ନୂଆଦିଲ୍ଲୀ,୧୫।୮: ଅନ୍ତଃରାଷ୍ଟ୍ରୀୟ ବଜାରରେ ଅଶୋଧିତ ତୈଳ ଦର ଗତ କିଛିମାସ ହେଲା କ୍ରମାଗତ ହ୍ରାସ ପାଇଚାଲିଛି। ହେଲେ ତା’ର ପ୍ରଭାବ ଭାରତ ବଜାରରେ ଦେଖିବାକୁ ମିଳୁନାହିଁ। ଯାହାକୁ ନେଇ ସବୁ ବର୍ଗର ଖାଉଟି ସରକାରଙ୍କ ଉପରେ ଅସନ୍ତୋଷ ପ୍ରକାଶ କରିଛନ୍ତି। କରୋନା ମହାମାରୀ ଯୋଗୁ ଗତ ୧୫ ମାସ ହେବ ପ୍ରାୟ ୩୦% ଲୋକଙ୍କ ଆର୍ଥିକ ଅବସ୍ଥା ଅତି ଶୋଚନୀୟ ହୋଇପଡ଼ିଛି। ସେହିଭଳି ଏହି ସମୟ ମଧ୍ୟରେ ରୋଜଗାର ଏକ ପ୍ରକାର ଠପ୍ ହୋଇଯାଇଛି। ଗୋଟିଏ ପଟେ ଦେଶର ପେଟ୍ରୋଲ୍ ଦର ୨୦ ରାଜ୍ୟର ପ୍ରାୟ ସମସ୍ତ ସହରରେ ୧୦୦ ଟଙ୍କା ଟପି ରେକର୍ଡ କରିଛି। ସେହିପରି ଡିଜେଲ୍ ଦର ମଧ୍ୟ ଅହେତୁକ ଭାବେ ବଢି ଚାଲିଛି। ଏହା ଦ୍ୱାରା ପରିବହନଠାରୁ ପରିବା ହାଟ ପର୍ଯ୍ୟନ୍ତ ସବୁ ସ୍ଥାନରେ ଚଡ଼କ ପଡ଼ିଛି। ଏପରି କି ତୈଳ ଦର କମୁ ନ ଥିବାରୁ ସବୁ ବର୍ଗର ଖାଉଟିଙ୍କ ପକେଟ୍ ଖାଲି ହେଉଛି ବୋଲି ବିଭିନ୍ନ ସର୍ଭେରୁ ଜଣାପଡିଛି। ଏହି ଘଟଣା ସମ୍ପର୍କରେ ରାଜ୍ୟ ବ୍ୟବସାୟୀ ମହାସଂଘର ମହାସଚିବ ସୁଧାକର ପଣ୍ଡା କହିଛନ୍ତି, ପେଟ୍ରୋଲଠାରୁ ଡିଜେଲ ଦର ବୃଦ୍ଧି ସବୁ ବର୍ଗ ଓ କ୍ଷେତ୍ର ପାଇଁ ସମସ୍ୟା ସୃଷ୍ଟି କରିଛି। ଡିଜେଲ ଯାନ ଜରିଆରେ ପ୍ରାୟ ୭୦% ମାଲ୍ ପରିବହନ ହୋଇଥାଏ। ତୈଳ ଦର ବୃଦ୍ଧି ଯୋଗୁ ଗତ ୮ ମାସ ମଧ୍ୟରେ ଅତ୍ୟାବଶ୍ୟକ ବଜାର ଦର କ୍ରମାଗତ ବୃଦ୍ଧି ଘଟୁଛି। ଫଳରେ ବ୍ୟବସାୟୀ ଆଗରୁ ଯେଉଁ ସାମଗ୍ରୀକୁ ୧୦୦ ଟଙ୍କାରେ ବିକ୍ରି କରୁଥିଲା, ଡିଜେଲ ଓ ପରିବହନ ବାବଦର ଅତିରିକ୍ତ ଖର୍ଚ୍ଚ ପାଇଁ ସେ ସବୁ ସାମଗ୍ରୀର ଦର ବର୍ତ୍ତମାନ ୬୦ରୁ ୮୦% ବୃଦ୍ଧି ପାଇଛି। ଯାହାକୁ ଖାଉଟି ପରୋକ୍ଷରେ ଭରଣା କରୁଛନ୍ତି ବୋଲି ସେ ମତବ୍ୟକ୍ତ କରିଛନ୍ତି। ଗତ ୨୮ ଦିନ ହେବ ପେଟ୍ରୋଲ୍ ଏବଂ ଡିଜେଲ ଦର ବୃଦ୍ଧି ଘଟି ନ ଥିଲେ ସୁଦ୍ଧା ଖାଉଟିଙ୍କ ପାଇଁ ସେ ଭଳି କିଛି ପଦକ୍ଷେପ ଉଭୟ ସରକାର ଓ ତୈଳ କମ୍ପାନୀଗୁଡ଼ିକ ପକ୍ଷରୁ ନିଆଯାଇ ନାହିଁ।
ଦେଶର ପ୍ରମୁଖ ତୈଳ ବିପଣନ କମ୍ପାନୀ ଭାରତୀୟ ତୈଳ ନିଗମ (ଆଇଓସିଏଲ୍)ର ସୂଚନା ଅନୁସାରେ ଜୁଲାଇ ୧୭ରେ ଶେଷ ଥର ପାଇଁ ତୈଳ ଦର ପରିବର୍ତ୍ତନ ହୋଇଥିଲା। ଶନିବାର ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୧୦୨.୬୬ ଟଙ୍କା ରହିଥିବା ବେଳେ ଡିଜେଲ ୯୭.୯୫ ଟଙ୍କାରେ ବିକ୍ରି ହେଉଛି। ସେହିଭଳି ଦିଲ୍ଲୀରେ ପେଟ୍ରୋଲ ଲିଟର ପିଛା ୧୦୧. ୮୪ ଟଙ୍କା ଏବଂ ଡିଜେଲ ୮୯.୮୭ ଟଙ୍କା ରହିଛି। ଗତ ଏପ୍ରିଲ୍ ୨୦୨୦ରୁ ଆଜି ପର୍ଯ୍ୟନ୍ତ ରାଜଧାନୀ ଦିଲ୍ଲୀରେ ପେଟ୍ରୋଲ ଉପରେ ୩୨.୨୫ ଟଙ୍କା ବୃଦ୍ଧି ହୋଇଛି। ଫଳରେ ୬୯.୫୯ ଟଙ୍କାରୁ ଆସି ୧୦୧.୮୪ ଟଙ୍କାରେ ପହଞ୍ଚତ୍ଛି, ଅର୍ଥାତ୍ ଏହି ସମୟ ମଧ୍ୟରେ ଏଠାରେ ୪୬.୩୪% ବୃଦ୍ଧି ଘଟିଛିି। ସେହିପରି ଡିଜେଲ୍ ଦରରେ ମଧ୍ୟ ୨୭.୫୮ ଟଙ୍କା ବଢ଼ିଛି, ୬୨.୨୯ ଟଙ୍କାରୁ ଆସି ୮୯.୮୭ ଟଙ୍କା ଛୁଇଁଛି। ଏହି ସମୟ ମଧ୍ୟରେ ଡିଜେଲ୍ ୪୪.୨୭% ବଢ଼ିଛି ବୋଲି ଜଣାପଡିଛି। ଅପରପକ୍ଷରେ ଅନ୍ତଃରାଷ୍ଟ୍ରୀୟ ସ୍ତରରେ ଅଶୋଧିତ ତୈଳ ମୂଲ୍ୟରେ ହ୍ରାସ ଘଟୁଛି, ଯାହା ଫଳରେ ଭାରତ ବଜାରରେ ୨୮ ଦିନ ହେବ ତୈଳ ଦର ସ୍ଥିର ରହିଛି। ଗତବର୍ଷ ଏପ୍ରିଲରୁ ଆଜି ପର୍ଯ୍ୟନ୍ତ ପେଟ୍ରୋଲ ଓ ଡିଜେଲ୍ ମୂଲ୍ୟରେ ୪୦%ରୁ ଅଧିକ ବୃଦ୍ଧି ହୋଇଥିବା ବଜାର ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି।
