ନୂଆଦିଲ୍ଲୀ,୧୩।୮: ଭିଆଇପି ଗାଡିରୁ ହଟିବ ସାଇରନ। ଭିଆଇପି ଗାଡିରୁ ନାଲି ବତୀ ହଟାଇବା ପରେ କେନ୍ଦ୍ର ଓ ସଡକ ପରିବହନ ମନ୍ତ୍ରୀ ବର୍ତ୍ତମାନ ଭିଆଇପି ଗାଡିରୁ ସାଇରନ ହଟାଇବାକୁ ଯୋଜନା କରୁଛନ୍ତି।
କେନ୍ଦ୍ର ମନ୍ତ୍ରୀ ନୀତିନ ଗଡକରୀ ପୁଣେରେ ଚାନ୍ଦନୀ ଚୌକ ଫ୍ଲାଏ ଓଭରର ଉଦଘାଟନ ଉତ୍ସବରେ ଯୋଗ ଦେଇଥିଲେ। ଉତ୍ସବରେ ଯୋଗ ଦେଇ ସଭାକୁ ସମ୍ବୋଧିତ କରିଥିଲେ। ସେ କହିଥିଲେ, ଶବ୍ଦ ପ୍ରଦୂଷଣ ଏକ ଚିନ୍ତାର ବିଷୟ। ଏହାକୁ ନିୟନ୍ତ୍ରଣ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ମୁଁ ବହୁତ ଭାଗ୍ୟବାନ ଯେ, ଭିଆଇପି ଗାଡିରୁ ଲାଲ ବତୀ ହଟାଇବାର ସୁଯୋଗ ପାଇଲି। ଏବେ ଗାଡିରୁ ସାଇରନ ସମସ୍ୟା ଦୂର କରିବାକୁ ଯୋଜନା କରୁଛି। ଗାଡିର ସାଇରନକୁ ଭାରତୀୟ ବାଦ୍ୟଯନ୍ତ୍ରର ମଧୁର ସଙ୍ଗୀତ ଦ୍ୱାରା ବଦଳିବା ପାଇଁ ଯୋଜନା କରୁଛି। ସାଇରନ ଶଦ୍ଦକୁ ଶ୍ରୁତି ମଧୁର କରିବା ପାଇଁ ବଂଶୀ, ତବଲା, ଶଙ୍ଖର ଶବ୍ଦ ବଦଳାଯିବ। ଏହାଦ୍ୱାରା ଶବ୍ଦ ପ୍ରଦୂଷଣକୁ ନିୟନ୍ତ୍ରଣ କରାଯାଇପାରିବ।
