କୋରୁକୋଣ୍ଡା,୨୬ା୧୦(ଡି.ଏନ୍.ଏ.): ଟେଣ୍ଡର ଅପେକ୍ଷାରେ ପଡ଼ି ରହିଛି ଏନ୍ଏସିର ଅଧିକାଂଶ ଦୋକାନ ଗୃହ। ଏପରି ଘଟଣା ଦେଖିବାକୁ ମିଳିଛି ମାଲକାନଗିରି ଜିଲା ବାଲିମେଳା ଏନ୍ଏସିରେ। ତେବେ ଆଜିକୁ ଦୀର୍ଘ ଦେଢ଼ ବର୍ଷରୁ ଊଦ୍ଧର୍ବ ସମୟ ହେବ ବାଲିମେଳା ଏନ୍ଏସିର ପ୍ରାୟ ୩୦ଟି ନବନିର୍ମିତ ଦୋକାନ ଗୃହ ନିର୍ମାଣ କରାଯାଇଥିଲେ ମଧ୍ୟ ଏଯାଏ ଆରମ୍ଭ ହୋଇପାରିଲାନି ଟେଣ୍ଡର ପ୍ରକ୍ରିୟା, ଯାହା ଦ୍ୱାରା ସ୍ଥାନୀୟ ଅଞ୍ଚଳରେ ନୂତନ ଦୋକାନ ଗୃହ ଖୋଲିବାକୁ ଚାହିଁ ବସିଥିବା କିଛି ବ୍ୟବସାୟୀ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ଏନ୍ଏସିର ପ୍ରାୟତଃ ଦୋକାନ ଗୃହ ଲକ୍ଡାଉନ ପୂର୍ବରୁ ନିର୍ମାଣ ହୋଇଥିଲା। ଏହି ଷ୍ଟଲଗୁଡ଼ିକ ମଧ୍ୟ ବ୍ୟବହାର ନ ହେଉଣୁ କିଛି ମରାମତି କାର୍ଯ୍ୟ ମଧ୍ୟ ମାଗିଲାଣି। କିନ୍ତୁ ଏଯାଏ ଟେଣ୍ଡର ପ୍ରକ୍ରିୟା ତ୍ୱରାନ୍ବିତ ହୋଇ ନ ଥିବାରୁ ସେଠାରେ ଗୋରୁଗାଈ ଡେରା ପକାଇଥିବା ଦେଖିବାକୁ ମିଳୁଛି। ଏଥିସହିତ ସନ୍ଧ୍ୟାରେ ମଧ୍ୟ ବସଷ୍ଟାଣ୍ଡ ଉପରେ ନିର୍ମାଣ ହୋଇଥିବା ଷ୍ଟଲଗୁଡ଼ିକ ବିଭିନ୍ନ ଅସାମାଜିକ କାର୍ଯ୍ୟର ପେଣ୍ଠସ୍ଥଳୀ ପାଲଟିଛି। ଏଥିସହିତ ପୁରୁଣା ବସ୍ଷ୍ଟାଣ୍ଡ ସମ୍ମୁଖରେ ନିର୍ମାଣ ହୋଇଥିବା ନୂତନ ଦୋକାନ ଗୃହଗୁଡ଼ିକ କିଛି ଅସାଧୁ ବ୍ୟକ୍ତି ମାଡ଼ି ବସି ନିଜର ବ୍ୟବସାୟ ଜାରି ରଖିଥିବା ଦେଖିବାକୁ ମିଳୁଛି। ତେବେ ଟେଣ୍ଡର ପ୍ରକ୍ରିୟାରେ ବିଳମ୍ବ ହେଉଥିବାରୁ ଏପରି ଅଭାବନୀୟ ଘଟଣା ଘଟୁଥିବା ଦେଖିବାକୁ ମିଳୁଛି। କିଛି ଗରିବ ଶ୍ରମିକ ଶ୍ରେଣୀର ବ୍ୟକ୍ତି କିମ୍ବା ଅନୁସୂଚିତ ଜାତି ଓ ଜନଜାତି ବର୍ଗର ଲୋକଙ୍କୁ ଟେଣ୍ଡର ପ୍ରକ୍ରିୟାରେ କୌଣସି ସ୍ବତନ୍ତ୍ରତା ନ ଥିବା ଦେଖିବାକୁ ମିଳୁଛି। ଯାହାଦ୍ୱାରା କେବଳ କିଛି ଆଖି ଦୃଶିଆ ଧନୀ ବ୍ୟବସାୟୀ ଟେଣ୍ଡର ପ୍ରକ୍ରିୟାରେ ଭାଗ ନେଇ ଷ୍ଟଲଗୁଡିକ ହାତେଇ ନେଉଥିବା ଦେଖିବାକୁ ମିଳୁଛି। ତେଣୁ ଯଦି ଅନୁସୂଚିତ ଜାତି ଓ ଜନଜାତି ବର୍ଗ ନିମନ୍ତେ କିଛି ଷ୍ଟଲ ସରଂକ୍ଷିତ ରଖି ରିହାତି ମୂଲ୍ୟରେ ସେମାନଙ୍କୁ ଦିଆଯାଇପାରନ୍ତା ତାହେଲେ କିଛି ବ୍ୟବସାୟୀ ଏହାଦ୍ୱାରା ଲାଭବାନ ହୋଇପାରନ୍ତେ ବୋଲି ମତ ପ୍ରକାଶ କରିଛନ୍ତି। ତେଣୁ ତୁରନ୍ତ ଏହି ଟେଣ୍ଡର ପ୍ରକ୍ରିୟାକୁ ତ୍ୱରାନ୍ବିତ କରି ନବନିର୍ମିତ ଷ୍ଟଲ୍ଗୁଡ଼ିକ ବ୍ୟବସାୟୀମାନଙ୍କୁ ହସ୍ତାନ୍ତର କରିବାକୁ ଦାବି ହେଉଛି।
