନ ଦିଆଯାଇଛି, କିନ୍ତୁ ଆଇନଗତ ଏବଂ ବାଧ୍ୟତାମୂଳକ ପ୍ରୋଟୋକଲ ଦୃଷ୍ଟିରୁ ଉଭୟ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ପାର୍ଥକ୍ୟ ଅଛି।
ଜାତୀୟ ସଙ୍ଗୀତ ଗାନ ସମୟରେ ଠିଆ ହେବା ବାଧ୍ୟତାମୂଳକ, ଏବଂ ଏହାକୁ ଅପମାନ କରିବା ଜାତୀୟ ସମ୍ମାନ ଅପମାନ ନିବାରଣ ଆଇନ, ୧୯୭୧ ଅନୁଯାୟୀ ଦଣ୍ଡନୀୟ। ଅନ୍ୟପକ୍ଷରେ, ଜାତୀୟ ଗୀତ ‘ବନ୍ଦେ ମାତରମ’ ଗାନ ସମୟରେ ଠିଆ ହେବା ପାଇଁ କୌଣସି ଆଇନଗତ ଆବଶ୍ୟକତା କିମ୍ବା ଲିଖିତ ନିୟମ ନାହିଁ।
ସୂଚନାଯୋଗ୍ୟ, ଗୃହ ମନ୍ତ୍ରଣାଳୟର ଏକ ବୈଠକରେ ଏହି ପ୍ରସଙ୍ଗ ଉପରେ ଆଲୋଚନା କରାଯାଇଥିଲା। ବୈଠକରେ ସମ୍ମାନର ପଦ୍ଧତି ସମେତ ଜାତୀୟ ଗୀତ ଗାଇବା ପାଇଁ ନିୟମ ଏବଂ ନିର୍ଦ୍ଦେଶାବଳୀ ସାମିଲ ଥିଲା। ବୈଠକରେ ଆଲୋଚନା ହୋଇଥିଲା ଯେ, ‘ବନ୍ଦେ ମାତରମ’ ଗାନ କରିବାର ସମୟ, ସ୍ଥାନ ଏବଂ ପଦ୍ଧତି ପାଇଁ ସ୍ପଷ୍ଟ ନିୟମ ସ୍ଥାପନ କରାଯିବା ଉଚିତ କି ନାହିଁ।
ମୋଦି ସରକାର ବର୍ଷବ୍ୟାପୀ ବନ୍ଦେ ମାତରମ ଉତ୍ସବ ପାଳନ କରୁଛନ୍ତି। ଭାଜପା କଂଗ୍ରେସ ଉପରେ ତୁଷ୍ଟୀକରଣ ରାଜନୀତି ଯୋଗୁଁ ଜାତୀୟ ସଙ୍ଗୀତର ମହତ୍ତ୍ୱକୁ ହ୍ରାସ କରୁଥିବା ଅଭିଯୋଗ କରିଛି।
୧୯୩୭ କଂଗ୍ରେସ ଅଧିବେଶନରେ ବନ୍ଦେ ମାତରମ୍ର କିଛି ପଦକୁ ହଟାଇ ଦିଆଯାଇଥିଲା, ଭାଜପା ଅଭିଯୋଗ କରିଛି ଯେ, ଏହି ନୀତି ବିଭାଜନର ମୂଳଦୁଆ ପକାଇଥିଲା। କଂଗ୍ରେସ କହିଛି ଯେ, ଭାଜପା ଇତିହାସକୁ ବିକୃତ କରୁଛି। ଗତ କିଛି ବର୍ଷ ମଧ୍ୟରେ, ବନ୍ଦେ ମାତରମ ପାଇଁ ଜାତୀୟ ସଙ୍ଗୀତ ପରି ଏକ ଢାଞ୍ଚା ଦାବି କରି କୋର୍ଟରେ ଅନେକ ଆବେଦନ ଦାଖଲ କରାଯାଇଛି।
Dharitri – Odisha’s No.1 Odia Daily
