ନୂଆଦିଲ୍ଲୀ,୧୮।୨: ଭାରତ ଋଷିଆଠାରୁ ତେଲ ଆମଦାନୀ ବନ୍ଦ କରିଥିବା ନେଇ ଆମେରିକାର ଦାବିକୁ ଋଷିଆ ସମ୍ପୂର୍ଣ୍ଣ ରୂପେ ଖଣ୍ଡନ କରିଛି। ବୁଧବାର ଋଷିଆ ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ନୂଆଦିଲ୍ଲୀ ତାର ଶକ୍ତି ନୀତିରେ କୌଣସି ପରିବର୍ତ୍ତନ କରିଥିବା ନେଇ ସେମାନଙ୍କ ପାଖରେ କୌଣସି ସୂଚନା ନାହିଁ।
ଋଷିଆ ବୈଦେଶିକ ମନ୍ତ୍ରଣାଳୟର ମୁଖପାତ୍ର ମାରିଆ ଜାଖାରୋଭା କହିଛନ୍ତି ଯେ, ଭାରତର ଋଷିଆ ସହ ତୈଳ ବ୍ୟାପାର ଉଭୟ ଦେଶ ପାଇଁ ଲାଭଦାୟକ ଏବଂ ଏହା ଅନ୍ତର୍ଜାତୀୟ ବଜାରରେ ସ୍ଥିରତା ରକ୍ଷା କରେ। ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ବୈଦେଶିକ ସଚିବ ମାର୍କୋ ରୁବିଓଙ୍କ ଦାବିକୁ ସମାଲୋଚନା କରିଛନ୍ତି।
ନିକଟରେ ଆମେରିକା ଦାବି କରିଥିଲା ଯେ, ଏକ ନୂତନ ବାଣିଜ୍ୟ ଚୁକ୍ତି ଅନୁଯାୟୀ ଭାରତ ଋଷିଆରୁ ତେଲ କିଣିବା ବନ୍ଦ କରିବାକୁ ପ୍ରତିଶ୍ରୁତି ଦେଇଛି। ଏହି ଚୁକ୍ତି ପରେ ଭାରତୀୟ ସାମଗ୍ରୀ ଉପରେ ଆମେରିକା ଟ୍ୟାରିଫ୍କୁ ୫୦% ରୁ କମାଇ ୧୮% କରିଥିଲା।
ଭାରତ ଏପର୍ଯ୍ୟନ୍ତ ଏହି ଦାବି ଉପରେ କୌଣସି ସ୍ପଷ୍ଟ ସୂଚନା ଦେଇନାହିଁ। ତେବେ ନୂଆଦିଲ୍ଲୀ ସର୍ବଦା କହିଆସିଛି ଯେ, “ରାଷ୍ଟ୍ରୀୟ ସ୍ୱାର୍ଥ” ହିଁ ଭାରତର ଶକ୍ତି ଆମଦାନୀ ନିଷ୍ପତ୍ତିର ମୁଖ୍ୟ ଆଧାର ହେବ।
ଭାରତ ଏହି ଘଟଣାରେ ଏପର୍ଯ୍ୟନ୍ତ ଚୁପ୍ ରହିଥିବାରୁ ଆଗାମୀ ଦିନରେ ଭାରତ-ଋଷିଆ ଏବଂ ଭାରତ-ଆମେରିକା ମଧ୍ୟରେ ଥିବା ରଣନୈତିକ ସମ୍ପର୍କ କିପରି ମୋଡ଼ ନେଉଛି, ତାହା ଉପରେ ସମସ୍ତଙ୍କ ନଜର ରହିଛି।
