ନୂଆଦିଲ୍ଲୀ,୨।୧୨: ଫର୍ଚୁନ ଇଣ୍ଡିଆ ଦ୍ୱାରା ପ୍ରକାଶିତ ଭାରତର ୫୦ଟି ଶକ୍ତିଶାଳୀ ମହିଳାଙ୍କ ତାଲିକାରେ ଏହା ପ୍ରକାଶ ପାଇଛି। ଏହି ତାଲିକାରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଦେଶର ସବୁଠାରୁ ଶକ୍ତିଶାଳୀ ମହିଳା ହୋଇଥିବାବେଳେ ରିଲାଏନ୍ସ ଫାଉଣ୍ଡେସନର ପ୍ରତିଷ୍ଠାତା ତଥା ଅଧ୍ୟକ୍ଷା ନୀତା ଅମ୍ବାନୀ ଦ୍ୱିତୀୟ ସ୍ଥାନରେ ଅଛନ୍ତି। ବିଶ୍ୱ ସ୍ବାସ୍ଥ୍ୟ ସଂଗଠନର ମୁଖ୍ୟ ବୈଜ୍ଞାନିକ ସୋମ୍ୟା ସ୍ବାମୀନାଥନ ତୃତୀୟ, ବାୟୋକନ କାର୍ଯ୍ୟନିର୍ବାହୀ ଅଧ୍ୟକ୍ଷ କିରଣ ମଜୁମଦାର ଖାଁ ଚତୁର୍ଥ ଏବଂ ଭାରତ ବାୟୋଟେକର ସହ-ପ୍ରତିଷ୍ଠାତା ତଥା ଯୁଗ୍ମ ପରିଚାଳନା ନିର୍ଦ୍ଦେଶିକ ସୁଚିତ୍ରା ଏଲା ପଞ୍ଚମ ସ୍ଥାନରେ ଅଛନ୍ତି।
ଫର୍ଚୁନ ପକ୍ଷରୁ ସୀତାରମଣଙ୍କ ବିଷୟରେ କୁହାଯାଇଛି ଯେ, ମାର୍ଚ୍ଚ ୨୦୨୦ରେ ଲକ୍ଡାଉନ ଲାଗୁ ହେବାର ୩୬ ଘଣ୍ଟା ପରେ ଖବରଦାତା ସମ୍ମିଳନୀ କରିବାରେ ସେ ହେଉଛନ୍ତି ପ୍ରଥମ କେନ୍ଦ୍ର ମନ୍ତ୍ରୀ। ସେତେବେଳେ କରୋନା ମହାମାରୀର ମୁକାବିଲା ତଥା ଅର୍ଥନୀତିର ଉନ୍ନତି ପାଇଁ ସରକାରଙ୍କ ଯୋଜନା ବିଷୟରେ ପୁରା ଦେଶ ଜାଣିବାକୁ ଚାହୁଁଥିଲା। ସେହି ଭୟାନକ ଅବଧିରେ, ସେ ଅର୍ଥମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ।
ନୀତା ଅମ୍ବାନୀଙ୍କ ବିଷୟରେ କୁହାଯାଇଛି ଯେ ଏପ୍ରିଲ, ୨୦୨୦ରେ ଲକ୍ଡାଉନ ସମୟରେ ସେ ରିଲାଏନ୍ସ ଫାଉଣ୍ଡେସନ ହସପିଟାଲର ପରିଚାଳନା ଦଳ ସହ ଏକ ବୈଠକ କରି ଗରିବ ଲୋକ ମହାମାରୀ ଦ୍ୱାରା କେତେ ପ୍ରଭାବିତ ହେବେ ତାହା ଜାଣିବା ପାଇଁ କହିଥିଲେ। ଏହା ପରେ ସେ ମୁମ୍ବାଇରେ ବିଏମସି ସହ ମିଶି ୫୦ ଶଯ୍ୟା ବିଶିଷ୍ଟ କୋଭିଡ ହସ୍ପିଟାଲ ନିର୍ମାଣ ଦାୟିତ୍ୱରେ ଥିଲେ। ତା’ପରେ ଏହାର କ୍ଷମତା ୨,୦୦୦ ଶଯ୍ୟାକୁ ବୃଦ୍ଧି କରାଯାଇଥିଲା। ଅମ୍ଳଜାନ ଯୋଗାଣ ମଧ୍ୟ ବୃଦ୍ଧି କରାଯାଇଥିଲା ଏବଂ ଚିକିତ୍ସା ମଧ୍ୟ ମାଗଣା ଥିଲା ।
