ଚେନ୍ନାଇ,୮ା୧୦: ଚୋଳବଂଶୀ ରାଜାମାନେ ହିନ୍ଦୁ ନ ଥିଲେ କି ସେମାନଙ୍କ ଶାସନ କାଳରେ ହିନ୍ଦୁ ନାମରେ କୌଣସି ଧର୍ମ ନ ଥିଲା ବୋଲି ଅଭିନେତା କମଲ ହାସନ କହିଛନ୍ତି, ଯାହାକୁ ନେଇ ବିବାଦ ଉଠିଛି। କମଲ ହାସନଙ୍କ ମତରେ ଭଇନାଭମ୍, ଶୈବମ୍ ଓ ବୈନାଭମ୍ ନାମରେ ୩ଟି ଧର୍ମ ଚୋଳ ରାଜବଂଶ ଅମଳରେ ଥିଲା। ବ୍ରିଟିଶ୍ମାନେ ଭାରତକୁ ଶାସନ କରିବା ସମୟରେ ଥୁଥୁକୁଡ଼ିର ନାମ ପରିବର୍ତ୍ତନ କରି ଟୁଟିକୋରିନ୍ କଲାଭଳି ହିନ୍ଦୁ ଶବ୍ଦର ପ୍ରଚଳନ ସେମାନଙ୍କ ଦ୍ୱାରା କରାଯାଇଛି, ଯାହାର ପ୍ରକୃତ ଅର୍ଥ ବ୍ରିଟିଶମାନେ ମଧ୍ୟ ଜାଣି ନ ଥିବା ସେ ପ୍ରକାଶ କରିଛନ୍ତି।
ମଣିରତ୍ନମଙ୍କ ପାନ୍ ଇଣ୍ଡିଆ ଫିଲ୍ମ ‘ପୋନ୍ନିୟିନ ସେଲଭାନ୍-୧’ ରିଲିଜ୍ର ଗୋଟିଏ ଦିନ ପରେ ଜାତୀୟ ପୁରସ୍କାର ବିଜେତା ଭେଟ୍ରିମାରାନ କହିଥିଲେ, ଚୋଳବଂଶୀ ହିନ୍ଦୁ ନ ଥିଲେ, କିନ୍ତୁ ଭାଜପା ଆମ ପରିଚୟକୁ ଚୋରି କରିବାକୁ ଚାହୁଁଛି। ଏହାପୂର୍ବରୁ ଗୈରିକ ଦଳ ତାମିଲ କବି ତିରୁବ୍ବଲୁବରଙ୍କୁ ନେଇ ଧ୍ରୁବୀକରଣ ରାଜନୀତି କରିଆସିଛି। ଆମେ ଏହାକୁ ଆଦୌ ବରଦାସ୍ତ କରିବୁ ନାହିଁ ବୋଲି ସେ କହିଥିଲେ। ଏହାପରେ ଭେଟ୍ରିମାରାନଙ୍କୁ ସମର୍ଥନ କରି କମଲ ନିଜ ମନ୍ତବ୍ୟ ରଖିଛନ୍ତି। ଅନ୍ୟପକ୍ଷେ ଭାଜପା ନେତା ଏଚ୍. ରାଜା ଏହାର ବିରୋଧ କରିଛନ୍ତି। ଚୋଳବଂଶୀ ରାଜା ହିନ୍ଦୁ । ଭେଟ୍ରିମାରାନଙ୍କ ପରି ଇତିହାସରେ ବିଜ୍ଞ ନୁହେଁ ବୋଲି ଭାଜପା ନେତା ସେ କହିଛନ୍ତି। ଚୋଳ ରାଜାଙ୍କ ଶାସନକାଳରେ ଦୁଇଟି ଚର୍ଚ୍ଚ ଓ ଗୋଟିଏ ମସ୍ଜିଦ୍ ତିଆରି କରିଥିଲେ। ରାଜାଙ୍କ ଶାସନକୁ ନେଇ ତାମିଲନାଡୁରେ ବିବାଦ ପ୍ରଥମ ନୁହେଁ। ଏହା ପୂର୍ବରୁ ୨୦୧୯ରେ ଫିଲ୍ମ ନିର୍ଦ୍ଦେଶକ ରଣଜିତ ଚୋଳବଂଶୀ ଶାସକ ଦଳିତମାନଙ୍କ ଉପରେ ଅତ୍ୟାଚାର କରୁଥିବା କହିଥିଲେ।
