ନୂଆପଡ଼ା,୫।୯(ମକାରୁ ବେମାଲ): ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ଆଗ୍ରେନ ପଞ୍ଚାୟତ ସନବାହାଲି ଗାଁର କ୍ଲବ ଘରେ ଚାଲିଛି ପିଲାଙ୍କ ଭବିଷ୍ୟତ ଗଢ଼ା। ସନବାହାଲି ପ୍ରାଥମିକ ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ମୋଟ ୫୨ଜଣ ଛାତ୍ରୀଛାତ୍ର ରହିଥିବା ବେଳେ ଜଣେ ଶିକ୍ଷକ ଶିକ୍ଷାଦାନ କରୁଛନ୍ତି। ବିଦ୍ୟାଳୟ ଗୃହ ନ ଥିବାରୁ ଗାଁର ମା’ ବସ୍ତ୍ରାଣୀ ୟୁଥ କ୍ଲବ ବା କ୍ରିକେଟ କ୍ଲବ ଘରେ ପିଲାଙ୍କୁ ପାଠପଢା ଯାଉଛି। ଗୋଟିଏ କୋଠରିରେ ପ୍ରଥମରୁ ପଞ୍ଚମ ଶ୍ରେଣୀ ପିଲାଙ୍କୁ ବସାଇ ଶିକ୍ଷକ ପାଠ ପଢ଼ାଉଛନ୍ତି। ଏଥିରେ ପିଲା କିଭଳି ଅଧ୍ୟୟନ କରୁଥିବେ ତାହା ସହଜେ ଅନୁମେୟ।
ସୂଚନା ମୁତାବକ ଖଡିଆଳ ଓ କୋମନା ବ୍ଲକ ମଧ୍ୟ ଭାଗରେ ଥିବା ଲୋୟର ଇନ୍ଦ୍ର ଜଳ ସେଚନ ପ୍ରକଳ୍ପ ଯୋଗୁ ସନବାହାଲି ସମ୍ପୂର୍ଣ୍ଣ ବୁଡି ଅଞ୍ଚଳ ଭାବେ ଘୋଷଣା ହୋଇଥିଲେ ମଧ୍ୟ ଲୋକେ ଗାଁ ଛାଡି ଯାଇ ନ ଥିଲେ। ୨୦୨୨ ଜୁନ ୩ରେ ଗାଁ ଛାଡିବା ପାଇଁ ଜିଲାପାଳଙ୍କ ଚିଠି ଆଧାରରେ ଗ୍ରାମବାସୀ ଗାଁ ଛାଡି ଦେଇଥିଲେ। ସନବାହାଲି ଗ୍ରାମବାସୀ ୫ ଶହ ମିଟର ଦୂର ବିଜୁ ଏକ୍ସପ୍ରେସ ୱ କଡରେ ବସତି ସ୍ଥାପନ କରିଛନ୍ତି। ଗାଁ ବୁଡି ଗଲା ବୋଲି ବିଦ୍ୟାଳୟକୁ ଶିକ୍ଷା ବିଭାଗ ପକ୍ଷରୁ ବନ୍ଦ କରି ଦିଆଯାଇଥିଲା। ଫଳରେ ଗାଁର ପିଲାଙ୍କ ଭବିଷ୍ୟତ ଅନ୍ଧାର ଭିତରକୁ ଠେଲି ହୋଇଯାଉଛି। ଗ୍ରାମବାସୀ ବିଦ୍ୟାଳୟ ଗାଁରେ ରହୁ ବୋଲି ଦାବି କରିବା ପରେ ସନବାହାଲି ପ୍ରାଥମିକ ବିଦ୍ୟାଳୟ ରହିଛି। କିନ୍ତୁ ବିଦ୍ୟାଳୟ ଗୃହ ନାହିଁ। ସନବାହାଲି ଗାଁଠାରୁ ବେଳଗାଁ ଓ ଆଗ୍ରେନ ୩ କି.ମି. ଲେଖାଏ ଯିବାକୁ ପଡେ। ବିଜୁ ଏକ୍ସପ୍ରେସ ୱେରେ ଦୁର୍ଘଟଣା ବଢିବାରେ ଲାଗିଛି। ସେହି ରାସ୍ତାରେ କୁନି ପିଲାମାନଙ୍କୁ ମରଣ ମୁହଁରେ ଠେଲି ଦେବୁ କି ବୋଲି ଗ୍ରାମବାସୀ ପ୍ରଶ୍ନ କରିଛନ୍ତି। ଛାତ୍ରୀଛାତ୍ରଙ୍କ ଭବିଷ୍ୟତ ବିଭାଗୀୟ ଅଧିକାରୀ ଓ କର୍ମଚାରୀମାନେ ଅନ୍ଧାରକୁ ଠେଳି ଦେଉଛନ୍ତି ବୋଲି ଅଭିଯୋଗ କରିଛନ୍ତି। ଗାଁରେ ବିଦ୍ୟାଳୟ ଗୃହ ନାହିଁ। ପିଲା କ୍ଲବ ଘରେ ପାଠ ପଢୁଛନ୍ତି। ଅନ୍ୟ ଅସୁବିଧା ନ କହିବା ଭଲ। ଏ ସଂକ୍ରାନ୍ତରେ କୋମନା ଗୋଷ୍ଠି ଶିକ୍ଷା ଅଧିକାରୀ ଅନିତା ପଣ୍ଡାଙ୍କୁ ପଚାରିବାରୁ ମୁଁ ମିଟିଂକୁ ଯାଉଛି ବୋଲି କଥାକୁ ଏଡାଇ ଦେଇଥିଲେ। ସନବାହାଲି ଗାଁରେ ନୂତନ ବିଦ୍ୟାଳୟ ଗୃହ ଦିଆଯାଉ ବୋଲି ବିଦ୍ୟାଳୟ ପରିଚାଳନା କମିଟି ସଭାପତି ଚରଣ ମାଝି, ଲକ୍ଷ୍ମୀ ଅହିର, ମହେନ୍ଦ୍ର ମାଝି, ଉଜଳ ପଟେଲ, ନକୁଳ ପଟେଲ, ଚନ୍ଦ୍ରିକା ମାଝି, ସୁଶିଳା ସୁନାନୀ, ସାଧୁ ପଟେଲ, ହର ମୋହନ ମେହେର, ମାନସିଂ ଅହିର, ନାରାୟଣ ଅହିର, ଜଳଧର ପଟେଲ, ଚତୁର ମାଝି, କୁନୁ ମାଝି, ଦୃପସିଂ ମାଝି, ଜଗଦିଶ ପଟେଲ, ଭାନୁ ପ୍ରତାପ ମାଝି ପ୍ରମୁଖ ଦାବି କରିଛନ୍ତି।
