ଭୁବନେଶ୍ୱର,୧୨ା୮(ବ୍ୟୁରୋ): ନବବଧୂ ପ୍ରଜ୍ଞାପାରମିତା ସ୍ବାଇଁଙ୍କ ଆତ୍ମହତ୍ୟାର କାରଣ ଖୋଜୁଛି ପୋଲିସ। ଶାଶୁଘର ଲୋକଙ୍କ ନିର୍ଯାତନା ସହି ନ ପାରି ସେ ଆତ୍ମହତ୍ୟା କରିଥିବା ନେଇ ତାଙ୍କ ଭାଇ ଅଭିଯୋଗ କରିଥିଲେ। ଘଟଣାକୁ ୭ ଦିନ ବିତିଯାଇଥିଲେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଇନାହିଁ। ଶାଶୁଘର ଲୋକେ ତଦନ୍ତରେ ସହଯୋଗ କରୁ ନ ଥିବାରୁ ମଞ୍ଚେଶ୍ୱର ଥାନା ପକ୍ଷରୁ ସେମାନଙ୍କୁ ନୋଟିସ କରାଯାଇଛି। ଥାନାରେ ହାଜର ହୋଇ ତଦନ୍ତରେ ସହଯୋଗ କରିବାକୁ ପ୍ରଜ୍ଞାଙ୍କ ସ୍ବାମୀ ପ୍ରଶାନ୍ତ ପାତ୍ର, ଶାଶୁ ଓ ନଣନ୍ଦଙ୍କୁ ପୋଲିସ ଡାକିଛି। ଏପଟେ ପ୍ରଜ୍ଞାଙ୍କ ବ୍ୟବଚ୍ଛେଦ ରିପୋର୍ଟ ପ୍ରସ୍ତୁତ ହୋଇସାରିଛି। ଶ୍ୱାସରୁଦ୍ଧରୁ ତାଙ୍କର ମୃତ୍ୟୁ ଘଟିଥିବା ସେଥିରେ ଉଲ୍ଲେଖ ରହିଛି। ତେବେ ଉକ୍ତ ରିପୋର୍ଟ ହସ୍ତଗତ ହୋଇ ନ ଥିବା ମଞ୍ଚେଶ୍ୱର ଥାନା ପକ୍ଷରୁ କୁହାଯାଇଛି। ପ୍ରଜ୍ଞାଙ୍କ ଶାଶୁଘର ଲୋକଙ୍କୁ ପଚରାଉଚରା ସହ ବ୍ୟବଚ୍ଛେଦ ରିପୋର୍ଟ ମିଳିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ନିଆଯାଇପାରେ ବୋଲି ସୂଚନା ମିଳିଛି।
ସୂଚନାଯୋଗ୍ୟ, ପଟିଆ ଜଗନ୍ନାଥ ନଗରର ପ୍ରଶାନ୍ତଙ୍କୁ ନିଆଳିର ପ୍ରଜ୍ଞାପାରମିତା ଜୁନ ୮ରେ ବିବାହ କରିଥିଲେ। ବିବାହର ୧୨ଦିନ ପରେ କ୍ୟାନସର ହୋଇଥିବା କହି ଶାଶୁ, ନଣନ୍ଦ ଓ ସ୍ବାମୀ ନିର୍ଯାତନା ଦେବା ସହ ଘରୁ ବାହାରି ଯିବାକୁ କହିଥିଲେ। ଫଳରେ ଜିଜିପି କଲୋନୀସ୍ଥିତ ଭଡାଘରେ ରହୁଥିବା ଭାଇ ପ୍ରିୟବ୍ରତ ଜୁନ ୨୦ରେ ପ୍ରଜ୍ଞାଙ୍କୁ ନିଜ ପାଖକୁ ନେଇ ଆସିଥିଲେ। ଏକ ଘରୋଇ ହସ୍ପିଟାଲରେ ତାଙ୍କର ସମସ୍ତ ପରୀକ୍ଷାନିରୀକ୍ଷା ହୋଇଥିଲା। ହେଲେ ତାଙ୍କର କ୍ୟାନ୍ସର ହୋଇ ନ ଥିବା ଡାକ୍ତର କହିଥିଲେ। ସାମନ୍ୟ ଦାନ୍ତ ପୋକ ଯୋଗୁ ପାଟିରେ ସମସ୍ୟା ହୋଇଥିବା କହିଥିଲେ। ଏନେଇ ଶାଶୁଘର ଲୋକଙ୍କୁ ପ୍ରଜ୍ଞା ଜଣାଇବା ପାଇଁ ବାରମ୍ବାର ଫୋନ କରିଥିଲେ ମଧ୍ୟ କିଛି ଉତ୍ତର ମିଳି ନ ଥିଲା। ଶାଶୁଘରକୁ ଫେରିବା ଆଶା ହରାଇ ପ୍ରଜ୍ଞା ମାନସିକ ସ୍ତରରେ ଭାଙ୍ଗି ପଡିଥିଲେ। ଭାଇ ଘରେ ନ ଥିବାବେଳେ ପ୍ରଜ୍ଞା ଆତ୍ମହତ୍ୟା କରିଥିଲେ। ଭାଇ ପ୍ରିୟବ୍ରତଙ୍କ ଅଭିଯୋଗକ୍ରମେ ମଞ୍ଚେଶ୍ୱର ଥାନା ପୋଲିସ ଆଇପିସି ଦଫା ୩୦୬,୪୯୮(କ) ,୩୪ ରେ ଏକ ମାମଲା (ନଂ.୨୮୦/୨୨) ରୁଜୁ କରି ତଦନ୍ତ ଆରମ୍ଭ କରିଥିଲା।
