ମୋରବି (ଗୁଜରାଟ),୧୭ା୫: ଘରଭଡ଼ା ଶୁଝି ନ ପାରିବାରୁ ଜଣେ ଶ୍ରମିକ ତାଙ୍କ ସ୍ତ୍ରୀ ଓ ନାବାଳିକା ଝିଅକୁ ଯୌନ ଶୋଷଣ ପାଇଁ ଘରମାଲିକ(୫୫)ଙ୍କୁ ଅନୁମତି ଦେବା ଭଳି ଜଘନ୍ୟ ଘଟଣା ଗୁଜରାଟର ମୋରବି ଅଞ୍ଚଳରେ ଘଟିଛି। ଘରମାଲିକ ଓ ତାଙ୍କର ଜଣେ ସହଯୋଗୀ ଉକ୍ତ ଶ୍ରମିକଙ୍କ ସ୍ତ୍ରୀ ଏବଂ ଝିଅଙ୍କୁ ବାରମ୍ୱାର ଗଣବଳାତ୍କାର କରିଥିବା ଜଣାପଡ଼ିଛି। ଏନେଇ ମହିଳାଙ୍କ ମା’ଙ୍କ ଅଭିଯୋଗ କ୍ରମେ ସ୍ଥାନୀୟ ପୋଲିସ ସମ୍ପୃକ୍ତ ଶ୍ରମିକ ଏବଂ ଘରମାଲିକଙ୍କୁ ଗିରଫ କରି ଗୁରୁବାର କୋର୍ଟଚାଲାଣ କରିଛି। ଅନ୍ୟ ଜଣେ ଅଭିଯୁକ୍ତ ଫେରାର ହୋଇଯାଇଛନ୍ତି।
ପୋଲିସ ସୂଚନା ଅନୁଯାୟୀ, କାମ ସନ୍ଧାନରେ ପ୍ରାୟ ୬ ମାସ ପୂର୍ୱେ ଏହି ଶ୍ରମିକ ପରିବାର ସୁରେନ୍ଦ୍ରନଗରରୁ ମୋରବି ସହରକୁ ଆସି ମାସିକ ୨,୦୦୦ ଟଙ୍କା ଭଡ଼ାରେ ଏକ ଘର ନେଇ ରହୁଥିଲେ। ମାତ୍ର ପରିବାରର ଆର୍ଥିକ ସ୍ଥିତି ଖରାପ ହେବା ଯୋଗୁ ସେମାନେ ନିୟମିତ ଭାବେ ଘରଭଡ଼ା ଦେଇପାରି ନ ଥିଲେ। ଏହି ଦୁର୍ଦ୍ଦଶାର ସୁଯୋଗ ନେଇ ଘରମାଲିକ ଜଣକ ବକେୟା ଭଡ଼ା ଛାଡ଼ କରିବା ବଦଳରେ ଶ୍ରମିକଙ୍କ ସ୍ତ୍ରୀଙ୍କ ସହ ଶାରୀରିକ ସମ୍ପର୍କ ରଖିବାକୁ ଦାବି କରିଥିଲେ। ଏଥିରେ ଶ୍ରମିକ ଜଣକ ସହମତି ପ୍ରକାଶ କରିବା ପରେ ଘରମାଲିକ ଓ ତାଙ୍କର ଜଣେ ସହଯୋଗୀ ସେହି ମହିଳାଙ୍କୁ ବାରମ୍ୱାର ବଳାତ୍କାର କରିଛନ୍ତି। ହେଲେ ଏତିକିରେ ସେମାନଙ୍କର ଯୌନ ଲାଳସା ଶେଷ ହୋଇ ନ ଥିଲା। ପରବର୍ତ୍ତୀ ସମୟରେ ସେମାନେ ଶ୍ରମିକଙ୍କ ନାବାଳିକା ଝିଅଙ୍କ ଉପରେ କୁଦୃଷ୍ଟି ପକାଇଥିଲେ। ଏହି କ୍ଷେତ୍ରରେ ମଧ୍ୟ ପିଶାଚ ପିତା ସହମତି ଦେଇଥିଲା, ଯାହା ଫଳରେ ନାବାଳିକା କ୍ରମାଗତ ଯୌନ ଶୋଷଣର ଶିକାର ହୋଇଥିଲେ। ପୋଲିସ କହିଛି, ନାବାଳିକାଙ୍କୁ ଟଙ୍କାରା ସମେତ ବିଭିନ୍ନ ସ୍ଥାନକୁ ନିଆଯାଇ ଜମିଦାର ଏବଂ ତାଙ୍କ ସହଯୋଗୀଙ୍କ ଦ୍ୱାରା ଯୌନ ନିର୍ଯାତନା ଦିଆଯାଇଥିଲା।
ପୀଡ଼ିତା ମହିଳାଙ୍କ ମା’ ଏହି ଅମାନୁଷିକ ଘଟଣା ସମ୍ପର୍କରେ ଜାଣିବାକୁ ପାଇବା ପରେ ଏହି ସଙ୍ଗିନ ମାମଲା ପ୍ରଘଟ ହୋଇଥିଲା। ଜଣେ ପିତା ଓ ସ୍ୱାମୀର ଏଭଳି ବିଶ୍ୱାସଘାତକତା ଏବଂ ଯୌନଶୋଷଣର ଭୟାବହତାକୁ ଦେଖି ସେ ମେ’ ୧ ତାରିଖରେ ସ୍ଥାନୀୟ ପୋଲିସ ନିକଟରେ ଅଭିଯୋଗ ଦାଏର କରିଥିଲେ। ପୋଲିସ ମାମଲା ରୁଜୁ ତଦନ୍ତ ଚଳାଇ ସମ୍ପୃକ୍ତ ଶ୍ରମିକ ଏବଂ ଘରମାଲିକଙ୍କୁ ଗିରଫ କରିଛି। ଶ୍ରମିକଙ୍କୁ ଜେଲ୍ ପଠାଯାଇଥିବା ବେଳେ ଘରମାଲିକଙ୍କୁୁ ଅଧିକ ପଚରାଉଚରା ପାଇଁ ପୋଲିସ ଏକ ଦିନିଆ ରିମାଣ୍ଡରେ ନେଇଛି। ତୃତୀୟ ଅଭିଯୁକ୍ତ ଫେରାର ଅଛନ୍ତି। ତାଙ୍କୁ ଧରିବା ପାଇଁ ପୋଲିସ ପକ୍ଷରୁ ସ୍ୱତନ୍ତ୍ର ଟିମ୍ ଗଠନ କରାଯାଇ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି।
