ଆର୍‌ଟିଆଇ ତଥ୍ୟ ଦେଇ ନ ପାରି ଟଙ୍କା ଫେରାଇ ନେବାକୁ ନୋଟିସ
7:44 amOctober 7, 2021October 7, 2021 / 42

କଟକ ସଦର, ୭।୧୦(ଡି.ଏନ.ଏ.): ସୂଚନା ଅଧିକାର ଆଇନ (ଆର୍‌ଟିଆଇ) ବଳରେ ତଥ୍ୟ ପାଇବା ପାଇଁ ଜଣେ ଆବେଦନକାରୀ ୩୦୦୦ ଟଙ୍କା ଦାଖଲ କରିଥିଲେ। ହେଲେ କଟକ ପୂର୍ତ୍ତ ଡିଭିଜନ ନଂ.୨ର ଲୋକ ସୂଚନା ଅଧିକାରୀ ତଥ୍ୟ ଦେଇ ନ ପାରି ଉକ୍ତ ଜମା ଅର୍ଥ ଫେରାଇ ନେବା ଲାଗି ସମ୍ପୃକ୍ତ ସୂଚନା ଅଧିକାର କର୍ମୀଙ୍କୁ ନୋଟିସ ଦେଇଛନ୍ତି। ଏଭଳି ନୋଟିସ ସୂଚନା ଅଧିକାର ଆଇନ୍‌ର ଖୋଲାଖୋଲି ଉଲ୍ଲଂଘନ କରୁଛି ବୋଲି ୪୨ମୌଜା ଅନ୍ତର୍ଗତ ଝିଙ୍କିରିଆ ଗ୍ରାମର ସୂଚନା ଅଧିକାର କର୍ମୀ ମନୋଜ କୁମାର ଦେବତା କହିଛନ୍ତି। ୪୨ମୌଜା ମୁଖ୍ୟରାସ୍ତାର ସମ୍ପ୍ରସାରଣ ସମ୍ବନ୍ଧୀୟ ତଥ୍ୟ ଜାଣିବା ପାଇଁ ଦେବତା ସୂଚନା ଅଧିକାର ଆଇନ ବଳରେ କଟକ ପୂର୍ତ୍ତ ଡିଭିଜନ ନଂ.୨ର ଲୋକ ସୂଚନା ଅଧିକାରୀଙ୍କ ନିକଟରେ ଆବେଦନ କରିଥିଲେ। ରାସ୍ତାର ଡିଜାଇନ ଓ ଜେରକ୍ସ ଖର୍ଚ୍ଚ ବାବଦକୁ ୩ହଜାର ଟଙ୍କା ଦାଖଲ କରିବାକୁ ସମ୍ପୃକ୍ତ କାର୍ଯ୍ୟାଳୟର ଲୋକ ସୂଚନା ଅଧିକାରୀ ତଥା ସହକାରୀ ନିର୍ବାହୀଯନ୍ତ୍ରୀ ପତ୍ରସଂଖ୍ୟା ୪୪୬୮/୧୮ା୯ା୨୦୨୧ରେ ଆବେଦନକାରୀଙ୍କୁ ଜଣାଇଥିଲେ। ପରେ ଅର୍ଥ ଜମା କରି ଦେବତା ରସିଦ ପାଇଛନ୍ତି। ହେଲେ ସମ୍ପୃକ୍ତ ଲୋକ ସୂଚନା ଅଧିକାରୀ ପତ୍ରସଂଖ୍ୟା ୪୭୧୮/୪ା୧୦ା୨୦୨୧ରେ ଜମା ଅର୍ଥ ଫେରାଇ ନେବାକୁ ଆବେଦନକାରୀଙ୍କୁ ଜଣାଇଛନ୍ତି। କାରଣ ଆବଶ୍ୟକ ତଥ୍ୟ ଅଫିସ୍‌ରେ ଉପଲବ୍ଧ ନାହିଁ ବୋଲି ଉକ୍ତ ଚିଠିରେ ଉଲ୍ଲେଖ ରହିଛି। ତା’ହେଲେ ବ୍ୟୟ ଆକଳନ କିପରି କରାଯାଇଥିଲା ସେ ସଂକ୍ରାନ୍ତୀୟ ସୂଚନା ପାଇବା ପାଇଁ ପ୍ରଥମ ଅପିଲ କର୍ତ୍ତୃପକ୍ଷଙ୍କ ନିକଟରେ ଆବେଦନ କରିବେ ବୋଲି ଦେବତା ଜଣାଇଛନ୍ତି। ଝିଙ୍କିରିଆ-ଚାନ୍ଦୁଲି ମଧ୍ୟରେ ୬୦ ଫୁଟ ରାସ୍ତା ଚଉଡ଼ା କରାଗଲେ ବହୁସଂଖ୍ୟକ ଜନସାଧାରଣ ବାସହରା ହେବା ସହ ବ୍ୟବସାୟ ବନ୍ଦ ହେବା ଦର୍ଶାଇ ୪୨ ମୌଜାରେ ଅସନ୍ତୋଷ ପ୍ରକାଶ ପାଇଛି।