ଭୁବନେଶ୍ୱର,୨୫।୬(ବ୍ୟୁରୋ): ଉତ୍କଳ ବିଶ୍ୱବିଦ୍ୟାଳୟରେ ଅଣଛାତ୍ରଙ୍କ ଦୌରାତ୍ମ୍ୟ ସୀମା ଟପିଛି। ଶୁକ୍ରବାର ଅପରାହ୍ନରେ ୫ ଗାଡିରେ ୧୦ରୁ ଅଧିକ ଅଣଛାତ୍ର ପହଞ୍ଚତ୍ ଖଣ୍ଡା ଓ ଭୁଜାଲି ବୁଲାଇ ଆତଙ୍କ ଖେଳାଇଛନ୍ତି। ଭୟରେ ଛାତ୍ରୀଛାତ୍ର ଦୌଡ଼ି ଜୀବନ ବଞ୍ଚାଇଥିବାବେଳେ ଯେଉଁମାନେ ପ୍ରତିବାଦ କରିଛନ୍ତି ସେମାନଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଛନ୍ତି। ଏପିରିକି ସମ୍ପୃକ୍ତ ଅଣଛାତ୍ରମାନେ କେତେଜଣ ଛାତ୍ରଙ୍କ ଉପରକୁ ଖଣ୍ଡା ଫୋପାଡ଼ିଥିଲେ ମଧ୍ୟ ସେମାନେ ଅଳ୍ପକେ ବର୍ତ୍ତି ଯାଇଛନ୍ତି। ଶେଷରେ ଗାଡ଼ିଗୁଡିକୁ ଭଙ୍ଗା ରୁଜା କରି ଦୀର୍ଘ ସମୟ ଧରି ଉତ୍ପାତ କରିଥିଲେ। ଏମାନଙ୍କ ମଧ୍ୟରେ ଜଣେ ନିଜକୁ କର୍ପୋରେଟର ପୁଅ ବୋଲି କହିବା ସହ ମୋର କିଏ କ’ଣ କରିବ କହି ଖରାପ ଭାଷାରେ ଗାଳିଗୁଲଜ କରିଥିଲେ। ସେ ଅଣଛାତ୍ରଙ୍କ ସହ ମିଶି ପ୍ରାୟ ୨୦ ମିନିଟ୍ ଧରି ଆତଙ୍କ ଖେଳାଇଥିଲେ। ସେ ଉକ୍ତ ବିଶ୍ୱବିଦ୍ୟାଳୟରେ ଇଣ୍ଟିଗ୍ରେଟେଡ୍ ଏମ୍ବିଏର ଚତୁର୍ଥ ବର୍ଷର ଛାତ୍ର ବୋଲି ଜଣାପଡିଛି। ବିଶ୍ୱବିଦ୍ୟାଳୟ କ୍ୟାମ୍ପସରେ ନିଜର ଦବ୍ଦବା ଦେଖାଇବା ପାଇଁ ଅଣଛାତ୍ରଙ୍କୁ ଧରି ଏଭଳି ଆତଙ୍କ ସୃଷ୍ଟି କରିଥିବା ସୂଚନା ମିଳିଛି। କମେଣ୍ଟମରାକୁ କେନ୍ଦ୍ର କରି ଏଭଳି ଘଟଣା ଘଟିଥିବା ଜଣାପହିଛି। କେତେଜଣ ଛାତ୍ର ଶହୀଦନଗର ଥାନାକୁ ଖବର ଦେବା ପରେ ପୋଲିସ ଘଟଣାସ୍ଥଳରେ ପହଞ୍ଚତ୍ଥିଲା। ଆତଙ୍କ ଖେଳାଉଥିବା ଅଣଛାତ୍ରମାନେ ଘଟଣାସ୍ଥଳରୁ ଛତ୍ରଭଙ୍ଗ ଦେଇଥିଲେ। ତେବେ ଏହାର ପ୍ରତିବାଦରେ ଛାତ୍ରମାନେ ବିଶ୍ୱବିଦ୍ୟାଳୟ ଗେଟ୍ ସମ୍ମୁଖରେ ଧାରଣାରେ ବସିଥିଲେ। ଅଭିଯୁକ୍ତଙ୍କୁ ଗିରଫ ନ ହେବା ଯାଏ ଆନ୍ଦୋଳନରୁ ହଟିବୁ ନାହିଁ ବୋଲି ଚେତାବନୀ ଦେଇଥିଲେ। ଏଥିସହ ବିଶ୍ୱବିଦ୍ୟାଳୟ କ୍ୟାମ୍ପସ ପରିସରରେ ସିସିଟିଭି ଲଗାଇବାକୁ ଦାବି