ମୁମ୍ବାଇ,୨୧।୨ : କଂଗ୍ରେସ ବିନା ସେ କୌଣସି ରାଜନୈତିକ ସାମ୍ମୁଖ୍ୟ ଗଠନ କରିବେ ନାହିଁ ବୋଲି ସୋମବାର ଶିବସେନା ଏମ୍ପି ସଞ୍ଜୟ ରାଉତ କହିଛନ୍ତି। ତେବେ ଏହି ତୃତୀୟ ସାମ୍ମୁଖ୍ୟର ନେତୃତ୍ୱ ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ (କେସିଆର) ନେବେ ବୋଲି ସେ କହିଛନ୍ତି। ଶିବସେନା ହେଉଛି ପ୍ରଥମ ଦଳ ଯିଏକି କଂଗ୍ରେସକୁ ସାଙ୍ଗରେ ନେଇ ଆଲୋଚନା କରିଥିବା ସଞ୍ଜୟ ସୂଚିତ କରିଛନ୍ତି।
ସଞ୍ଜୟ ରାଉତ କହିଛନ୍ତି ଯେ କଂଗ୍ରେସ ବିନା ଏକ ରାଜନୈତିକ ସାମ୍ମୁଖ୍ୟ ଗଠନ ହେବ ବୋଲି ଆମେ କେବେ କହି ନାହୁଁ। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏକ ଭାଜପା ବିରୋଧି ରାଜନୈତିକ ମେଣ୍ଟ ଗଠନର ପରାମର୍ଶ ଦେଇଥିଲେ, ସେତେବେଳେ ଶିବସେନା ପ୍ରଥମ ରାଜନୈତିକ ଦଳ ଭାବେ କଂଗ୍ରେସକୁ ନେଇ ଆଲୋଚନା କରିଥିଲା। ସମସ୍ତଙ୍କୁ ସାଙ୍ଗରେ ନେଇ ନେତୃତ୍ୱ ନେବାକୁ କେସିଆର୍ଙ୍କ କ୍ଷମତା ଅଛି ବୋଲି ସଞ୍ଜୟ କହିଛନ୍ତି।
ମହାରାଷ୍ଟ୍ର ଭାଜପା ସଭାପତି ଚନ୍ଦ୍ରକାନ୍ତ ପାଟିଲଙ୍କ ମନ୍ତବ୍ୟ ଉପରେ ଏକ ପ୍ରଶ୍ନର ଉତ୍ତରରେ ସଞ୍ଜୟ କହିଛନ୍ତି, ସେ ଆମକୁ ପରାମର୍ଶ ଦେବାର ଆବଶ୍ୟକତା ନାହିଁ। ସେ ତାଙ୍କ ଦଳକୁ ଦେଖିବା ଉଚିତ ଯାହା ଦିନକୁ ଦିନ ଦୁର୍ବଳ ହେବାରେ ଲାଗିଛି। ଏଥିସହିତ ସଞ୍ଜୟ କହିଛନ୍ତି କେସିଆର ଏବଂ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଦେଶର ବିକାଶ ତଥା ରାଜନୈତିକ ସ୍ଥିତି ଉପରେ ଆଲୋଚନା କରିଛନ୍ତି ଏବଂ ଉଭୟ ମୁଖ୍ୟମନ୍ତ୍ରୀ ଅନ୍ୟ ଦଳର ନେତାମାନଙ୍କ ସହିତ ଖୁବ ଶୀଘ୍ର ସାକ୍ଷାତ କରିବେ।
ରବିବାର ଭାଜପା ବିରୋଧି ତୃତୀୟ ସାମ୍ମୁଖ୍ୟ ଗଠନ ପାଇଁ କେତେକ ରାଜନୈତିକ ଦଳର ନେତା ଏକାଠି ହୋଇଥିଲେ । ସେବେଠାରୁ, ଏହି ପ୍ରଶ୍ନ ଉଠୁଛି ଯେ ଭାଜପା ବିରୋଧରେ ଗଠିତ ହେବାକୁ ଥିବା ଏହି ତୃତୀୟ ସାମ୍ମୁଖ୍ୟକୁ କିଏ ଆଗେଇ ନେବ? ଏହି ପ୍ରଶ୍ନ ପରେ ସଞ୍ଜୟ ରାଉତଙ୍କ ପ୍ରତିକ୍ରିୟା ସାମ୍ନାକୁ ଆସିଛି।
ଭାଜପା ସରକାରକୁ ପରାସ୍ତ କରିବାକୁ ଗଠିତ ହେବାକୁ ଯାଉଥିବା ଏହି ତୃତୀୟ ସାମ୍ମୁଖ୍ୟକୁ କିଏ ଆଗେଇ ନେବ ନେଇ କଂଗ୍ରେସର ପ୍ରତିକ୍ରିୟା ମଧ୍ୟ ସାମ୍ନାକୁ ଆସିଛି। ମହାରାଷ୍ଟ୍ର କଂଗ୍ରେସ ସଭାପତି ନାନା ପଟୋଲ କହିଛନ୍ତି ଯେ ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓଙ୍କ ଉଦ୍ୟମକୁ ସେ ସ୍ବାଗତ କରୁଛନ୍ତି, କିନ୍ତୁ ଆଞ୍ଚଳିକ ଦଳର ଏଭଳି ପଦକ୍ଷେପ କଂଗ୍ରେସ ଦଳ ବିନା ସଫଳ ହୋଇପାରିବ ନାହିଁ। ଏଥି ସହିତ ଏହାର ନେତୃତ୍ୱ ସମ୍ପର୍କରେ ସେ କହିଛନ୍ତି ଯେ ଶାସକ ଭାଜପା ବିରୋଧରେ କଂଗ୍ରେସ ହେଉଛି ଏକମାତ୍ର ବିକଳ୍ପ।
