ଚଢ଼ାଉ ନାହିଁ, ଓଜନରେ ଠକେଇ ବଢ଼ୁଛି
8:01 amOctober 9, 2021 / 42

କଟକ ଅଫିସ,୯।୧୦: ରାଜ୍ୟରେ ଏବେ ନକଲି ସାମଗ୍ରୀଠାରୁ ଆରମ୍ଭ କରି ବିଭିନ୍ନ ପ୍ରକାର ଠକେଇ ଚାଲିଛି। ବିଶେଷକରି କିଛି ଲାଭଖୋର ମନୋବୃତ୍ତିର ବ୍ୟବସାୟୀ ଓଜନ ଓ ମାପରେ ଲୋକଙ୍କୁ ଠକି ଚାଲିଛନ୍ତି। ଓଜନ ଓ ମାପ ବିଭାଗର ନିୟମିତ ଚଢ଼ାଉ ହେଉ ନ ଥିବାରୁ ଅସାଧୁ ବ୍ୟବସାୟୀଙ୍କ ଉପରେ ଲଗାମ ଲଗାଯାଇପାରୁ ନାହିଁ। ଫଳରେ ଅସାଧୁ ବ୍ୟବସାୟୀଙ୍କ ଠକାମି ପ୍ରବୃତ୍ତି ଦିନକୁ ଦିନ ବୃଦ୍ଧି ପାଇବାରେ ଲାଗିଛି। କଟକ ଜିଲାରେ ଏଭଳି ଠକେଇ ବଢ଼ିବାରେ ଲାଗିଛି। ସାଧାରଣ ଲୋକେ ମାଛ, ମାଂସ ଠାରୁ ଆରମ୍ଭ କରି ଡାଲି, ଚାଉଳ, ସୁନାରୁପାର ଓଜନରେ ଠକେଇର ଶିକାର ହେଉଛନ୍ତି। ଏପରିକି ସହରର ବହୁ ପେଟ୍ରୋଲ ପମ୍ପରେ ମଧ୍ୟ ମାପ କମ୍‌ କରି ଠକୁ ଥିବାର ସାଧାରଣରେ ଅଭିଯୋଗ ହେଉଛି। ଅପରପକ୍ଷରେ ଆବଶ୍ୟକତା ଠାରୁ କମ୍‌ ଅଧିକାରୀ ଓ କର୍ମଚାରୀ ଥିବାରୁ ନିୟମିତ ଚଢ଼ାଉ କରିବା ସମ୍ଭବ ହୋଇ ପାରୁ ନାହିଁ ବୋଲି ବିଭାଗ ପକ୍ଷରୁ ସଫେଇ ଦିଆଯାଉଛି।
ମିଳିଥିବା ତଥ୍ୟ ଅନୁଯାୟୀ, କଟକ ମାପ ଓ ଓଜନ ବିଭାଗରେ କଟକ ସହର, ଜଗତପୁର, ଆଠଗଡ଼ ଓ ବାଙ୍କୀକୁ ମିଶାଇ ମୋଟ ୭ଟି ଇନ୍ସପେକ୍ଟର ପଦବୀ ରହିଛି। ହେଲେ ବର୍ତ୍ତମାନ ୭ଜଣରୁ ମାତ୍ର ୪ଜଣ ଇନ୍ସପେକ୍ଟର ରହିଛନ୍ତି। ଏପରି କି ଏହି ୪ ଜଣଙ୍କ ମଧ୍ୟରୁ ଜଣେ ଏବେ ତିନି ମାସ ପାଇଁ ଛୁଟିରେ ରହିଛନ୍ତି। କଟକ ଓଜନ ଓ ମାପ ବିଭାଗର ମୁଖ୍ୟ ଡେପୁଟି କଣ୍ଟ୍ରୋଲର ପଦ ମଧ୍ୟ ଖାଲି ପଡ଼ିଛି। ଜଗତ୍‌ସିଂହପୁର ଜିଲାର ଡେପୁଟି କଣ୍ଟ୍ରୋଲର କଟକ ଜିଲା ଦାୟିତ୍ୱରେ ରହିଛନ୍ତି। ବିଭାଗ ଏବେ ତିନି ଜଣ ଇନ୍ସପେକ୍ଟରଙ୍କୁ ନେଇ କାମ ଚଳାଉଥିବାରୁ ଅସାଧୁ ଲାଭଖୋର ବ୍ୟବସାୟୀ ଲୋକଙ୍କୁ ନିୟମିତ ଠକି ଚାଲିଛନ୍ତି ା ତେବେ ଏହାକୁ ନେଇ ଡେପୁଟି କଣ୍ଟ୍ରୋଲର ହରିଶଙ୍କର ପଟ୍ଟନାୟକ କହିଛନ୍ତି, ଆମର ଆବଶ୍ୟକତା ଠାରୁ କମ୍‌ କର୍ମଚାରୀ ରହିଛନ୍ତି ା କଟକ ଓଜନ ଓ ମାପ ବିଭାଗର ମୁଖ୍ୟ ଡେପୁଟି କଣ୍ଟ୍ରୋଲର ପଦ ଏଇ ମାସରେ ପୂରଣ କରାଯିବ। ଅନ୍ୟ ପଦବୀଗୁଡ଼ିକ ମଧ୍ୟ ଶୀଘ୍ର ପୂରଣ କରିବାକୁ ଚେଷ୍ଟା ଜାରି ରହିଛି। କରୋନା କାରଣରୁ ଗତ ଫେବୃୟାରୀରେ ଶେଷଥର ପାଇଁ ଚଢ଼ାଉ କରାଯାଇଥିଲା। ସ୍ଥାନୀୟ ଚାନ୍ଦିନୀଚୌକ ନିବାସୀ ସୁଧୀର ପଟ୍ଟନାୟକ କହିଛନ୍ତି, ଆମେ ଏ ପର୍ଯ୍ୟନ୍ତ ଜାଣିନୁ ଓଜନ ଓ ମାପରେ ଠକେଇ ହେଲେ କାହାକୁ ଅଭିଯୋଗ କରାଯିବ ା ତେବେ ଗତ ଦିନରେ କଟକ ମହାନଗର ନିଗମ ପକ୍ଷରୁ ସହରର ବିଭିନ୍ନ ସ୍ଥାନରେ ଚଢ଼ାଉ କରାଯାଇ ଅପମିଶ୍ରିତ ସାମଗ୍ରୀ ଜବତ କରାଯାଇଥ୍‌ତ୍ଲା। ସେହିପରି ଯଦି ଓଜନ ଓ ମାପ ବିଭାଗ ପକ୍ଷରୁ ବ୍ୟବସାୟିକ ଅନୁଷ୍ଠାନଗୁଡ଼ିକ ଉପରେ ଚଢ଼ାଉ କରାଯାଆନ୍ତା, ତେବେ ଗ୍ରାହକ ଉପକୃତ ହୁଅନ୍ତେ।