କରିଥିଲେ। ପୋଲିସ ବୁଝାଶୁଝା କରି ଖୁବ୍ଶୀଘ୍ର ଆତଙ୍କ ଖେଳାଉଥିବା ଅଭିଯୁକ୍ତଙ୍କୁ ଗିରଫ କରାଯିବ ବୋଲି ପ୍ରତିଶ୍ରୁତି ଦେଇଥିଲା। ୩ଜଣ ଯୁବକଙ୍କୁ ଉଠାଇ ଆଣି ପଚରାଉଚରା କରୁଥିବା ପୋଲିସ ପକ୍ଷରୁ ସୂଚନା ପାଇବା ପରେ ଛାତ୍ରମାନେ ଧାରଣାରୁ ଉଠିଥିଲେ।
ଆନ୍ଦୋଳନକାରୀ ଛାତ୍ରଙ୍କ ସୂଚନାନୁଯାୟୀ, ଉତ୍କଳ ବିଶ୍ୱବଦ୍ୟାଳୟ କ୍ୟାମ୍ପସ ପରିସରରେ ଦୀର୍ଘଦିନ ଧରି ଅଣଛାତ୍ରମାନେ ମନ ଇଚ୍ଛା ପ୍ରବେଶ କରୁଛନ୍ତି। କେତେଜଣ ଛାତ୍ର ମଧ୍ୟ ସେମାନଙ୍କ ସହ ସାମିଲ ହୋଇ ଶିକ୍ଷାୟତନକୁ ଆଡ୍ଡାସ୍ଥଳରେ ପରିଣତ କରିଛନ୍ତି। ଝିଅଙ୍କୁ କମେଣ୍ଟ ମାରି ହଇରାଣ କରିବା ଦଳ ଦଳ ହୋଇ ମଦ ପିଉଛନ୍ତି। ଯୁବକ ଏକାଠି ହୋଇ ନିଶାସେବନ କରି ଉତ୍ପାତ କରିବା ନେଇ ପ୍ରାୟ ସମୟରେ ଅଭିଯୋଗ ହୋଇ ଆସୁଛି। ଛାତ୍ରଛାତ୍ରୀଙ୍କ ପକ୍ଷରୁ ବାରମ୍ବାର ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ଅବଗତ କରାଇଛନ୍ତି। କିନ୍ତୁ କାର୍ଯ୍ୟାନୁଷ୍ଠାନ ଗ୍ରହଣ କରିବା ବଦଳରେ ଅଭିଯୋଗକୁ ଆଦୌ ଗୁରୁତ୍ୱ ଦେଉ ନ ଥିବାରୁ ଶୁକ୍ରବାର ଏଭଳି ଘଟଣା ଘଟିଲା ବୋଲି ଛାତ୍ରମାନେ ଅଭିଯୋଗ କରିଛନ୍ତି। ଅଣଛାତ୍ରମାନେ ପୂର୍ବାହ୍ନରେ କ୍ୟାମ୍ପସ ପରିସରେ ଜଣେ ଇଣ୍ଟିଗ୍ରେଟେଡ୍ ଏମ୍ବିଏ ଛାତ୍ରୀଙ୍କୁ କମେଣ୍ଟ ମାରିବାରୁ ଉପସ୍ଥିତ ଛାତ୍ରମାନେ ବିରୋଧ କରିଥିଲେ। ଏହାକୁ ନେଇ ସେମାନଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଛାତ୍ରଗୋଷ୍ଠୀ ଓ ଅଣଛାତ୍ର ଗୋଷ୍ଠୀଙ୍କ ମଧ୍ୟରେ ଆପୋସ ସମାଧାନ ହୋଇଥିଲା। ହେଲେ ଅପରାହ୍ନରେ ଅଣଛାତ୍ରମାନେ ସଂଘବଦ୍ଧ ହୋଇ ପୁଣି କ୍ୟାମ୍ପସକୁ ଆସି ଛାତ୍ରୀମାନଙ୍କୁ କମେଣ୍ଟ ମାରିବା ସହ ଏପରି ଆତଙ୍କ ଖେଳାଇଥିଲେ। ଘଟଣା ପରଠାରୁ ବିଶ୍ୱବିଦ୍ୟାଳୟ ପରିସର ଅଶାନ୍ତ ହୋଇ ରହିଥିବାବେଳେ ଛାତ୍ରୀଛାତ୍ରମାନେ ଭୟଭୀତ ହୋଇପଡିଛନ୍ତି।
