ବୈପାରିଗୁଡା,୮ା୧୦ (କଳ୍ପତରୁ ମହାନ୍ତି)ପ୍ରଧାନ ମନ୍ତ୍ରୀ ଆବାସ ଯୋଜନାରେ ଗରିବ ଲୋକଙ୍କୁ ଆବାସ ଯୋଗାଇ ଦେବା ବ୍ୟବସ୍ଥା ରହଛି। ଗ୍ରାମାଞ୍ଚଳରେ ଲୋକଙ୍କ ସରଳତାର ସୁଯୋଗ ନେଇ କେତେକ କର୍ମଚାରୀ କାଗଜପତ୍ରରେ ଚଞ୍ଚକତା କରି ଏ ବାବଦ ଅର୍ଥ ଲୁଟି ନେଉଛନ୍ତି। ଏପରି ଦେଖିବାକୁ ମିଳିଛି କୋରାପୁଟ ଜିଲା ବୈପାରିଗୁଡା ବ୍ଲକ ରାମଗରି ପଞ୍ଚାୟତର ରାମଗିରି ଗ୍ରାମର ସ୍ବର୍ଗତ ବଳରାମ ବେହେରାଙ୍କ ସ୍ତ୍ରୀ କୁନି ପ୍ରଧାନିଙ୍କ କ୍ଷେତ୍ରରେ। ତାଙ୍କ ଆବାସ ପାଇଁ ମିଳିବାକୁ ଥିବା ଟଙ୍କା କର୍ମଚାରୀମାନେ ଖାଇଯାଇଛନ୍ତି ବୋଲି କୁନି ଅଭିଯୋଗ କରିଛନ୍ତି।
ଖବରରୁ ଜଣାପଡିଛି, ୨୦୧୯-୨୦ ଆର୍ଥତ୍କ ବର୍ଷରେ କୁନି ପ୍ରଧାନିଙ୍କୁୁ ପ୍ରଧାନ ମନ୍ତ୍ରୀ ଆବାସ ଯୋଜନାରେ ଆବାସ ମିଳିଥିଲା। ଯାହାର ଆଇଡି ନମ୍ବର- ଓଆର୍ ୪୭୬୮୬୯୩। ଘର ନିର୍ମାଣ ପାଇଁ ନିର୍ଦ୍ଧାରିତ ସ୍ଥାନର ଜିଇଓ ଟ୍ୟାଗ କରାଯାଇ ଏଥିପାଇଁ ଆବଶ୍ୟକ କାଗଜପଦ୍ର ନିଆଯାଇଥିଲା। ପରବର୍ତ୍ତୀ ସମୟରେ କୁନି ପଞ୍ଚାୟତ କାର୍ଯ୍ୟାଳୟକୁ ଏ ସମ୍ପର୍କରେ ବୁଝିବାକୁ ଗଲେ କର୍ମଚାରୀମାନେ ବିଭିନ୍ନ ଆଳ ଦେଖାଇ ଦିନ ଗଡାଇ ଚାଲିଥିଲେ। ପରେ କୁନି ତାଙ୍କ ଘର ବାବଦକୁ ମିଳିବାକୁ ଥିବା ସମସ୍ତ ଅର୍ଥ ୧ ଲକ୍ଷ ୩୦ ହଜାର ଟଙ୍କା ଚଞ୍ଚକତା କରି ହଡପ କରାଯାଇଥିବା ଜାଣିବାକୁ ପାଇଥିଲେ। ଏ ନେଇ ସେ ଗତ ୨୫ା୭୨୦୨୨ରେ ବିଡିଓଙ୍କ ଦ୍ବାରା ପଞ୍ଚାୟତସ୍ତରୀୟ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରିଥିଲେ। ସେ ଏଥିରେ ପଞ୍ଚାୟତର କେତେ ଜଣ କର୍ମଚାରୀ ତାଙ୍କ ଆବାସ ବାବଦ ଟଙ୍କା ହଡପ କରିଥିବା ଉଲ୍ଲେଖ କରିଥିଲେ। ଏହାର ତଦନ୍ତ କରିବା ପରେ ବିଡିଓ ଅଭିମନ୍ୟୁ କବି ଶତପଥୀ ଦୋଷୀ କର୍ମଚାରୀ ଗୋରା ହନ୍ତାଳଙ୍କ ନାମରେ ଥାନାରେ ଏତଲା ଦେବାକୁ ତତ୍କାଳିନ ପିଇଓଙ୍କୁ ନିର୍ଦ୍ଦେଶ ଦେଇଥିଲେ। ଗୋରା ସେ ସମୟରେ ଗ୍ରାମ ରୋଜଗାର ସେବକଥିଲେ। ତେବେ ଏନେଇ ଅଭିଯୋଗ କରିବାର ବର୍ଷେ ବିତି ଯାଇଥିଲେ ମଧ୍ୟ କୁନିଙ୍କୁ ନ୍ୟାୟ ମିଳିନାହିଁ। ଅଭିଯୁକ୍ତ ଗ୍ରାମ ରୋଜଗାର ସେବକ ହନ୍ତାଳ ଏବେ ଜୟପୁର ବ୍ଲକରେ କାମ କରୁଛନ୍ତି। ଏ ସମ୍ପର୍କରେ ବର୍ତ୍ତମାନର ରାମଗିରି ପିଇଓ ଭରତ ଖରାଙ୍କୁ ପଚାରିବାରୁ ସେ କହିଲେ, ଏ ସମ୍ପର୍କରେ ତାଙ୍କ ପାଖରେ କୌଣସି ତଥ୍ୟ ନାହିଁ। ରାମଗିରି ଫାଣ୍ଡି ଅଧିକାରୀ ବଳରାମ ହିକ୍କାଙ୍କୁ ପଚାରିବାରୁ ସେମିତି କୌଣସି ଏତଲା ବର୍ଷକ ମଧ୍ୟରେ ହୋଇ ନ ଥିବା କହିଥିଲେ। ବିଡିଓ କବି ଶତପଥୀଙ୍କୁ ପଚାରିବାରୁ ସେ କହିଲେ, ହିତାଧିକାରୀ ଜଣକ ପୁଣି ଥରେ ଲେଖି ଦେଲେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସେ ଜିଲାପାଳଙ୍କୁ ସୁପାରିଶ କରିବେ ବୋଲି କହିଛନ୍ତି।
