ରାଞ୍ଚି,୧୧।୭ : ମହାରାଷ୍ଟ୍ରରେ ଶିବସେନା, କଂଗ୍ରେସ ଏବଂ ଏନସିପି ମିଳିତ ସରକାର ପତନ ପରେ ବର୍ତ୍ତମାନ ଝାଡଖଣ୍ଡରେ ସଙ୍କଟ ଦେଖାଦେଇଛି। ଗୋଟିଏ ପଟେ ଅନୁସନ୍ଧାନକାରୀ ସଂସ୍ଥା ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନ ଏବଂ ତାଙ୍କର ଘନିଷ୍ଠ ସହଯୋଗୀଙ୍କ ପାଇଁ କଡା ଚ୍ୟାଲେଞ୍ଜ ସୃଷ୍ଟି କରୁଥିବା ବେଳେ ଅନ୍ୟପକ୍ଷରେ ରାଷ୍ଟ୍ରପତି ନିର୍ବାଚନ ନେଇ ଝାଡଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ଏବଂ ସହଯୋଗୀ କଂଗ୍ରେସ ମଧ୍ୟରେ ଫାଟ ବୃଦ୍ଧି ପାଇବାରେ ଲାଗିଛି ବୋଲି ଚର୍ଚ୍ଚା ହେଉଛି। ତେବେ ଶାସକ ମିଳିତ ମଞ୍ଚର ସହଯୋଗୀମାନେ ଏଭଳି ଆଶଙ୍କାକୁ ଖଣ୍ଡନ କରି କହିଛନ୍ତି ଯେ ସବୁ ଠିକ ଅଛି।
ତେବେ ରାଞ୍ଚି ଏବଂ ଦିଲ୍ଲୀର ରାଜନୈତିକ କରିଡରରେ ଝାଡଖଣ୍ଡର ଅଢ଼େଇ ବର୍ଷ ପୁରୁଣା ସରକାରକୁ ନେଇ ନାନା କଳ୍ପନାଜଳ୍ପନା ଜାରି ରହିଛି। ରାଷ୍ଟ୍ରପତି ନିର୍ବାଚନରେ ଭାଜପାର ଦେଇଥିବା ଆଦିବାସୀ କାର୍ଡ ଏହାର ଏକ ବଡ଼ କାରଣ। ରାଷ୍ଟ୍ରପତି ପ୍ରାର୍ଥୀ ଭାବରେ ଦ୍ରୌପଦୀ ମୁର୍ମୁଙ୍କୁ ଛିଡ଼ା କରି ଏନଡିଏ ଝାଡଖଣ୍ଡରେ ଥିବା ସହଯୋଗୀ ଦଳଙ୍କ ମଧ୍ୟରେ ମତଭେଦ ସୃଷ୍ଟି କରିଛି। ଏହା ଜାରି ରହିଲେ ମହାରାଷ୍ଟ୍ରପରେ ଏବେ ଝାଡ଼ଖଣ୍ଡ ପାଳି ପଡ଼ିବ ବୋଲି ଚର୍ଚ୍ଚା ହେଉଛି। ଭାଜପା ଜେଏମଏମ ଏବଂ କଂଗ୍ରେସ ମେଣ୍ଟ ଉପରେ ତୀକ୍ଷ୍ଣ ନଜର ରଖିଛି।
ଝାଡଖଣ୍ଡର ଆଦିବାସୀ ଜନସଂଖ୍ୟା ଅଧିକ ରହିଛି । ମୁର୍ମୁଙ୍କ ନାମ ଘୋଷଣା ପୂର୍ବରୁ ବିରୋଧୀ ପ୍ରାର୍ଥୀ ଯଶୱନ୍ତ ସିହ୍ନାଙ୍କୁ ସମର୍ଥନ କରୁଥିବା ଜେଏମଏମ ଆଦିବାସୀଙ୍କ ନାମରେ ରାଜନୀତି କରିଆସୁଛି। ଏଭଳି ପରିସ୍ଥିତିରେ ଝାଡଖଣ୍ଡର ରାଜ୍ୟପାଳ ଥିବା ମୁର୍ମୁଙ୍କ ବିରୁଦ୍ଧରେ ଯାଇ ଯଶବନ୍ତ ସିହ୍ନାଙ୍କୁ ଭୋଟ ଦେବା ତାଙ୍କ ପାଇଁ କଷ୍ଟକର ହୋଇପଡିଛି। ଏଥି ସହିତ, ୨୦୧୨ ଭଳି ସୋରେନ ଯଶୱନ୍ତଙ୍କ ପକ୍ଷ ରଖିବାକୁ କଂଗ୍ରେସ ଚାହୁଁଛି। ୨୦୧୨ରେ ଝାଡ଼ଖଣ୍ଡରେ ଭାଜପା ଏବଂ ଜେଏମଏମ ସରକାର ଥିଲା। ରାଷ୍ଟ୍ରପତି ନିର୍ବାଚନରେ ଭାଜପା ଆଦିବାସୀ ନେତା ପିଏ ସାଙ୍ଗମାଙ୍କୁ ପ୍ରାର୍ଥୀ କରିଥିଲା। କିନ୍ତୁ ଜେଏମଏମ ୟୁପିଏ ପ୍ରାର୍ଥୀ ପ୍ରଣବ ମୁଖାର୍ଜୀଙ୍କୁ ଭୋଟ ଦେଇଥିଲା। ତେଣୁ ଯଦି ୨୦୧୨ ରେ ଜେଏମଏମ ସାଙ୍ଗମାଙ୍କୁ ବିରୋଧ କରିଥିଲା ତେବେ ଏଥର ମୁର୍ମୁଙ୍କୁ ବିରୋଧରେ କାହିଁକି ଯାଇପାରିବ ନାହିଁ ବୋଲି ଚର୍ଚ୍ଚା ହେଉଛି। ରାଜନୈତିକ ବିଶେଷଜ୍ଞଙ୍କ ଅନୁଯାୟୀ ଜେଏମଏମଙ୍କ ମୁର୍ମୁଙ୍କ ବିରୁଦ୍ଧରେ ଯିବା ମଧ୍ୟ କଷ୍ଟସାଧ୍ୟ କାରଣ ସିବୁ ସୋରେନ ପରିବାର ସହ ତାଙ୍କର ସମ୍ପର୍କ ଅତ୍ୟନ୍ତ ଘନିଷ୍ଠ ରହିଛି। ଏପରିସ୍ଥଳେ ଶାସକ ମେଣ୍ଟରେ ଫାଟ ବଢ଼ିବାର ଆଶଙ୍କା ରହିଛି ବୋଲି ଚର୍ଚ୍ଚା ହେଉଛି।
